Mareferensiya a txibhukwana txa mitshangano ya Mahanyelo a Wukristu
5-11 KA AGOSTO
TITHOMBA TA MU KA DIPSWI DA TXIZIMU | 2 TIMOTI 1-4
“Txizimu kha txa hi ninga moya wa dizowa”
w09-T 15/5 15 ¶9
Vaphya—Mahani kukula kwano kuwoneka
Ti to e vhuna Timoti, Paulo ngu mbimo yimwani a mu khumbutisile tiya: “Txizimu kha txa hi ninga moya wa dizowa, aniko txi hi ningile moya wa mtamo, ni wa lirando ni ku ti pimela.” (2 Tim 1:7) “Ku ti pimela” ti pata kuziva kupimisa ni ku ti ñola kwati. Ti pata ni nzila yi u wonako silo ngu yona, i si nga ngu nzila ayi awe u lavako si va ngu yona. Vaphya vamwani vo mbi vitwa ngu didhawa da moya va kombisa moya wa dizowa, ngu kupimisa kwawe va wona ti to va na huluka ka to kari ngu kututumela kuotela ngutu, kuxalela ngutu TV, ve thumisa timbangi, mibuso yo tala mwendo kumaha wugango. Makristu ma fanete ‘kuhambana ni to biha ni minavelo yo biha ya ditiko, ti to me hanya ngu ku ti pimela ni kululama ni txithavo ditikoni muwa.’—Titosi 2:12.
w03-T 1/3 9 ¶7
“Tsana u va ni mtamo”
Atxi bhalela Timoti, Paulo a wombile tiya: “Nguko Txizimu kha txa hi ninga moya wa dizowa, aniko txi hi ningile moya wa mtamo . . . Ngu toneto, u nga telwe ngu tingana kufakazela Mkoma Wathu.” (2 Timoti 1:7, 8; Marku 8:38) Msana ko lera mapswi awa, hi nga tiwotisa tiya: ‘Ina ni ni dizowa ngu mhaka ya likholo langu mwendo ni ni txibindi? Na vagela ava ni thumako navo mwendo va ni gondako navo ti to ni Fakazi ya Jehovha mwendo ni zama ku ti sisa? Ina na thava kuva wo hambana ni vamwani, mwendo na tsana ngu mhaka ya wuxaka wangu ni Jehovha?’ Ngako m’thu a ti ni matipfelo o biha ngu mhaka ya mahungu a manene, mwendo kuthava kuva m’thu wo hambana ni vamwani, a fanete kukhumbula ati Jehovha a nga gela Joxuwa: “Tsana u va ni mtamo.” Khumbula to hi nga mawonelo ava hi thumako navo mwendo hi gondako navo i ku a lisima, kambe nga Jehovha ni Jesu Kristu.—Vagalatiya 1:10.
Lavetela tithomba ta moya
Ku va nyatithombe masoni ka Jehovha
Timoti i ti wamwamna wa likholo. Paulo a ti khene Timoti “disotxhwa da dinene da Kristu Jesu,” se e gwita a txi khene kwakwe: “A walo m’thu wu, a ku, a di yimbini, a txi ti ningetela ka mithumo ya kuhanya kuwa, ngako a txi lava kutsakisa awule a nga m’ramba kuta yimbini.” (2 Tim. 2:3, 4) Nyamsi, valondiseli va Jesu, kupata ni miliyoni yimweyo ya vathumeli va mbimo yotshe, va maha totshe ti va nga ti kotako ti to ve thumisa txialakanyiso txa mpostoli Paulo. Va lamba ka ti ditiko diya do tala ngu mabiwu di wombako tona. Kha va divali ditshina diya da mlayo: “Wule a ku ni mnando a maneka i di khumbi ya wule a nga m’txeneka.” (Mav. 22:7) Sathani a lava ti to hi luza mtamo ni mbimo yathu hi di ka ta mabhindo a ditiko diya. Vamwani va maha sikweneti sa hombe ti to ve xava mimovha, ve hakela sikolwa ve maha mtxadhu wo dhula. Wa ti wona ti to ngako hi si tiwoneli hi nga maha sibotxhwa sa sikweneti? Athu hi kombisa wutxhari mbimo yi hi hehukisaku wutomi wathu, hi vayilela sikweneti ni kuthumisa male hi si woni ni msana. Ngu toneto basi ti nga mahako hi thumela Txizimu hi di khululekile i singa ku va sibotxhwa sa mabhindo a ditiko diya.—1 Tim. 6:10.
