Vona va txhumayete ngu txibindi

Dijaha do kari adi i nga di txilima, otshe masiku di txi khalahatsha matimbani ka dithempele di txi kombela mali. Ditshiku dimwani, Pedro ni Johani va tsute dithempeleni se dijaha dile di va kombete mali. Pedro a di gete tiya: ‘Ani ni na kuninga tximaha txa lisima ngutu kupinda mali, ngu ditina da Jesu, khukha u tsimbila.’ Se dijaha dile di to khata kutsimbila. Vathu vavangi ava va nga wona tile, va xamate ngutu se ve va vagondiswa va Jesu.

Kambe vaprista ni Vasadhusi va henyile ngutu, ve gwita ve teka Pedro ni Johani ve va yisa tribhunali. Akheya va ti ya wotisa Pedro ni Johani ti to i ti mani a nga ti va ningile mtamo wo hanyisa dijaha dile. Pedro a xamute a txi khene: ‘I Jesu Kristu, dijaha adi anu mi nga di daya.’ Se vaprista ni Vasadhusi, va to va gela ti to va sa fanela kuwombawomba kambe ngu Jesu. Kambe Pedro ni Johani va wombile tiya: ‘Athu kha hi na mbi leka, hi fanete kuwombawomba ngu Jesu.’

Mbimo yi va nga va leka ve tsula, Pedro ni Johani va tsute ve ya kontarela vagondiswa vamwani ati ti nga di mahekile. Votshe va to patana ve maha mkombelo, ve kombela Jehovha ti to e va vhuna. Se Jehovha a to va ninga moya wo sawuleka kasiku ve simama ve txhumayela ngu txibindi ni kuhanyisa vathu. Mtengo wa vagondiswa wu to ya wu engeteleka ngutu, kambe Vasadhusi va si ti tsakeli toneto. Va to ñola vapostoli ve va beta jele. Ni wusiku, ngilozi ya Jehovha yi to ta tula matimba a jele, yi gela tiya vapostoli: ‘Tshumelani mi tsula dithempeleni mi ya simama mi gondisa kheya.’

Mangwanani ka kona, Vasadhusi va ti zivile ti to vapostoli va di humile jele ni ku va di dithempeleni va txi gondisa. Vapostoli va tshumete ve ñolwa kambe, ve tekwa ve tsuliswa tribhunali. Mprista wa hombe a va gete tiya: ‘Ina anu kha ha mi tsimba kuwombawomba ngu Jesu?’ Pedro a to khene: ‘Athu hi fanete kuengisa Txizimu kota Mkoma kupinda vathu.’

Majaha ale a tribhunali ma to henya ngutu a ha koza me lava kudaya vapostoli. Kambe Mfarisi mmwani awu a nga txi dhanwa ku i Gamaliyeli a va gete tiya: ‘Ti woneleni, kutilava Txizimu ngu txona txi vhunako majaha yawa. Ina anu mi lava kulwisana ni Txizimu?’ Majaha yale ma lekile vapostoli ve tsula. Kambe ma si se va leka ve tsula, ma khatile ngu ku va peka me gwita me va gela kambe ti to va di fanete kuema kutxhumayela. Hambiketo, vapostoli va ve ni txibindi. Ditshiku ni ditshiku va txi txhumayela mahungu a manene dithempeleni ni ngu mti ni mti.