Korneliyo e gonda ngu Jehovha

Ka didhoropa da Khezareya, ku ti ni mthangeli wa masotxhwa a Varoma awu a nga txi dhanwa ku i Korneliyo. Ene i si nga Mjudha, kambe Vajudha vavangi va txi m’xonipha. Korneliyo a ti ni wuha ni ku a txi ti dhunda kuvhuna sisiwana. Ene a txi kholwa ka Jehovha ni ku mbimo yotshe a txi maha mkombelo. Ditshiku dimwani, ngilozi yi humelete ka Korneliyo yi ta m’gela tiya: ‘Txizimu txi yi engisile mikombelo yako. Konku rumela majaha ti to me tsula ka didhoropa da Jopa me ya dhana Pedro. Ngu txikuluveta, Korneliyo a to rumela majaha mararu me tsula Jopa.

Kuve khe Jopa, Pedro nene a ve ni m’woniso. Ene a woni sihari asi Vajudha va nga sa fanela kudya, se a pfite dipswi di txi m’gela ti to a ti fanete kudaya sihari sile e dya. Kambe Pedro a lambile kudya nguku silo sile si txi tsimbwa ngu mlayo. Dipswi dile di to m’gela tiya: ‘U nga pimisi ti to sihari siya si nyamile, nguku Txizimu txi si basisile.’ Msana keto, Txizimu txi gete tiya Pedro: ‘Ku ni majaha mararu khe ditimbani ma ku lavako. Tsula nawo amu ma no kugela.’ Pedro a to tsula ditimbani e ya womba-womba ni majaha ale a mararu e ma wotisa ti to ma txi lava txani. Ona ma to xamula ma txi kha ona: ‘Korneliyo mthangeli wa masotxhwa a Varoma, a hi rumile ti to hi ta hawa. Ene a kombela ti to u tsula mtini kwakwe khe Khezareya.’ Se majaha ale a mararu ma to otela mtini ka Pedro. Mangwanani ka kona, Pedro a to tsula nawo Khezareya, kumweko ni vamwani vanathu va khe Jopa.

Mbimo yi Pedro a nga hoka, Korneliyo a to khizama masoni kwakwe. Kambe Pedro a to m’gela tiya: ‘Khukha u txi ema, phela nani ni m’thu kufana ni nawe. Hambiku athu Vajudha hi si beliko ka miti ya va i si ngaku Vajudha, Txizimu txi ni rumete ti to ni ta mtini kwako. Ni gele, ngu kutxani u di rumile majaha yawa ti to me ta ni dhana?’

Korneliyo a to xamula a txi khene: ‘Ka 4 wa masiku msana, ni mahile mkombelo ka Txizimu, se ngilozi yo kari yi ni rumile ti to ni ta ku dhana. Ho kombela, hi gondise totshe ati Jehovha a lavako ku hi gela.’ Se Pedro a to khene: ‘Konku se na ti ziva ti to Txizimu kha txi nga ni mhaka ni ti to m’thu Mjudha mwendo ahim him. Txona txa amukela votshe vathu ava va lavako ku txi khozela.’ Pedro a to khata ku va gondisa timhaka tatingi mayelano ni Jesu. Se Korneliyo ni votshe ava a nga ti navo va to amukela moya wo sawuleka ve bhabhatiswa.