w14-T 15/7 14 ¶10
Vathu va Jehovha va ‘hambana ni wubihi’
Nyamsi kha ta toloveleka kumaneka vathu vagondisako tigondo ta makuho dibanzani. Hambiketo, ngako hi txi tshangana ni tigondo ti ti si tsimbilelaniko ni Bhiblia hi fanete ku ti vayilela ti si nga ni mhaka ni ti to ti ta ngu hani. Ngu toneto hi nga wutxhari kukanetisana ni vathu va va gondisako ti ti lwisanako ni Bhiblia, i ngava u di navo khohe ngu khohe mwendo ngu internet mwendo ma redes sociaias. Hambi loko hi di ni txikongomelo txo vhuna m’thu eneyo, hi fanela kukhumbula to mabhulo eyo ma lwisana ni ti hi nga gwita ku ti wona ka Bhiblia. Ngu toneto, kota Tifakazi ta Jehovha, ha hambana ni kukanetisana ni va vagondisako makuho.
12-18 KA AGOSTO
TITHOMBA TA MU KA DIPSWI DA TXIZIMU | TITOSI 1–FILIMONI
“Kuveka madhota a vathangeli”
w14-T 15/11 28-29
Tixamulo ta siwotiso sa vagondi
Hambiku mibhalo yi si txhamuseliko totshe mayelana ni ku sawulwa ka madhota, hi nga wona ngu maso a mialakanyo ti to ti txi mahiswa kutxani. Mbimo yi va nga txi wiya mtini ngu ka diendo dawe do khata da wu rumiwa, Paulo ni Barnabhasi ‘va vekile madhota masoni ka otshe mabanza, ni ku va sanzeka manza ni ku va khongelela ni ku ti tona sakudya, ve va veka manzani ka Mkoma, awu va nga kholwa kwakwe.’ (Mithumo 14:23) Msana ka malembe, Paulo a bhalete Titosi atxi khene: “Ni ku site kheyo Kreta, kasiku u txi sala u txi lulamisa ti ti fanelako kululamiswa, ni kuveka madhota a vathangeli ka txidhoropana txihi ni txihi, madingano ni ti ni nga ku gondisa.” (Titosi 1:5) Timoti nene a nga maha maendo o tala ni mpostoli Paulo, ti woneka ati ningilwe wutixamuleli wu wu fanako. (1 Tim 5:22) Ti ha kubasani ti to siavelo soneso si txi mahwa ngu va woneleli va va endelako mabanza i si nga ngu vapostoli mwendo madhota a Jerusalema.
Ngu kuya ngu m’bhalo wuwa, Mmidi wu wu Fumako wa Tifakazi ta Jehovha wu txitxile mamahelo o veka madhota ni malanda a wuthumeli. Ku khukhela ngu 1 ka Setembro wa 2014, siavelo soneso si mahiswa tiya: Mowoneleli wa txigava a xolisisa kha kwati avele madhota ma nga wona ku va faneleka. Ka divhiki di a endelako dibanza, ene a lava kuziva vanathu va va fanelekako ngu ku thuma navo thembweni ngako ti txi koteka. Msana kova a di bhute ni madhota a di banza donedo ngu sileletelo sa kona, muwoneleli wa txigava a ni wutixamuleli wo veka didhota mwendo dilanda da wuthumeli ka txigava txakwe. Ngu nzila yoneyo nathu hi thumisa mamahelo ale a dilembe dizana do khata.
Ngu wuhi mthumo wa mwani ni mwani wu a patekako ka mhaka yoneyo? Mbimo yotshe “txithumi txo thembeka na txi di ni wutxhari” txi ni wutixamuleli wo dyisa tinvuta. (Mat 24:45-47) Eto ti pata kumaha wuxolisise wa mibhalo, ngu ku vhunwa ngu moya wo basa, ti to txi mana matshina a milayo ya Bhiblia aya ma kombisako ati dibanza di fanelako ku zumbisa tona. Txithumi txo thembeka na txi di ni wutxhari txi veka votshe va woneleli va sigava ni vanathu va komisawu ya didhavi. Komisawu ya didhavi yi ningela txivhuno ti to sileleto si thumiswa. Mmidi wa madhota wu ni wutixamuleli wo wonisisa kwati to vanathu va va vasawulako va hetisisa tifanelo ta mu ka Bhiblia ti to ve amukela txiavelo ka dibanza da Txizimu. Muwoneleli mwani ni mwani wa txigava, ani wutixamuleli wo wonisisa kha kwati ngu mkombelo ava va nga kombiswa ngu madhota ti to va faneleka ni ku sunga ku va veka kota madhota.
