Mareferensiya a txibhukwana txa mitshangano ya Mahanyelo a Wukristu
© 2024 Watch Tower Bible and Tract Society of Pennsylvania
6-12 KA JANEIRO
TITHOMBA TA MU KA DIPSWI DA TXIZIMU | MASALMO 127-134
Vavelei simamani mi khatalela kwati vanana vanu
Ninga lisima wukhalo wako ha mwayani ka Jehovha
Jehovha a ningile vathu wusikoti wo va ni vanana e tshumela e va ninga wutixamuleli wo ve va gondisa ti to ve mranda ni ku mthumela. I di ti to awe u mveleki ina wa yi bonga ningo yiya yo sawuleka? Hambiku Jehovha a nga ninga wusikoti wo tala ka tingelozi, kambe kha ya ti ninga lungelo yo veleka vanana. Ngu toneto vaveleki va fanete kuninga lisima lungelo yiya yo wunja vanana. Vaveleki va ningilwe lungelo yo sawuleka yo wunja vanana vawe ngu ku va laya ngu “sileleto ni tigondo ta Mkoma.” (Vaef. 6:4; Dhewut. 6:5-7; Mas. 127:3) Kasi kuvhuna vaveleki Jehovha ngu ku thumisa sengeletano yakwe wa humisa sithumiswa so tala asi si nga seketelwa mu ka Bhiblia so fana ni ma vhidhio wutxenje ni simwanyani si manekako ka site yathu. Ti ha kubasani ti to Tate wathu wa nzumani ni mwanana wakwe va khatala ngu vanana vathu. (Luka 18:15-17) Ngako vaveleki va txi themba Jehovha ve maha ti va ti kotako to ve kulisa vanana vawe, Jehovha wa tsaka. Vaveleki vonevo va ninga mkhanjo wo vanana vawe ve va txienge txa mwaya wa Jehovha ngu ha ku si gumiko.
Vaveleki—Gondisani vanana vanu kuranda Jehovha
Ziva kwati vanana vako. Ka Masalmo 127, vanana va faniswa ni tingove. (Lera Masalmo 127:4.) Phela tingove ti nga mahwa ngu silo so hambana, ni ku ti nga hambana ngu wuhombe, se vanana vako votshe va hambana. Se vaveleki va fanete ve wona to va nga va gondisisa kutxani mmweyo ngu mmweyo. Ka ditiko da Israel ku ni mpatwa wu wu nga sikota kugondisa vanana vawe va vambidi kuthumela Jehovha, vona va womba tiya: “Hi ti gondela mmweyo ngu mmweyo.” Hambi keto, ti na lava ku vaveleki ve wona ku va nga gondela mmweyo ngu mmweyo mwendo va nga vapata votshe kani.
Tithomba ta moya
it-1543
Mindonga ayi yi wombwako ka Biblia
M’bhali wa Masalmo a wombawombile ngu ti muolivha wu nga zumbisa tona mbimo yi a nga ti thembisa tiya ka vale va thavako Jehovha: “Vanana vako, va na fana ni makhukhu a muolivha, ma randelako meza yako.” (Mas 128:1-3) Makhukhu o wilwa ka muolivha wa hombe makhambi a mangi ma thumiswa kasi kuphaya mindonga yimwani. Hahanze keto, ka miolivha ayi yi i ku ya kale yi di phayilwe, ti nga maha mikoloti ta wona ti thunga, se wuya wu anda ni kusimama wu txi hanya. Se vanana, ava va fanako ni mindonga ayi yi nga thunga ka mikoloti, va ndi na randela tate ve maha txienge txawe kasiku mwaya wu va ni litsako.
13-19 KA JANEIRO
TITHOMBA TA MU KA DIPSWI DA TXIZIMU | MASALMO 135-137
“Txizimu txathu txi txitimwi ka sotshe sizimu”
it-2661 ¶4-5
Mtamu, Mithumo yo xamalisa
Txizimu txa kontrolara mitamu ya mtumbuluko ngu tinzila to hambana. Ti hakubasani ti to kasi kukombisa to ene Txizimu txa ditshuri, Jehovha wa kontrolara mitamu ayi a nga yi vanga ni ku a maha toneto ngu nzila yi yi tsimbitisanako ni ditina dakwe. (Mas 128:1-3) Hambiku ditambo, m’txima, maplaneta, tinyeleti, ati ti mahako ti to kuva ni moya ni ku na mati ni simwani simahakalo si londetako mlayo wa mtumbulko ni ku sitoto si mahako ntxawa ni sinyana si purumako si ya ka wukhalo wu mwani, atiya ti sa na kuenela kasi kubasisa ditina da Jehovha ka wukelwa ni ka wukhozeli wa makuhu.
