Jesu e sawula Sawule

Sawule a veleketwe ka didhoropa da Tarso. Ene i ti Mfarisi ni ku a txi yi ziva kwati milayo ya Vajudha, kambe a txi ma nyenya ngutu Makristu. A txi teka majaha ni vavasikati ava i nga ti Makristu e va beta jele ngu kanu. Mbimo yi vathu va tshofu va nga daya mgondiswa awu va nga txi khene i Sitefani ngu marigwi, Sawule a ti tiho a txi va wonetela.

Sawule a txi ma nyenya ngutu Makristu a ha koza e kombela mprista wa hombe ti to e mtumelela ku e tsula Dhamasku e ya ñola Makristu a ya ma nga txi zumba kheya e ma beta jele. Mbimo yi Sawule a nga hoka Dhamasku, a to xokarwa ngu liwoningo lo ta ngu nzumani se e wa hahatshi. Sawule a to pfa dipswi di txi m’gela tiya: ‘Sawule, Sawule, u ni xanisela txani?’ Sawule a to wotisa tiya: ‘Ngawe mani?’ Dipswi dile di to xamula di txi kha dona: ‘Ngani Jesu. Ni lava ti to u tsula Dhamasku, akhe va na ya ku gela ati u fanelako kumaha.’ Ka yona mbimo yile, Sawule a to maha dibhofu. Se majaha o kari a ya ma nga txi tsula nayo, ma to m’ñola ngu diwoko me bela nayo Dhamasku.

Akhe Dhamasku ku ti ni Mkristu awu a nga txi dhanwa ku i Ananiya. Jesu a to humelela kwakwe ngu mu ka m’woniso e m’gela tiya: ‘Tsula mtini ka Judha, ngu ruwa ayi yi dhanwako ku njo Lulama u ya xoletela Sawule.’ Ananiya a to khene: ‘Mkoma, ni pfite vathu va txi womba-womba ngu Sawule. Ene a lava kuñola votshe vagondiswa vako e va beta jele.’ Se Jesu a to khene: ‘Tsula kwakwe, ani ni m’sawute kasiku e txhumayela mahungu a manene ka makhalo amangi.’

Ananiya a tsute e ya manana ni Sawule e m’gela tiya: ‘Jesu a ni rumete kasi ku ni ta hanyisa maso ako.’ Sawule a to tshumela e wona. Ene a gondile mayelano ni Jesu ni ku va mgondiswa wakwe. Msana ka kuva a di bhabhatisilwe, Sawule a khatile kutxhumayela disinagogani kumweko ni mamwani Makristu. Hi nga alakanya nzila yi Vajudha va nga xamala ngu yona mbimo yi va nga wona Sawule a txi womba-womba ngu Jesu.

Sawule a zumbile malembe mararu a txi txhumayela Dhamasku. Kambe Vajudha va mu henyete ngutu ni ku va mahile maplanu o lava ku m’daya. Mbimo yi vanathu va dibanzani va nga ti ziva, vona va vhuni Sawule ti to e huluka. Vona va m’betile ka thavango ya hombe, ve m’hulumeta ka ditshoko adi di nga diho ka mmuru wa didhoropa.

Mbimo yi a nga hoka Jerusalema, Sawule a ti ya zama ku ti pata ni Makristu mamwani. Kambe Makristu a kheya ma txi mthava. Kambe mgondiswa mmwani awu a nga txi dhanwa ku i Bharnabhasi, a m’kombile wunene. Ene a m’tekile e m’yisa ka vapostoli e ya va txhamusela ti to Sawule a ti txitxile ngu ditshuri. Msana keto, Sawule a khatile kutxhumayela mahungu a manene ni dibanza da khe Jerusalema. Ku di pindile mbimo, ene a khatile kudhanwa ti to i Paulo.