Lavetela tithomba ta moya
w89-T 15/5 31 ¶5
Tixamulo ta siwotiso sa vagondi
Ene a si tumelelani ni ku poyilwa ngu mhaka ya lixaka ni ditiko da Kreta. Hi nga kholwa toneto nguko Paulo a txi tiziva ti to Kreta ku ti ni Makristu a manene aya Txizimu txi nga ma sawula ngu kuthumisa moya wa txona wo basa. (Mithumo 2:5, 11, 33) Ku ti ni Makristu aya ma nga ti ti ningetete o enela ti to me maha dibanza ka “didhoropa dimwani ni dimwani.” Hambiku Makristu oneyo i nga si nga vathu vo hetiseka, hi nga themba ti to i si nga vathu va makuho va timbiti ni wukara; i ti ku vo hanyisa eto, va si na ku amukelwa ngu Jehovha. (Vafilipiya 3:18, 19; Mtuletelo 21:8) Ngu ha ku fanako ni nyamsi ka matiko otshe, Kreta ku ti ni vathu va va nga txi henya ngutu ngu kuwona vathu va mahanyelo o biha, a va va nga ti tsakela ku engisa didungula da Wukristu.—Ezekhiyele 9:4; fananisa ni Mithumo 13:48.
w08-T 15/10 31 ¶5
Timhaka ta hombe ta di papilo adi diyako ka Titosi, Filimoni ni ka va Vahebheru
15, 16—Ngu kutxani Paulo a sa kombela Filimoni ti to e txhatxha Onesimu? Paulo a txi lava ku ti ningetela ngutu ka mthumo wakwe wo ‘txhumayela mfumo wa Txizimu ni kugondisa ngu ta Mkoma Jesu.’ Ngu toneto ene a langile kuambi ti beta ka timhaka ta ditiko to fana ni wukhumbi.—Mithumo 28:31.
19-25 KA AGOSTO
TITHOMBA TA MU KA DIPSWI DA TXIZIMU | VAHEBHERU 1-3
“Randa wululami, u venga wubihi”
w14-T 15/2 5 ¶8
Dhumisani Kristu, Mkoma wa wudhumo!
Jehovha a vekile Mwanana wakwe kota Mkoma wa Mfumo wa Wumesiya ngu 1914. Aku ndonga yakwe ya wukoma i ku ‘ndonga ya kululama,’ ti kombisa ti to ku nava ni wululami ni kurula ka mfumo wakwe. Wukoma wakwe wa fanela nguko ‘Txizimu njiluvelo txakwe.’ Tiwombako to Jehovha makhato a wukoma wakwe. Hahanze keto, txiluvelo txa Jesu “txi tsani kala kupinduka.” Ina khu tsaki ngu kuziva ti to u thumela Jehovha hahatshi ka mfumo wu wu fumwako ngu Mkoma wu a nga sawulwa ngu Txizimu?
w14-T 15/2 4-5 ¶7
Dhumisani Kristu, Mkoma wa wudhumo!
Lera Masalmo 45:6, 7. Ngu mhaka ya lirando la hombe ali Jesu a ku nalo ngu wululami ni mhaka ya livengo ali a ku nalo ngu wubihi, Jehovha a sawute Jesu ti to eva Mkoma wa Mfumo wa Wumesiya. Jesu a ‘sawulekisilwe ngu mafura hagari ka “majaha kuloni,” i ku vafumeli va liveleko la Dhavhidha. Ngu nzila yihi? Txo khata, Jesu a sawutwe ngu Jehovha a pune. Txa wumbidi, Jesu a sawutwe kota Mkoma ni Mphaxeli wa Hombe. (Mas. 2:2; Vaheb. 5:5, 6) Txa wuraru, Jesu kha sawulekiswa ngu mafura kambe ngu moya wo basa, ni ku mfumo wakwe hi nga wa ha mafuni kambe mbwa nzumani.
Lavetela tithomba ta moya
it-2-T 382 ¶1
Txifananiso
Ina mbimo yotshe Jesu a kombisile tifanelo ta Jehovha ngu mpimo wo fana?