Hambiketo, Jehovha Txizimu a ndi na maha ti to sivangwa sa mtumbuluko si ningela wufakazi wa wuhombe wakwe nguku si thumisa kasi kuhetisisa sikongomelo so kari, to pinda ati a nga si mahela tona ngu mbimo yi ene a ndi no yi sawula. Mbimo yi simahakalo so toloveleka so fana ni lisani, txihuhuri mwendo simahakalo simwani so fana ni soneso si humelelako kasi kuhetisisa wuprofeti wa Jehovha, si maheka ngu nzila yo xamatisa kasi kukombisa mtamu wakwe. (Fananisa ni 1Vafu 17:1; 18:1, 2, 41-45.) Kambe ka makhambi o tala, simahakalo soneso sa xamatisa ngu wuhombe mwendo mtamu wa sona (Eks 9:24), hambi mbimo yi si humelelako ngu nzila yo kwa mbi toloveka mwendo mbimo yi hi nga mbi yi emela.—Eks 34:10; 1Sam 12:16-18.
Lirando lo mbi guma la Jehovha li ku wuyelisa kutxani?
Ngako hi txi khumbula ti to Jehovha wuthavelo wathu, hi na tipfa hi di vhikelekile. Hambiketo ku timbimo ti hi no tipfa hi di karatekile ngutu, ti hi karatela kusimama hi ya masoni. Ngu tihi ti Jehovha a no hi vhuna ngu tona ka timbimo toneto? (Lera Masalmo 136:23.) Ene a na wukarela ngu mawoko akwe e hi seteta e hi vhuna ku hi simama hi ya masoni. (Mas. 28:9; 94:18) Hi wuyeliswa kutxani: Kuziva ti to Jehovha a na hi vhuna mbimo yotshe ti hi khumbutisa ti to ha wuyelwa ngu tinzila timbidi i ku tiya: Yo khata, mbimo yotshe hi ni ko ya kona ti si nga ni mhaka ni mu hi hanyako kona. Ya wumbidi, mbimo yotshe Jehovha wa hi khatalela.
Tithomba ta moya
it-11248
Jah
Dipswi adi di ku Jah, ngu mtolovelo da thumiswa ka timhaka ati ti gwesako mbilu to dhumisa ni ka tindando, ka mikombelo ni sikombelo, ni ku ngu mtolovelo da manwa ka timhaka ati ti tsimbitisanako ni kuxula, kukhululwa mwendo ka siemo so kombisa kuxonipha mtamu wa Txizimu. Wona sikombiso simwani sa mu di thumiswako kona dipswi diya. Mapswi a ya ma ku: “Dhumisani Jah” (Haleluya) ma humelela ka Masalmo kota mapswi o dhumisa Txizimu, ma humelelako ka dikhambi do khata ka dibhuku da Masalmo 104:35, Tradução do Novo Mundo. Ka Masalmo mamwani ma nga humelela makhatoni (Mas 111; 112, NM), makhambi mamwani ma humelela ka txienge txo kari txa masalmo (135:3, NM), makhambi mamwani ngu magwito (Mas 104, 105, 115-117, NM), kambe ngu mtalo ma humelela makhatoni mwendo magwito (Mas 106, 113, 135, 146-150, NM). Ka dibhuku da Mtuletelo, sivangwa sa nzumani sa dhumisa Jehovha ngu kuthumisa mapswi awa makhambi a mangi.—Mtu 19:1-6.
Ka makhambi mamwani aha dipswi “Jah” di humelelako, di kombetela ka tindando ni sikombelo so dhumisa Jehovha. Ku ni ndando ya kukhululwa ayi yi nga embelelwa ngu Mosi. (Eks 15:2) Ka mapswi aya ma nga bhalwa ngu Isaya, a patile mapswi a mambidi aya ma ku: “Jah Jehovha.” (Isa 12:2; 26:4) Mbimo yi Ezekiya a nga ti dhumisa Jehovha ngu tindando msana ka kuva adi hanyisilwe ka malwati ngu nzila ya txidewukiso, ngu kutsaka ene a thumisile makhambi a mangi dipswi Jah. (Isa 38:9, 11) Ku ni kuhambana ka vafi ava va si tikotiko kudhumisa Jah ni va va nga tiemisela kuhanya ngu nzila ayi yi no m’dhumisa. (Mas 115:17, 18; 118:17-19) Masalmo mamwani ma kombisa kubonga ngu nzila ya mkombelo ngu konaha ka kukhululwa, kuvhikelwa ni kukawukwa.—Mas 94:12; 118:5, 14.
20-26 KA JANEIRO
TITHOMBA TA MU KA DIPSWI DA TXIZIMU | MASALMO 138-139
U nga leke dizowa di kutsivela kuxamula mitshanganoni
Dhumisa Jehovha hagari ka msengeletano
Ina awe wa wika msana u txi lava kuguleta diwoko to u xamula? I di toneto, khu nga wekha. Ditshuri ngu ti to wungi wathu hotshethu ha thavanyana. Na u si se lwisana ni txikarato txiya, khata ngu kuwona ti to nji txani txi kuvhalelako. Ina u thava ti to u na guleta diwoko u gwita u divala ti u lavako kuwomba mwendo u thava ku na xamula ta walo? Ina u thava ti to xamulo yako yi na palwa ngu ya vamwani? Phela kuthava ko ngeto ku nga va txikombiso txa txinene. Ku nga kombisa ti to wa tiveka hahatshi ni ku u wona vamwani va di gulekile ku kupinda. Jehovha wa tsaka ngu kutiveka hahatshi. (Mas. 138:6; Vaf. 2:3) Kambe ene a lava ti to hi m’dhumisa ni kutsanisa vanathu mitshanganoni. (1 Vat. 5:11) Ene wa kudhunda, a na kuninga txibindi atxi u txi lavako.
