Rinzela magwito ka mafu yawa o biha u di tsani

I si nga kale kutimisela ka Jehovha ngu mafu yawa ku na guma. Wukhongeli wa makuho wu na fuviswa; matiko ma na tshangana kasi ku dhumela vathu va Txizimu; ni ku Jehovha a na fuvisa vathu vo biha ka Armagedhoni. Makristu ma si verete ngu o bhilivila simahakalo soneso so tsakisa.

Ditshuri ti to kha hi ti zivi totshe ati ti no maheka ka xanisa ya hombe. Ngu txikombiso, kha hi ti zivi ngu ku kongoma ti to i mbimo muni yi no khata. Kha hi ti zivi ati vakoma va no ti womba kasi kuwukela wukhongeli. Kha hi ti zivi ngu ku kongoma ti to ku wukelwa ka vathu va Txizimu ku na teka mbimo muni ni ti to va na mahisa kutxani. Ni ku kha hi ti zivi ti to Jehovha a na mahisa kutxani kasi kufuvisa vabihi ka Armagedhoni.

Kambe Bhiblia yi hi ninga otshe madungula ya ma lavekako kasi ku hi rinzela wumangwana ngu txibindi hi di tsani. Ngu txikombiso, ha ti ziva ti to hi hanya ka timbimo ta magwito ta “masiku a kugwitisa.” (2 Tim 3:1) Ha ti ziva ti to ku wukelwa ka wukhongeli wa makuhu ku na “komiswa” kasi ku wukhozeli wa ditshuri wu si loviswi. (Mat 24:22) Ha ti ziva ti to Jehovha a na hulukisa vathu vakwe. (2 Ped 2:9) Ni ku ha ti ziva ti to a wu Jehovha a nga msawula kasi ku fuvisa vabihi ni ku hulukisa dibutho da hombe ka Armagedhoni mbwo lulama ni ku a ni mtamo.—Mtu 19:11, 15, 16.

Ngu mhaka ya simahakalo asi si tako vathu va na “tsivala ngu kuthava”. Hambi keto athu kha hi nambi ta thava. Athu ha ti ziva ti Jehovha a nga ti maha kasi ku hulukisa malanda akwe ka mbimo ayi yi nga pinda. Kulera madungula ni ku womba-womba hi tshumela hi alakanyisisa ngu ona ti hi maha hi ‘gula maso hi wona txitimwi’ hi tsaniseka ti to kuhanyiswa kwathu ku hafuhi.—Luk 21:26, 28.