Matewula a Txizimu, awu ngu kutsimbila ka mbimo a ngava Jesu, njifananiso txa tate wakwe. (2 Vak 4:4) Aku Txizimu txi nga ti gela ene mbimo yi txi nga womba tiya: “He maheni m’thu ngu txifaniso txathu,” ti kombisa ti to Mwanana a ti fana ni Tate kukhukhela e mahwa. (Gen 1:26; Joh 1:1-3; Vakl 1:15, 16) Mbimo yi a nga ti ha mafuni a ti hetisekile kota m’thu wa nyama, a kombisile tifanelo ta Jehovha ngu mpimo wu wu fanako ni wa tate wakwe, ngu kuya ngu wusikoti wa m’thu wa nyama, ngu toneto kowombwako to: “Awule a ni wonako, a woni Tate.” (Joh 14:9; 5:17, 19, 30, 36; 8:28, 38, 42) Kufana koneko, kutshumete ku kombiswa mbimo yi Jesu a nga wuswa eya nzumani kota m’thu wa moya e ningwa “mtamo wotshe nzumani ni ha mafuni,” ngu Tate wakwe Jehovha Txizimu. (1 Ped 3:18; Mat 28:18.) Aku Txizimu txi nga ‘guleta ngutu’ Jesu, konku a kombisa wudhumo wa Jehovha ngu mpimo wo pinda wule wa mbimo yi a nga si nze kuta ha mafuni. (Vaf 2:9; Vaheb 2:9) Konku ene “Njikombiso txa . . . Txizimu.”—Vaheb 1:2-4.
it-1-T 491 ¶2
Nzumani
Mapswi ya ma ku ka Masalmo 102:25, 26 ma kombetela ka Jehovha, kambe mpostoli Paulo a ti makombetela ka Jesu Kristu. Eto nguko, Mwanana wa matewula wa Txizimu, i ti Muemeli wakwe ka wuaki wa silo sotshe ha mafuni. Paulo a kombisa kuhambana ka Jesu ni wuako, awu Txizimu ngako txi txo tilava txi ngo “wupeta kufana ni siambalo” txi wu veka didhawani.—Vaheb 1:1, 2, 8, 10-12; fananisa ni 1 Ped 2:3.
26 KA AGOSTO–1 KA SETEMBRO
TITHOMBA TA MU KA DIPSWI DA TXIZIMU | VAHEBHERU 4-6
“Maha totshe ti to u wulela kuhumulani ka Txizimu”
w11-T 15/7 24-25 ¶3-5
Nji txani kuhumula ka Txizimu?
Silo simbidi si hi maha hi tumela to ngu dilembe dizana do khata i ti ngadi ditshiku da wutxhanu ni mambidi. Txo khata, wona mapswi aya Jesu a nga gela valala va va nga ti mu sola va txi a maha mthumo ngu Sabbata. Mkoma a va gete tiya: “Tate wangu a ngadi a txi thuma ni konkuwa, nanani na thuma.” (Joh 5:16, 17) A ti la kuwomba txani? Phela Jesu a ti lumbetwa kuthuma ngu Sabbata. Se ngu kuwomba to “Tate wangu a ngadi a txi thuma,” a ti lamba kulumbetwa kule. Jesu a txi womba tiya: ‘Ani ni Tate wangu hi ka mthumo wumwewo. Aku Tate a thumako ngu Sabbata yakwe ya timiliyoni ta malembe, ta fanela ku nani ni thuma ngu Sabbata yimweyo ni nene.’ Ngu nzila yiya, Jesu a ti ti veka ha kubasani ti to mbimo yi a nga ti ha mafuni i ti ngadi ditshiku da wutxhanu ni mambidi da Txizimu mayelana ni mafu, i ku Sabbata ya hombe yo humula ya Txizimu.
Txikombiso txa wumbidi ngu txi txi nga wombwa ngu mpostoli Paulo. Mbimo yi a nga womba ngu ta dibhuku da Genesisi 2:2 mayelana ni Kuhumulani ka Txizimu, a bhate tiya: “Athu hi kholwako hi na wulela kuhumulani.” (Vaheb. 4:3, 4, 6, 9) Eto ti kombisa to ngu mbimo ya Paulo i ti ngadi ditshiku da wutxhanu ni mambidi. Yi ndina gwita ditshiku mbimo yoneyo yo humula?