Ahi tsanisaneni
Kasiku u vhuneka wuseta tinzila ti ti nga kombiswa ka direvhista da Muwoneleli. Ngu txikombiso, lulamisela kwati. (Mav. 21:5) Ngako u txi di ziva kwati didungula donedo ti na kuhehukela kugula diwoko ti to u xamula. Ningela xamulo yo koma. (Mav. 15:23; 17:27) Xamulo yo koma yi nga ku vhuna to u si thavi ngutu. Xamulo yoneyo yo koma ti nga maha vanathu ti va hehukela ku yi pfisisa kupinda xamulo yo lapha ayi yi ku ni titxhamuselo ta tingi. Ku ningela xamulo yo koma ngu mapswi ako ti na kombisa to u lulamisete kwati ni ku wa di pfisisa kwati didungula donedo.
Tithomba ta moya
it-1862 ¶4
Divalelo
Hahanze keto, kota mkristu kudivalela ngu ti ti lavekako ti singa ni mhaka ni makhambi aya vamwani va nga hi henyisako. (Luk 17:3, 4; Vaef 4:32; Vakl 3:13) Txizimu kha txi divaleli avale va si divaleliko vamwani. (Mat 6:14, 15) Hambi i di ti to txionho atxi a nga txi maha txa sunga ti to “muonhi” e thaviswa dibanzani, ngu kutsimbila ka mbimo m’thu eneyo a nga divalelwa ngako atxi kombisa kutisola. Ka mbimo yoneyo votshe dibanzani va nga kombisa lirandu lawe nguko mu amukela. (1Vak 5:13; 2Vak 2:6-11) Kambe makristu kha ma fanela kudivalela avale va mahako sionho khakwenye va si tisoli. Vathu vonevo va hunduka valala va Txizimu.—Vaheb 10:26-31; Mas 139:21, 22.
27 KA JANEIRO KALA 2 KA FEVEREIRO
TITHOMBA TA MU KA DIPSWI DA TXIZIMU | MASALMO 140-143
Hanya ngu kutsimbitisana ni mikombelo yako
“Riya nzeve u engisa mapswi a titxhari”
Wona txivhuno i di txikombiso txa lirando la Jehovha. Jehovha a la ti i ku ta tinene kwathu. (Mav. 4:20-22) Mbimo yi a hi kawukako ngu kuthumisa Bhiblia, mabhuku athu mwendo mwanathu wu a nga vitwa i nzila yo kombisa to ene wa hi randa. Vahebheru 12:9, 10 yi womba ti to: “Txizimu txa hi laya kasiku txi txi hi vhuna.”
Veka mapimo ka txivhuno i si nga ka nzila yi txi nga ningelwa ngu yona. Mbimo yimwani hi nga tipfa nga nzila yi hi nga ningwa ngu yona txivhuno hi nga yona ya yinene. Ditshuri ti to a wu a ningelako txivhuno a fanete kumaha totshe ti a nga ti kotako kasi ku e txi ningela ngu nzila ya yinene. (Vag. 6:1) Kambe ngako i di athu hi ningwako txivhuno, hi fanete kuveka mapimo ka txivhuno hipune i si nga ka nzila yi txi nga ningelwa ngu yona. Se hi nga ti wotisa tiya: ‘I di to kha ni tsakeli nzila yi txivhuno txi nga ningelwa ngu yona ina ku ni ti ni nga ti thumisako ka txivhuno txonetxo? Ina ni nga leka kuveka mapimo ka tiphazamo ta mwanathu wu a nga ni ninga txivhuno se ni veka mapimo ka txivhuno?’ Hi nga ti komba hi di txharihile ngako hi txi zama kuwona tinzila to thumisa txivhuno txi hi ningwako.—Mav 15:31.
w10 15/3 32 ¶4
Simama u di ni “mbilu yo basa” ka timbimo tiya to karata
Kuxaniswa ngu vakaneti, sikarato sa timali ni malwati sa godholisa mamwani malanda a Txizimu. Makhambi mamwani eto ta gwesa timbilu tawe. Hambi mkoma Dhavhidha a wonisanile ni sikarato soneso. Ene a wombile tiya: “Se moya wangu wa xomuleka mndani kwangu; ni mbilu yangu ya xaniseka khanani kwangu.” (Mas. 143:4) Dhavhidha a si xulisile kutxani sikarato soneso? Dhavhidha atxi zama kukhumbula nzila yi Jehovha a ñolako ngu yona malanda akwe ni nzila yi ene apune a nga ti hulukisilwe ngu yona. Ene atxi alakanyisisa mayelano ni ti Jehovha a nga ti ti mahile ngu mhaka ya ditina Dakwe da hombe. Ene atxi alakanyisisa ngu mithumo ya Txizimu. (Mas. 143:5) Nguha kufanako, kualakanyisisa ngu Mvangi wathu ni ka totshe ati ene a nga ti maha ni ti ati mahako ngu ngathu, ti na hi vhuna kuwonisana ni siduko.
w15 15/3 32 ¶2
Kutxhadha “ka Mkoma”—Ina ti ngadi ti txi vhuna?
