Mareferensiya a txibhukwana txa mitshangano ya Mahanyelo a Wukristu

Mareferensiya a txibhukwana txa mitshangano ya Mahanyelo a Wukristu

3-9 KA NOVEMBRO

TITHOMBA TA MU KA DIPSWI DA TXIZIMU TA DIBHUKU DA NDANDO YA TINDANDO 1-2

Matimu a lirando la ditshuri

w15 15/1 30 ¶9-10

Ina liho lirando la ditshuri?

Wukati hi nga kupfana ka vathu va vambidi ava va si randaniko. Ngu ditshuri, Makristu ya ma nga txhadha ma fanete kukombisana lirando. Kambe lirando lo zumbisa kutxani ali va fanelako kukombisana lona? Ina lirando ali li kongomiswako ngu matshina a milayo a Bhiblia? (1 Joh. 4:8) Ina lirando la mtumbuluko ali siro sa mwaya si kombisanako? Ina lirando ali vangana va ditshuri va kombisanako? (Joh. 11:3) Ina lirando ali vathu ava va randanako va kombisanako lona? (Mav. 5:15-20) Wamwamna ni wamsikati ava va nga tekana va fanete kukombisana lirando ngu totshe tinzila. Phela ava va nga tekana va fanete kukombisa to va randana ngu ti va ti wombako ni ti va ti mahako. Mithumo ya ditshiku ni ditshiku kha ya fanela kuva dyela mbimo yo ve kombisana lirando! Simaho soneso so kombisana lirando si nga tsanisa wukati wawe ni kuva ninga litsako. Ka makhalo aya vathu va lavelwako wo txhadha nayo, kha ti koteki to vathu vonevo ve zivana kwati va si se kutxhadha. Ngu toneto, vona va fanete kukombisana lirando ngu mapswi nguku eto ti nga va vhuna to lirando lawe li kula, se mtxhadho wawe wu simama wu di tsani.

Simaho so kombisana lirando si ni wuyelo yimwani ya yinene. Mkoma Solomoni a zamile kusiha dihorana da Mxulamita ngu ku di ninga “liketani la nzalama ni sipikiryana sa silivhela”. Ene a tshumete e di ndunduzela ngu ku di gela ti to i ti do “tshura nga mtxima” ni do “woninga nga ditambo.” (Nda. 1:9-11; 6:10) Kambe dihorana da Mxulamita di simamile di thembeka ka dijaha dile da m’dyisi adi di nga ti lava kutxhadha nado. Nji txani txi nga mmaha e thembeka ka dijaha dakwe mbimo yi va nga ti singa votshe? Wona ati di hi gelako. (Lera Ndando ya Tindando 1:2, 3.) Ati ti nga vhuna dihorana da Mxulamita ngu khumbula ‘simaho sa lirando’ sa dijaha da lona da m’dyisi. Ka dona, simaho soneso i ti sa “txhuko kupinda vhinya” ayi yi tsakisako mbilu, ni ku ditina dakwe di ti mtsakisa kufana ni “mafura o bhumula” ka msungo wakwe. (Mas. 23:5; 104:15) Phela lirando la vathu ava va nga tekana la tsana ngako va txi khumbula mapswi ya va gelanako yo kombisa lirando. Ngu toneto, nda lisima ku wamwamna ni wamsikati ve gelana mapswi o kombisa lirando.

Tithomba ta moya

w15 15/1 31 ¶11

Ina liho lirando la ditshuri?

¹¹ Ndando ya Tindando yi ni tigondo timwani ta lisima ati ti nga vhunako Makristu aya ma pimisako ngu kulava kutxhadha. Dihorana da Mxulamita di si ya rendera nem ka kudotho ngu mkoma Solomoni. Dona di gete mahorana a Jerusalema di txi: “Mi nga wuseni lirando langu, kala kuza li ti lava.” (Nda. 2:7; 3:5) Ngu kutxani dona di di mahile toneto? Nguku ti bihile kurandana ni m’thu wu u si laviko kutxhadha nayo. Ngu toneto, nda tinene ku Mkristu awu a lavako kutxhadha eva ni pasiyensiya, e emela mbimo yi a no mana m’thu wu a no mranda ngu ditshuri.

