Txiwuletiso

Dibhuku di di ku Mibhalo ya Mahanyelo a Wukristu di na kuvhuna kumana mavhersikulo ni matimu a mu ka Bhiblia aya ma nga ku vhunako ti to u wonisana ni sikarato sa wutomi. Dona di na kuvhuna to u mana tindimana ati ti no tsanisa vamwani ni ku kukuzeta to u maha sisungo si si no tsakisa Jehovha. Sawula mhaka yi yi nga kutsakisa. Se ka mhaka yoneyo u na mana siwotiso ni titxhamuselo to koma ta matimu a Bhiblia ati ti nga ku vhunako. (Wona dibhokiso di di ku “Nzila yo thumisa dibhuku diya.”) Ngu txikuluveta u na mana tindimana ati ti nga ku ningako sialakanyiso ni ku kuthavelela. U nga tshumela u mana matshina a milayo a Bhiblia aya u nga ma thumisako kasi kuvhuna vamwani ni ku va kuzeta.

Nzila yo thumisa dibhuku diya

U txi lava mhaka yo kari, u nga xola ka lista ya misungo ya timhaka. Dibhuku diya di ku Mibhalo ya Mahanyelo a Wukristu di abanisilwe ngu 7 wa sienge i ku siya: Sikarato, Mahanyelo, Dibanza, Wutomi wathu, Mwaya, Wuxaka wathu ni Jehovha, ni Tifanelo ta moya. U nga mana madungula o tala ka sienge soneso. U nga tshumela u mana timhaka ti ti yelanako ka mapajina ya ma londiselako. Ngako u txi lava mhaka yo kari, kambe u si tizivi to u na yi mana hani, tsula ha ku ku “Timhaka totshe.” Ka mhaka yimwani ni yimwani u na mana dipswi di di nga nzihatiswa. Yimwani i mhaka, kumwani siwotiso. Se u txi lera mavhersikulo ya ma nga nzihatiswa, alakanyisisa ngu nzila yi ma seketelako ngu yona mhaka yoneyo mwendo ma xamulako ngu yona txiwotiso. Makhambi mamwani, mhaka yo kari yi nga abaniswa ngu misungo ya timhaka, se eto ti kuvhuna to u yi mana ngu txikuluveta pontu yi u lavako ku yi bhaxara. Mbimo yimwani u na mana Mibhalo yi va nga bhala to “tshumela u wona,” mavhersikulo oneyo ma tsimbitisana kwati ni mhaka yi u yi lavako. U nga tshumela u mana lista ya “Matimu a lisima a mu ka Bhiblia.” Kona u mana pontu ya lisima mwendo gondo yo kari ka m’bhalo awu wu nga wombwa. Mapswi oneyo ma na kuvhuna kualakanyisisa ngu m’thu wo kari wa mu ka Bhiblia mbimo yi u lerako.

Dibhuku diya kha di nga ni yotshe mibhalo ya mhaka yimwani ni yimwani. Kambe dona di nga kuvhuna ngutu ku u khata kumaha wuxolisisi. (Mav 2:⁠1-⁠6) Kasi ku u engetela wuzivi wako, thumisa mareferensiya ni ma nota de estudo ya Tradução do Novo Mundo da Bíblia Sagrada. U nga thumisa kambe Mkongomiso wa Tifakazi ta Jehovha wo maha wuxolisisi mwendo Índice das Publicações da Torre de Vigia, kasi ku u mana to engeteleka mayelano ni m’bhalo wo kari. Xola ka mabhuku ya ma ku ngadi kuhumiswa ti to u mana titxhamuselo ta ngweno mayelano ni ditshuri da mu ka Bhiblia.

Hi navela ti to dibhuku diya di kuvhuna kumana wutxhari, wuzivi ni kupfisisa Mibhalo yo Sawuleka. Mbimo yi u thumisako dibhuku diya, u na ya u tsaniseka ti to “Dipswi da Txizimu da hanya, di ni mtamo.”—⁠Vaheb 4:⁠12.