Makhambi mamwani u nga tipfa kufana ni nzila ayi Dhavhidha a nga tipfa ngu yona mbimo yi a nga womba tiya: “Mkoma, kuluveta u txi ni xamula, nguko ni gumile mtamo, u nga ni sisele khohe yako.” (Mas. 143:5-7, 10) Ka timbimo toneto, ninga mbimo Tate wako wa nzumani kasiku e kukomba ti to ngu kuhi kudhunda kwakwe ngu ngawe. U nga maha toneto ngu kutivekela mbimo yo lera Bhiblia ni kualakanyisisa ngu ti u ti lerako. Ngu nzila yoneyo, u na ziva ti to ngu yihi milayo ya Txizimu ni kuwona nzila yi txona txi nga vhuna ngu yona vathu va txona ka timbimo ta kale. Nguku muengisa, awe u na tsaniseka ka ti to kuengisa milayo ya txona ngu tona i ku ta tinene.
Tithomba ta moya
it-21151
Vhenenu ya mnyoka
Kufananisa. Kuhemba ni kulumbeta ka vabihi, aku kuonhako nduma ya vamwani kufananiswa ni vhenenu ya mnyoka ayi yi dayako. (Mas 58:3, 4) Kuwombwa tiya mayelano ni valumbeti: “Wuxungu [vhenenu] wo nga wa timamba wu hahatshi ka sisofu sawe,” kufana ni msiha awu wu humesako vhenenu ya mnyoka awu wu kuhahatshi ka txisofu ni ka tixaya ta txitimwi. (Mas 140:3; Var 3:13) Ngako m’thu atxi thumisa lidimi lakwe kasi kuwombawomba to biha, kulumbeta, kugondisa makuhu ni mawombawombelo mamwani o fana ni onewo, lidimi la m’thu eneyo “li tate ngu txhefu yo daya.”—Jak 3:8.
3-9 KA FEVEREIRO
TITHOMBA TA MU KA DIPSWI DA TXIZIMU | MASALMO 144-146
“Va katekile vathu vava, Txizimu i ku Mkoma wawe!”
Tixamulo ta siwotiso sa vagondi
2. Mapswi aya ma nga wusetwa ma tsimbitisana ni yotshe kapitulo ya Masalmo 144. Kuthumiswa ka dipswi “se” ka vhersikulo 12 tikombisa ti to sotshe silo sa sinene asi si nga wombwa ka vhersikulo 12 ni 14 si na manwa ngu avale vo lulama, avale va kombelako ti to Jehovha e va ‘kukhulula ni ku va hulukisa’ ka vabihi (vhersikulo 11). Kutxitxa koneko ka mapfisiselo kutshumela kugwesa vhersikulo 15, konku yi wombawombako ngu timhaka timbidi to fana. Ngu mapswi mamwani, dipswi “va katekile” adi di humelela ngu makhambi mambidi di kombetela ka vathu vamwevo avale “Txizimu i ku Mkoma wawe.” Nda tinene ku ti tekela hamsungo ti to Txihebheru txi si thumisi mapontu ni ma axpa. Ngu toneto, vahunduluxeli va fanete kupfisisa ati ndimana yi wombako tona, va fanete ve ma tekela hamsungo mabhalelo a dipoeziya da Txihebheru, didungula ni tindimana ta Bhiblia ati ti yelanako.
3. Mapswi aya ma nga wusetwa ma tsimbitisana ni mamwani ma vhersikulo a Bhiblia aya ma kombisako ti to Txizimu txi na katekisa ava va no simama va di thembekile. Kutxitxa ka tradhusawu ya dipswi asher, ka tsimbitisana ni themba ayi Dhavhidha m’bhali wa Masalmo 144 a nga ti nayo. Ene a txi kholwa ti to Jehovha a ndi na hulukisa ditiko da Israyeli ka valala se ngu msana e tshumela e va katekisa ngu litsako ni kueneliseka. (Levhi 26:9, 10; Dhewut. 7:13; Mas. 128:1-6) Ngu txikombiso, Dhewuteronome 28:4 yi womba tiya: “Wu na katekiswa muhando wa mndani kwako, ni muhando wa thembweni kwako, ni muhando wa sifuyo sako, i ku marole a tihomu tako, ni sinvutana sa tinvuta tako.” Eto ngu ditshuri ti mahekile mbimo yi mwanana wa Dhavhidha, Solomoni a nga txi fuma. Ku vile mbimo yi Vaisrayeli va nga va ni kurula ni kueneliseka kupinda totshe timbimo. Hahanze keto, ati wu nga ti zumbisile tona wukoma wa Solomoni wu kombisa nzila yi wukoma wa Mesiya wu no ta va ngu yona.—1 Vafu. 4:20, 21; Mas. 72:1-20.