Ti to hi mana xamulo ya txiwotiso txiya, hi fanete kukhumbula txikongomelo txa ditshiku da wutxhanu ni mambidi. Genesisi 2:3 ya txi txhamusela: “Txizimu txi katekisile ditshiku da wutxhanu ni mambidi, txi txi di sawulekisa.” Ditshiku diya di sawulekisilwe, mwendo kuvekwa didhawa ngu Jehovha ti to e hetisisa Txikongomelo txakwe. Txikongomelo txonetxo, ngu maha mafu meva paradhise, kuzumba vathu vo lulama ava va mu engisako kumweko ni ku ve khatalela sotshe si no maneka ka paradhise. (Gen. 1:28) Nga txikongomelo txiya, Jehovha Txizimu kumweko ni Jesu “Mkoma kambe wa yona Sabbata” va ‘thumelako ka txona.’ (Mat. 12:8) Ditshiku do humula da Txizimu di na simama kala Txikongomelo txa txona ngu ditshiku diya txi hetiseka da magwito msana ka Mfumo wa Kristu wa Digidhi da Malembe.
w11-T 15/7 25 ¶6
Nji txani kuhumula ka Txizimu?
Txizimu txi di txhamusete kwati Adhamu ni Eva txikongomelo txakwe, kambe vona kha va tilava kuseketela ti to txi hetiseka. Ngu toneto, Adhamu ni Evha ive vathu vo khata kulamba kuengisa Txizimu. Ku ni vathu va timiliyoni kuta hoka konku ava va si engisiko. Hambi vathu va Txizimu txi nga ti va sawute, i ku ditiko da Israyeli, mbimo yo tala va si engise. Ngu toneto, ta pfala aku Paulo a nga womba ti to Makristu ma fanete kutiwonela ti to ma si fani ni Vaisrayeli va kale. A bhate tiya: “Ngu toneto, he khutaleleni kuya wulela kona kuhumulaniyo, kasiku ni wammweyo a si wi, ngu mhaka ya kukanyisa ko fana ni kwawe.” (Vaheb. 4:11) Wona ti to Paulo a womba-womba ngu kwa mbi engisa ni kuwulela kuhumulani ka Txizimu. Ti hi gondisa txani? Ngako hi si engisi Txizimu ni sikongomelo sakwe, ina kha hi nambi wulela kuhumulani ka Txizimu? Xamulo ya txiwotiso txiya nja lisima ngutu kwathu, hi na yi wona khe masoni. Kambe konku, he woneni ati hi nga ti gondako ngu txikombiso txo biha txa Vaisrayeli.
w11-T 15/7 28 ¶16-17
Nji txani kuhumula ka Txizimu?
Nyamsi wa ditshiku Makristu kha ma londiseli tigondo ta Mlayo ti to me mana wutomi wo mbi guma. Mapswi ya Paulo a nga bhalela Vaefesu ma kongomile: “Nguko mi hanyisilwe ngu mhaka ya tikateko ni kukholwa. Aniko hi nga ta kumahwa ngu mtamo wathu, njiningo txa Txizimu. Hi nga so huma mtamoni kwanu, kufela ku ni wammweyo a si ti kulisi.” (Vaef. 2:8, 9) Se, Makristu ma nga wulelisa kutxani kuhumulani ka Txizimu? Jehovha a vekisile ditshiku do humula ti to e hetisisa txikongomelo txakwe ngu mafu. Hi nga seketela mwendo kuwulela kuhumulani ka Jehovha ngu kuthuma ni kuengisa totshe mayelano ni txikongomelo txakwe, mbimo yi hi gelwako ngu sengeletano yakwe.
Se, hi txi leka kuengisa silayelo sa mu ka Bhiblia hi ningwako ngu txithumi txo thembeka na txi di ni wutxhari hi kombisa to hi lava ku ti mahela tathu, eto ti womba to kha hi tsimbitisani ni txikongomelo txa Txizimu. Eto ti nga veka wuxaka wathu ni Jehovha ha phangoni. Ka gondo yi yi londiselako, hi na wona siemo asi si ngo gwesa vathu va Txizimu. Ni kuwona nzila yi kuengisa mwendo kwa mbi engisa ti nga kombisako to hi nga wulela kuhumulani ka Txizimu mwendo hi nge wuleli.
