Mbimo yi Txizimu txi nga ti fuma, sotshe sivangwa si ti ni wumwewo ni kudikha

Ngu kutxani hi txi lava Mfumo wa Txizimu?

Makhatoni ka matimu a vathu, M’vangi wathu awu ditina dakwe i ku Jehovha, i ti ene basi a nga ti Fuma. Ene a ti fuma ngu nzila ya lirando. A mahile Paradhise yo tshura ayi yi dhanwako ku i jaradhi ya Edheni aha vathu va ndi no hanya kona. A tshumete e va ninga sakudya so tala. Kuengetela koneho, a va ningile mthumo wo tsakisa ngutu. (Genesisi 1:28, 29; 2:8, 15) Vathu votshe va ndi na zumba va di tsakile ni kudikha ngako va ti ko fumwa basi ngu Txizimu txa lirando.

Adhamu a di ñote m’hando wo tsimbiswa awu a nga ningwa ngu Evha. — Vathu vo khata va wukete wukoma wa Txizimu

Bhiblia yi txhamusela ti to ngelozi yo kari yi dhanwako ku i Sathani Dhiyabhulosi yi wukete fanelo ya Txizimu yo fuma. Yona yi wombile ti to vathu va nga tsaka na va si fumwi ngu Txizimu. Txo biha ngu ti to vaveleki vathu vo khata Adhamu ni Eva va seketete Sathani ve wukela Txizimu.—Genesisi 3:1-6; Mtuletelo 12:9.

Aku Adhamu ni Evha va nga mbi lava kufumwa ngu Txizimu, vona va luzile Paradhise ve tshumela ve luza themba yo hanya ngu ha ku si gumiko ni wutomi wo hetiseka. (Genesisi 3:17-19) Sisungo sawe si gwesile ni vanana va va ndi no velekwa. Bhiblia yi womba to ngu mhaka ya ku Adhamu a nga onha, ‘txionho txi wulete ha ditikoni ni lifo ngu mhaka ya txionho.’ (Varoma 5:12) Txionho txi ve ni txhatxhazelo yimwani yo panda: ‘M’thu a fuma txitimwi ka mmwani m’thu, kasi ku mxanisa.’ (Ekleziyaste 8:9) Eto ti lava kuwomba ti to ngako vathu va txi ti fuma, sikarato so ya si engeteleka.

WUKOMA WA VATHU WU KHATA

Nimrodhe a di emile e kombisa ku ti guleta. Ngu khe msana vathu va txi aka. — Nimrodhe a wukete Jehovha

Mkoma wo khata awu a wombwako mu ka Bhiblia i Nimrodhe. Ene a wukete wukoma wa Txizimu. Msana ka Nimrodhe, votshe vathu va va ku ni wukoma kha va wu thumisi ngu nzila ya yinene. Kupinda 3.000 wa malembe, Mkoma Solomoni a di bhate mapswi awa: “Ni to wona mirongo ya vale va xaniswako, ni ya vale va pwatako mthaveleli ni wammweyo; kambe mtamo wu ti ti ka didhawa da vaxanisi.”—Ekleziyaste 4:1.

Kha ti hambani ni nyamsi. Dibhuku do kari adi di nga humiswa ngu Nações Unidas ngu 2009, di wombile to mafumelo o biha “mbumwewo wa mikuloti yi yi vangako wubihi ha mafuni.”

MBIMO YO TEKA DIZAMBO!

Ditiko di lava vafumi vavanene ni mafumelo a manene. I ku ti M’vangi wathu a nga thembisa!

Mifota: Wuyelo ya mifumo ya vathu. 1. Wamsikati wa Ásia a di nyete a di ñote mwanana wakwe wu a dilako. 2. Wamwamna a di otete ka m’bhedhu sibhejela. 3. Masotxhwa ma txi dhuvulela ma txi lwa yimbi. 4. Vatereki va di henyile ve guleta mawoko awe txitimwi. 5. Wamsikati a di ni mwanana wakwe va di ka nyumba yawe ngu hahanze yi di fayetetwe mavhidro ya ditimba. 6. Didhoropa di di ku ni tikoponi di di tate ngu wutshi ni tifiyo ta magezi. — Hambi wukoma wu wu lavako kuvhuna vathu, kha wu sikoti kululamisa sikarato sawe sa hombe

Txizimu txi vekile Mfumo awu wu no tsiveta mifumo ya vathu, se wona wu na “zumba ngu ha ku sigwitiko.” (Dhaniyeli 2:44) Ewo Mfumo awu timiliyoni ta vathu ti wu kombelelako. (Matewu 6:9, 10) Kambe Txizimu kha txi na mbi fuma txokha. Kuhambana ni toneto, ene a vekile m’thu wu a nga khala kuhanya ha mafuni ka si ku e va Mkoma. I mani m’thu eneyo?