Tsanisa themba yako kota Mkristu
Themba yo ta mana wutomi wo mbi guma i ningo yo sawuleka yi tako ngu ka Txizimu. Hi wu emete ngu maso o Bhilivila wumangwana wuwa wo tsakisa awu hi tsanisekako to wu na hoka. Themba yiya yi fana ni hangi ayi yi hi tsanisako kasi ku hi wonisana ni sikarato, hi tsanisela kuxaniswa hambi kuwonisana ni lifo. Ni ku, themba yi tshumela yi thuma kota txigoko atxi txi vhikelako mapimo athu kasi ku hi vayilela to biha kambe hi namarela ka ti i ku ta tinene. Themba yathu ayi yi nga seketelwa ka Bhiblia, ya hi tshuketisa ka Txizimu ni ku yi kombisa lirando la hombe a li Txizimu txi ku nalo ngu ngathu. Ha wuyelwa ngutu ngako hi txi simama hi va ni themba yo tsana.
Ka dipasi di a nga bhalela Varoma Paulo a va kuzetile tiya: “Tsakani kuthembani kwanu.” (Var. 12:12) Paulo a txi tsaka nguko a di ni kutsaniseka ka ti to ngako a txi simama a di thembekile a ndina mana wutomi wo mbi guma nzumani. Nanathu hi nga tsaka ngu themba yathu, nguko ha tsaniseka to Jehovha a na hetisisa sithembiso sakwe. Mbhali mwani wa Masalmo a ti khene: “A katekile wule themba yakwe yi ku ka MKOMA, Txizimu txakwe, . . . a xayisako ditshuri kala kupinduka.”—Mas. 146:5, 6.
Ngu lihi lirando ali li tisako litsako?
Se ku ni malembe a kona mu ka 6.000 mafu a Sathani ma txi xanisa vathu. Nyamsi, masiku awa a magwito, mafu ma tate ngu vathu va va tirandako, va randako male ni so tsakisa nyama. Vona va alakanya ngu nzila yo humelela ka ti ti lawako ngu vona ka wutomi wawe dwe. Kambe vathu vo nga vonevo, txima va na mbi mana litsako! Kuhambana ni toneto, Bhiblia yi khene: “A katekile wule Txizimu txa Jakobe i ku m’vhuni wakwe, awule themba yakwe yi ku ka MKOMA, Txizimu txakwe.”—Masalmo 146:5.
Malanda a Jehovha ma mu randa ngu ditshuri ni ku dilembe ni dilembe vathu vamwani vo tala va gonda ditshuri, ve mu randa ni vona. Toneto ti kombisa ti to Mfumo wa Txizimu se wa fuma, ni ku na i singa kale wu na hi tisela makatekwa yo nem hi si ma alakanyi! Ngako hi txi maha ati Jehovha a ti lavako, a na tsaka ngu ngathu ni ku ti na hi tisela litsako la ditshuri. Ava va randako Jehovha va na tsaka kala kupinduka! Ka msungo wu wu londiselako hi na gonda ngu tifanelo to biha ati ti tiswako ngu lirando lo biha. Hi na gwita hi wona nzila yi ti hambanako ngu yona ni tifanelo ta tinene ta malanda a Jehovha.
Tithomba ta moya
it-1111 ¶9
Sihari
Bhiblia yi kuzeta ti to sivangwa sa sidotho si ñolwa ngu nzila yo lulama ni ngu wumbilu, nguko Jehovha ngene asi ningako wutomi ni ku si khatalela. (Mav 12:10; Mas 145:15, 16) Mlayo wa Mosi wu ti gondisa ti to sihari asi hi si fuyako ti ti lava si xayiswa ngu nzila ya yinene. Ngako sihari asi si nga mwalala si txi manwa, si ti fanete kutshumetelwa ka nyamne wa sona si di xayisekile, ni ku ngako si ti ni mthwalo awu wu si nemelako ngutu va ti fanete ku si rula. (Eks 23:4, 5) Si ti fanete kuthumiswa ngu nzila yo si pfela wusiwana. (Dhew 22:10; 25:4) Vathu kumweko ni Sihari va ti fanete kuhumula ngu Sabata. (Eks 20:10; 23:12; Dhew 5:14) Se sihari asi i nga ti sijwalumi si ti fanete kuwonelelwa kwati mwendo si dawa. (Gen 9:5; Eks 21:28, 29) Ni ku Jehovha asi ti lavi ti to sihari simbidi sa tixaka to hambana si velekisana.—Lev 19:19.
10-16 KA FEVEREIRO
TITHOMBA TA MU KA DIPSWI DA TXIZIMU | MASALMO 147-150
Hi ni sivangelo sa singi so dhumisa Jah
Ngu ku txani hi di fanete “kudhumisa Jehovha?”
