MAHANYELO A WUKRISTU
Zama kuziva mawonelo a Txizimu
Hi lava kutsakisa Jehovha ka totshe ti hi ti mahako. (Mav 27:11) Kasi ku hi maha toneto, ti lava hi maha sisungo asi si tsimbitisanako ni mawonelo a Jehovha hambi ku si nga ni mlayo wa ha kubasani awu wu hi kongomisako ka mhaka yoneyo. Nji txani txi nga hi vhunako kumaha toneto?
Simama u va ni txiemiso txo u gonda Bhiblia. Mbimo yimwani ni yimwani yi hi lerako Bhiblia, ti fana ni loko hi txo womba-womba ni Jehovha. Hi nga ziva nzila yi Jehovha a wonako ngu yona tomaha ngu kuwona nzila yi a nga thumisana ngu yona ni vathu vakwe hi tshumela hi xolisisa sikombiso sa va va nga maha tatinene ni sa va va nga maha to biha masoni kwakwe. Ngako hi txi lava kumaha txisungo, moya wo sawuleka wu nga hi khumbutisa timhaka ta lisima ni matshina a milayo aya hi nga ma gonda ka Dipswi da Txizimu.—Joh 14:26.
Maha wuxolisisi. Ngako u txi lava kumaha txisungo ti wotise tiya: ‘Ngu wuhi mbhalo mwendo didungula da mu ka Bhiblia adi di nga ni mahako ni pfisisa ti to Jehovha a tipfisa kutxani ngu mhaka yiya?’ Maha mkombelo u kombela txivhuno ka Jehovha ni ku maha wuxolisisi ka mabhuku aya ma manekako ngu lidimi lako kasi ku u ma na matshina a milayo ya mu ka Bhiblia ni ti u nga ma thumisisako tona ka txiemo txako.—Mas 25:4.
XALELELA VHIDHIYO AYI YI KU: HI FANETE KU “TUTUMA NGU KUTSANISELA”—DYANA SAKUDYA SA DIHANYO, U GWITA U XAMULA SIWOTISO ASI SI LONDISELAKO:
Ngu tihi ti mphya wu u nga m’wona ka vhidhiyo a wonisanako nato?
U nga yi thumisisa kutxani farameti yo maha wuxolisisi ti to yi kuvhuna kuwonisana ni to fana ni ti mphya wu a nga wonisana nato?
Hi nga wuyeliswa kutxani ngako hi txi ti ninga mbimo yo maha wuxolisisi ni kumaha gondo ya m’thu apune yi yi no hi vhuna kumaha sisungo sasinene?—Vaheb 5:13, 14