Vathu vavangi va ve Makristu

Vapostoli va engisile ati Jesu a nga ti va rumile to txhumayela mahungu a manene hamafuni kotshe. Ngu dilembe da 43 ka nguva ya Kristu, vanathu va khe Antiyokiya, va rumete Paulo ni Bharnabhasi ka diendo da wutxhumayeli. Ka diendo donedo, Paulo ni Bharnabhasi va txhumayete ka makhalo amangi a Aziya wa M’dotho, o fana ni Dherbhe, Listra ni Ikoniyo.

Paulo ni Bharnabhasi, va txi txhumayela mahungu a manene ka votshe vathu. Va txi txhumayela vo ganya, sisiwana, majovhem ni vo kula ngu tanga. Vathu vavangi va khatile kukholwa ka Jesu. Ditshiku dimwani, Paulo ni Bharnabhasi va txhumayete Serjiyo Paulosi, govhernadhori wa Kipra. Kambe ku to humelela m’loyi wo kari, e zama ku va lekisa kutxhumayela. Paulo a to gela tiya m’loyi wule: Jehovha a na kutsayisa.’ Ka yona mbimo yile, m’loyi wule a to maha dibhofu. Mbimo yi govhernadhori a nga wona tile, a to xamala se a to maha mkristu.

Paulo ni Bharnabhasi va txi txhumayela otshe makhalo. Tiruwani, mamerkadhu, ngu mti ni mti ni masinagogani. Mbimo yi va nga pinda ngu ka didhoropa da Listra, Paulo ni Bharnabhasi va hanyisile dijaha adi i nga ti txilima. Vathu ava va nga wona tile va to pimisa ti to Paulo ni Bharnabhasi i ti sizimu, se ve khata ku va khozela. Kambe Paulo ni Bharnabhasi va to va gela tiya: ‘Mi nga maheni eto, phela athu ho va vathu dwe, khozelani Txizimu.’ Se Vajudha vamwani va to khata kuwombawomba kubiha ngu Paulo ni Bharnabhasi ka vathu va khe Listra. Ngu toneto, va to fayetela Paulo ngu marigwi ve gwita ve mu ruruvisa ve ya m’veka hahanze ka didhoropa. Vona va txi pimisa ti to Paulo a fite, kambe ene a sa fa. Ngu txikuluveta, vanathu va tsute ve ya vhuna Paulo, ve mteka ve tshumela ve tsula nayo didhoropani. Ku di pindile mbimo, Paulo a tshumete e tsula Antiyokiya.

Ngu dilembe da 49 ka nguva ya Kristu, Paulo a to enda kambe e tsimbila e txhumayela. Kukhata, ene a tshumete e ya pfuxela vanathu va khe Aziya wa M’dotho. Ngu msana, a tsute ka makhalo a kule ngutu a khe Europa. Ene a tsute Atena, Efesu, Filipiya, Tesalonika ni ka mamwani madhoropa. Luka, Silasi ni dijovhem adi di nga txi dhanwa ku i Timoti, va endile ni Paulo. Vona va mahile mabanza, ni ku ma vhuna ku me simama me kula. Paulo a zumbile mbimo yo dingana dilembe ni hafu khe Korinto, kasi kutsanisa vanathu va kheya. Ene a txhumayete, e gondisa ni kubhalela mapasi mabanza amangi. Paulo a tshumete e thuma kumaha matenda. Kambe ku di pindile mbimo a tshumete e tsula Antiyokiya.

Ngu dilembe da 52 ka nguva ya Kristu, Paulo a tshumete e enda kambe ngu dikhambi da wuraru kasiku e ya txhumayela. Ene a khatete khe Aziya wa M’dotho, e tsula e ya hoka Filipiya. Msana keto a tsute Korinto. Paulo a zumbile malembe amangi Efesu, a txi txhumayela mahungu a manene, a txi hanyisa vathu ni kuvhuna mabanza. Ditshiku ni ditshiku, ene a txi tsula txikolwani a txi ya maha madhixkursu. Vathu vavangi ava va nga txi m’engisela a txi gondisa, va ve Makristu. Msana ko va a di txhumayete makhalo amangi, Paulo a tsute Jerusalema.