Jehovha a tsanisile ditiko dotshe da Israeli kambe a tshumete e tsanisa mmweyo ngu mmweyo. Ni nyamsi, Jehovha a mahisa toneto. M’bhali wa Masalmo a ti khene: “Ene wa tangalisa timbilu ta va va nga khuveka a txi bhanditxha silonda sawe!” (Masalmu 147:3) Ngako hi txi lwala mwendo hi di ni dikhodho, hi nga tsaniseka ti to Jehovha wa hi khatalela. Jehovha wa titsakela ku hi tsanisa ni ku bhanditxha silonda sathu sa matipfelo. (Masalmu 34:18, Tradução do Novo Mundo; Isaya 57:15) Ene a hi ninga wuzivi ni mtamo wo kota kuwonisana ni txikarato txihi ni txihi.—Jakobe 1:5.
M’bhali wa Masalmu a woni nzumani se a txi khene Jehovha “wa bala mtengo wa tinyeleti” ni “kuraya ditina ka yimwane ni yimwane”. (Masalmu 147:4) Ene a ti woni tinyeleti, kambe a si na ku ti pfisisa kwati ti to ndingi ku ya hokela hani. Nyamsi, Vasiyentista va tiziva ti to ku ni tibhiliyoni ta tinyeleti ka galáxia yathu. Ni ku, ku ni tibhiliyoni ta tibhiliyoni ta ma galáxia ka wukako wotshe. Vathu kha va na ku sikota kubalela tinyeleti, kambe Jehovha wa sikota. Totshe wa tiziva ngu matina. (1 Vakorinto 15:41) Ngako Txizimu txi zivako nyeleti yimweyo ngu yimweyo, nawe txa kuziva. Phela txona txa kuwona aha u nga ema kona, ati u ti pfako ha mmidini kwako ni ti u ti lavako!
Ngu ku txani hi di fanete “kudhumisa Jehovha?”
Jehovha wa tiziva ati ti ku humelelako, se ene a lava ku kuvhuna. (Lera Masalmu 147:5.) Ti nga maheka u wona nga txikarato txako nja hombe ngutu. Txizimu txa kuziva kutandeka kwako, txa “khumbula ti to athu ho va lithule dwe”. (Masalmu 103:14) Hotshethu kha ha hetiseka, se hi nga thuka hi wuyeletela tiphazamo tathu, toneto ti nga hi vangela dikhodho. Hi nga thuka hi tisola ngu ti hi nga ti womba, hi nga tinavela ni ti hi nga henya ngu tona. Jehovha wa ma ziva matipfelo athu kupinda ati athu hi tizivisako tona.—Isaya 40:28.
Ngu ku txani hi di fanete “kudhumisa Jehovha?”
M’bhali wa Masalmu a ti ti ziva ti to Jehovha a sawute ditiko da kale da Israeli basi ti to di va vathu vakwe. I ti dona dwe ditiko di di nga ti amukela “dipswi” ni “mithetho” yakwe. (Lera Masalmu 147:19, 20.) Nyamsi hi ni lungelo ya hombe yo dhanwa ngu ditina dakwe. Ha bonga ku hi m’zivako, hi kongomiswako ngu Dipswi dakwe ni ku hi ku vangana vakwe. Kufana ni wu a nga bhala Masalmu 147, nawe u ni sivangelo so tala so “dhumisa Jehovha!” ni kukuzeta vamwane ti to ve mu dhumisa.
Tithomba ta moya
it-1316
Sinyana
Mbhali wa Masalmo a wombile to “sinyana si si purumako” si na dhumise Jehovha (Mas 148:1, 10), se si maha toneto ngu nzila yi si nga mahwa ngu yona yo xamatisa. Txinyana tximwetxo dwe txi nga va ni kona mu ka 1.000 kuya 20.000 wa mitenga. Ngu toneto, ka mtenga wumwani ni wumwani ku ni msiha awu mazanazana a matoya ma khukhelako ka wona. Se matoya ma ni sitoyatoyana. Mtenga wumwewo wa 15 wa masentimetro wa dibhapi da dituva kuwombwa to wu ni magidhigidhi a sitoyana ni timiliyoni ta sitoyatoyana. Makotelo o puruma aya ma ku ka tibhati ni ka mmidi wa sinyana, ma pinda ngutu a ti maavhiyawu a txingweno ma purumisako tona. Dirambo da txona do mbi na moloko da txi vhuna ku txi hehuka, toneto ti maha to txikeleto txa disekwa di di ku ni kuanama ka 2 wa mametro di di tute tibhapi di peza kona mu ka 110 wa magrama. Marambo mamwani a tibhati ta sinyana sa hombe si si purumako ma ni so tsanisa ngu sona so fana ni tisimbi ati ti ku mndani ka mabhapi avhiyawu.
17-23 KA FEVEREIRO
TITHOMBA TA MU KA DIPSWI DA TXIZIMU | MAVINGU 1
Majovhem—mi na engisa mani?