Lavetela tithomba ta moya
w16.09-T 13
Tixamulo ta siwotiso sa vagondi
Ngu kuya ngu Vahebheru 4:12, i txani “Dipswi da Txizimu” a di di ‘hanyako, na di ti ni mtamo’?
▪ Mhaka yi kombisa ti to Paulo a ti womba-womba ngu didungula da Txizimu mayelana ni sikongomelo sa txona. Eto ti pata ati ti nga bhalwa mu ka Bhiblia kumweko ni ti Txizimu txi nga tiwomba kambe ti nga mbi bhalwa.
Mabhuku athu ma thumisa ngutu Vahebheru 4:12 ti to me kombisa to Bhiblia yi ni mtamo wo txitxa wutomi wa vathu. Kambe ti nga tsakisa kuziva ati Paulo a nga tiwomba msana ni masoni ka ndimana yiya. Paulo a ti kuzeta Vahebheru ti to ve tsimbitisana ni txikongomelo txa Txizimu. Singi sa sikongomelo sa kona si ti bhatwe mu ka Bhiblia. Paulo a thumisile txikombiso txa Vaisrayeli ava va nga ti khulutwe ka wukhumbi khe Egipta. Vona va ndi na wulela ka ditiko da txithembiso adi di “khulungako masi ni wulombe.” Ka ditiko diya, va ndina mana kuhumula ka ditshuri.—Eks. 3:8; Dhewut. 12:9, 10.
Eto ti txi maha txienge txa txikongomelo txa Txizimu. Kambe Vaisrayeli kha va engisa ni ku kha va kombisa likholo; ngu toneto, vangi vawe kha va wulela kuhumulani koneko. (Mit. 14:30; Jox. 14:6-10) Kambe Paulo a wombile to ku ngadi ni “txithembiso txa kuwulela kuhumulani ka Txizimu.” (Vaheb. 3:16-19; 4:1) “Txithembiso” txiya njienge txa txikongomelo txa Txizimu atxi txi nga bhalwa ka Bhiblia. Kufana ni Makristu a va Hebheru, nathu hi nga gonda ngu txikongomelo txiya hi tshumela hi txi seketela. Ti to e kombisa to txithembiso txiya txi ta ngu mu ka Bhiblia, Paulo a kombisile M’bhalo wa Genesisi 2:2 ni Masalmo 95:11.
Ha tsaka kuziva to ku ni “txithembiso txa kuwulela kuhumulani ka Txizimu.” Ha kholwa ka ti Bhiblia yi hi thembisako, to ta koteka kuwulela kuhumulani koneko. Se hi kombisile to ha tilava kumaha eto, kambe kha ha maha ngu kulondisela Mlayo wa Mosi mwendo ngu kumaha tatinene basi, kambe ngu kukombisa likholo ka Txizimu ni kuseketela txikongomelo txakwe. I si ngathu dwe, ku ni timiliyoni ta vathu va va gondako Bhiblia se ve wona txikongomelo atxi Txizimu txi nga hi gela. Vangi va kona va txitxa mahanyelo awe ve kombisa likholo se ve bhabhatiswa kota Makristu. Totshe eto ti kombisa to “dipswi da Txizimu da hanya, di ni mtamo.” Totshe ti Txizimu txi nga ti txhamusela ka Bhiblia mayelana ni makungo a txona, ti txitxile wutomi wathu ni ku ti na simama ti wu txitxa.
it-2-T 24¶5
Themba
Themba yiya ya wutomi wo mbi guma ni ya kwa mbi sina, ya vale va “nga mana txiavelo” (Vaheb 3:1) njo tsana ni ku hi nga yi themba. Yona yi seketetwe ka silo simbidi asi Txizimu txi ngo mbi thuka txi hemba, i ku txithembiso ni kuxambanya ka txona, ni ku txithembiso txi ngu kona ha ka Jesu awu konku a ku ni mmidi wu wu no mbi thuka wufa nzumani. I ngu toneto kuwomba-wombwako ngu themba yiya kota: “Hangi ya moya, ayi i ku ya kutsana ni kuthembeka, ayi yi dolako nguwo ya txitshingelelo ya dithepele yi txi wulela mndani ka txiluvelo txa Txizimu. Ahawa a nga wulela kona Jesu ngu mhaka yathu, kota mthangeli, e mahwa Mphaxeli wa Hombe, madingano ni mlayo wa Melkizedheki.”—Vaheb 6:17-20.