U nga tumeleli txilo txi ku tekela hakhelo
U di mphya ti nga maha u pimisa ti to vaveleki vako va karata. Eto ti nga maha u khata kukanakana kuthumela Jehovha. Kambe, loko u txo leka Jehovha, u na wona ti to a walo ni wamweyo hahanze khe a kudhundako kufana ni vaveleki vako ava i ku Makristu ni vangana vako va dibanzani.
Alakanya ngu tiya: Ngako vaveleki vako va si kulayi u na tizivisa kutxani ti to va khatala ngu ngawe? (Vahebheru 12:8) Aku va nga mbi hetiseka ti nga maha nzila yi va kulayako ngu yona yi ku henyisa. Kambe u nga khatali ngu tona. Awe pfsisa ati va kulayako tona. U nga phikizani navo, awe engisela. Txizimu txi khene: “Awule a vekisako mapswi a ni wuzivi, se a wule wa moya wo ziza m’thu wa mapimo.” (Mavingu 17:27) Tivekisele ku va m’thu wa mapimo, awu a tumelako kulaywa ku singa ni mhaka ni ti to va kulayisa kutxani. (Mavingu 1:8) U nga divali ti to kuva mwanana wa Makristu i njombo. Vona va tsakela kukuvhuna.
w05 15/2 19-20 ¶11-12
Mbimo yotshe hi ti kombisa hi di makristu a ditshuri
Tsakisa Txizimu, i singa vathu. Nda mtumbuluko kukombisa ti to hi lumba mtxawa wo kari ngu kutipata ni mtxawa wonewo. Hotshethu ha va lava vangana, ni ku kulumba mtxawa wo kari ti hi nga hi tsakisa. Mbimo yi hi ku ngadi majovhem hambi hi di kute, mkuzetelo wa vakolega wu nga va wa hombe aha ko hi navela ku va etetela mwendo kuva tsakisa. Kambe, hi nga mbimo yotshe vangana ni vakolega va hi navelelako ta tinene. Makhambi mamwani vona vo lava m’thu wo maha nayo to biha. (Mavingu 1:11-19) Mbimo yi mkristu a tumelako mkuzetelo wa vakolega, makhambi o tala ene wa zama kusisa ti to mkristu. (Masalmo 26:4) Paulo ahi ningile txialakanyiso txiya: “Mi nga xengetelweni ngu sa ditiko diya.” (Varoma 12:2, Bíblia de Jerusalém) Jehovha wa hi ninga mtamo awu hi wu lavako kasiku hi lwisana ni mikuzetelo yo biha.—Vahebheru 13:6.
Mbimo yi mikuzetelo yo biha yi lavako kuonha mahanyelo athu a manene kota makristu, hi fanete kukhumbula ti to kuthembeka kwathu ka Txizimu nga lisima kupinda mawonelo a vathu mwendo ati mtalo wa vathu va ti mahako. Ditshina da mlayo adi di ku ka Eksodha 23:2 di nga hi vhikela: “U nga londete mtxawa wa mtalo wa vale va mahako to biha.” Mbimo yi mtalo wa Vaisrayeli wu nga txi kana-kana wusikoti wa Jehovha wo hetisisa sithembiso sakwe, Kalebhe a lambile kutipata navo. Ene a txi tsaniseka ti to sithembiso sa Txizimu si ndi na hetiseka, ni ku a katekisilwe ngu kusimama a di thembekile. (Mitengo 13:30; Joxuwa 14:6-11) Kasi ku u vhikela wungana wako ni Jehovha, ina u ti emisete kulamba mkuzetelo wa vathu?
Tithomba ta moya
it-1846
Txiphuphuku
Hahanze ko womba m’thu wo kelelelwa ngu mapimo, dipswi “txiphuphuku,” nga ha di txhamuselwako ngu kona ka Bhiblia, di kombetelwa m’thu wu a ku ni mahanyelo a nzambwa aya ma lwisanako ni milayo yo lulama ya Txizimu. Ku ni mapswi amangi a Txihebheru ma kombetelako ka m’thu wa mazumbelo yawa: kesilʹ (‘txiphukuphuku’; Mav 1:22), ʼewilʹ (“dihundwa”; Mav 12:15), na·valʹ (‘dibhemba’; Mav 17:7), ni lets (“mtseketseli”; Mav 13:1). Ngu Txigriki aʹphron kuwombwa “dibhemba” (Luk 12:20), a·noʹe·tos kuwombwa “diphuphulu” (Vag 3:1), ni mo·rosʹ kuwombwa ‘txiphuphuku’ mwendo “txiphunta” (Mat 23:17; 25:2).
24 KA FEVEREIRO KALA 2 KA MARÇO
TITHOMBA TA MU KA DIPSWI DA TXIZIMU | MAVINGU 2
Ngu kutxani u txi hisekela gondo yako upune?
Simama u “hanya mu ka ditshuri”
Hi nga hotshethu hi dhundako ku lera ni kugonda. Kambe Jehovha wa hi kuzeta ti to hi simama hi “xota” ni ku hi simama hi “lava” ditshuri kasi ku hi di pfisisa. (Lera Mavingu 2:4-6.) Nga ku hi txi maha mizamo yoneyo hi na wuyelwa ngutu. Corey a womba ti to mbimo yi a gondako Bhiblia a zama kugonda ndimana ngu ndimana. Ene a womba tiya: “Ani ni lera totshe titxhamuselo ta hahatshi, ni lera yotshe mibhalo yo longoloka ni kumaha wuxolisisi wo engeteleka. . . . Na wuyelwa ngutu ngu kuthumisa magondelo yawa.” Ti nga maha hi thumisa magondelo yo fana ni yawa mwendo yo hambana kambe hi nga kombisa to ha bonga ditshuri di hi nga di mana ngu ku tiha mbimo yo di gonda.—Mas. 1:1-3.
Wuzivi wa kwangula
Kuva ni wutxhari ti nga womba wusikoti wo thumisa ati hi ti zivako kasi ku maha sisungo sasinene. Kambe kuva wutxhari wa ditshuri ti pata to pinda eto. Bhiblia yi womba tiya: “Kuthava MKOMA ngu ona makhato a wutxhari, ni wuzivi wa Msawuleki ngu pfisisa.” (Mav. 9:10) Se ngako hi txi lava kumaha txisungo txa lisima hi fanete kuteka mawonelo a Jehovha i ku ene “wo sawuleka ka votshe” me va ditshina da txisungo txathu. Hi nga maha toneto ngu kugonda Bhiblia ni mabhuku athu. Ngu nzila eyo hi na va hi txi kombisa wutxhari wa ditshuri.—Mav. 2:5-7.
I Jehovha dwe a nga hi ningako wutxhari wa ditshuri. (Var. 16:27) Ngu kutxani ene i di txisima txa wutxhari? Txo khata, kota Mvangi ene a ni kupfisisa ko mbi guma ngu sotshe si a nga si vanga. (Mas. 104:24) Txa wumbidi, sotshe si a nga si vanga si kombisa wutxhari. (Var. 11:33) Txa wuraru, sialakanyiso sa wutxhari sa Jehovha mbimo yotshe sa wuyelisa ava va si engisako. (Mav. 2:10-12) Ngako hi txi lava kuva ni wutxhari wa ditshuri hi fanete kutumelela ditshuri di kongomisa sisungo sathu.
Vaphya tsanisani likholo lanu
Vathu vavangi nyamsi kha va kholwi ti to Txizimu i mvangi wa wathu. Ngako u di Fakazi ya Jehovha mwendo wo ngadi u txi gonda, ti nga maha u ti wotisa ku u nga mahisa ku txani ti to u tsaniseka ti to ku ni Mvangi. I di ti to nawe wa ti wotisa, u nga sikota kutsanisa likholo lako. Txizimu txi hi ningile wusikoti wo alakanya, i ku kuthumisa misungo yathu. Ina eto ti nga kuvhuna? Inna. Ti nga kuvhuna kuvayilela timhaka timwane ati ti nga dayako likholo lako.—Lera Mavingwa 2:10-12.
3 Ti lava hi va ni likholo lo tsana ka Jehovha, hi fanete hi m’ziva kwati. (1 Timoti 2:4) Se mbimo yi u lerako Bhiblia ni mabhuku mamwane, nda lisima kulwela kupfisisa ati ti wombwako. (Matewu 13:23) Ka msungo wuwa hi na xolisisa ti to kumaha toneto ti nga kuvhunisa ku txani kuwona kwati ti to Jehovha i Mvangi wathu futhi Bhiblia hi nga ya m’thu, njakwe.—Vahebheru 11:1.
Tithomba ta moya
it-11211 ¶4
Wuthembeki
Kuthembeka kha ku koteki ngu mtamo wa m’thu apune, kambe kuta ngu kuthemba ni likholo li a ku nalo ka Jehovha ni mtamo wakwe wo hulukisa. (Mas 25:21) Dipswi da Txizimu di thembisa ti to ene a nava “txitxhavangu” ni “wuthavelo,” ka vale va tsimbilako ngu wuthembeki. (Mav 2:6-8; 10:29; Mas 41:12) Kutikarata kwawe ko lava kutsakelwa ngu Jehovha ti va maha ve tsana ni kulondeta makungu awe. (Mas 26:1-3; Mav 11:5; 28:18) Hambiku Jobe a nga womba to m’thu wo thembeka wa xaniseka ngu kufumwa ngu vabihi ni kufa kumweko navo, kambe Jehovha wa tsanisekisa ti to wa va khumbula vava vo lulama, thomba yawe ya mbimo yi yi tako i nava kurula. (Job 9:20-22; Mas 37:18, 19, 37; 84:11; Mav 28:10) Kufana ni Jobe, atxi txi mahako to m’thu eva wa lisima ni kuxonipheka ka Jehovha, ngu eva wo thembeka i singa tithomba ti a ku nato. (Mav 19:1; 28:6) Vanana ava va ku ni vaveleki vo zumbisa tiya va ni litsako (Mav 20:7), va mana txikombiso txa txinene txa vaveleki vawe ni kuva ni nduma ya yinene.