10-16 KA NOVEMBRO

TITHOMBA TA MU KA DIPSWI DA TXIZIMU TA DIBHUKU DA NDANDO YA TINDANDO 3-5

Kuva wo tshura ngu mndani

w15 15/1 30 ¶8

Ina liho lirando la ditshuri?

Hi nga otshe mapswi yo kombisa lirando ma ku ka dibhuku da Ndando ya Tindando ma wombako kutshura ka khohe. Wona ati m’dyisi a nga tiwomba ngu mawombawombelo a dihorana da Mxulamita. (Lera Ndando ya Tindando 4:7, 11.) Dijaha da m’dyisi di womba ti to txisofu txa dihorana da Mxulamita txi ti “khulunga mahesa a wulombe.” Ngu kutxani? Nguku wulombe awu wu ku ka mahesa wa tshamba ngutu kupinda wu se wu nga kamelwa. Dijaha da m’dyisi di tshumela di womba ti to “Wulombe ni masi si hahatshi ka lidimi lakwe.” Eto ti lava kuwomba ti to mapswi a Mxulamita ma txi mtsakisa. Mbimo yi m’dyisi a nga womba tiya: “Mndoni wangu, u tshurile ngutu, kha ku na txi txi solekako kwako,” ene a si wombi kutshura ka khohe dwe.

w00 1/11 11 ¶17

Mawonelo a Jehovha mayelano ni kubasa ka mahanyelo athu

M’thu wa wuraru awu a nga kombisa kuthembeka dihorana da Mxulamita. Dihorana diya do tshura da Mxulamita diya navelwa basi ngu m’dyisi kambe di tshumete di navelwa ngu mkoma Solomoni. Matimu ya ma manekako ka dibhuku da Ndando ya Tindando ma kombisa ti to dihorana da Mxulamita di simamile di di thembekile. Eto ti mmahile eva ni nduma ya yinene ka vathu va m’gangani kwakwe. Hambi ku Solomoni a nga lambwa ngu dihorana da Mxulamita, Solomoni a huhutetwe ku bhala matimu oneyo. Dijaha dile da m’dyisi ni dona di txi xonipha kuthembeka ka dihorana da Mxulamita. Dona di tiwoni ti to dihorana da Mxulamita di tifana ni “jaradhi yo bhiyelwa.” (Ndando ya Tindando 4:12, NM) Ka Israyeli wa kale, jaradhi yi ti ni mafilori yo nungela, mindonga yo hambana-hambana ni yo tshura ngutu. Jaradhi yoneyo yi ti tolovela ku bhiyelwa ngu redhi mwendo ngu mmuru. Se ti txi lava u thumisa ditimba kasi kubela ka jaradhi yoneyo. (Isaya 5:5) Ka dijaha dile da m’dyisi, kuthembeka ni kubasa ngu didhawa da mahanyelo ka dihorana da Mxulamita, ku txi fana ni jaradhi yo tshura ngutu ayile yi nga bhiyelwa. Ene ati basile ka mahanyelo akwe. Simaho sakwe so kombisa lirando a ndi no ta si kombisa ka wu a ndi no txhadha nayo dwe.

g04 22/12 9 ¶2-5

Kutshura aku ku ni lisima

Ina kutshura ka mbilu nga lisima ka vathu? Georgina wu a ku ni 10 wa malembe a di txhadhile a womba tiya: “Ka otshe malembe yawa, ni tipfa ni txi randwa ngutu ngu mwamna wangu ngu mhaka kuthembeka kwakwe ni ku mbimo yotshe a womba-womba ditshuri. Txa lisima ka wutomi wakwe ngu tsakisa Jehovha. Eto ti mmaha e ni randa ni ku ni khatalela. Mbimo yi a lavako kumaha sisungo, wa wotisa mawonelo angu ni ku ni maha ni tipfa ni di wa lisima. Phela na tiziva to wa ni randa ngu ditshuri.”

Daniel wu a nga txhadha ngu 1987 a womba tiya: “Ani na rendera ngu msikati wangu, phela i nyembula. Kambe ati ti ni mahako ni mranda ngutu tifanelo takwe tatinene i si nga kutshura ka khohe yakwe dwe. Yotshe mbimo ene wa khatala ngu vamwani ni ku a lava ti to ve tipfa i di va lisima. A ni tifanelo tatinene ta Wukristu. Ngu toneto, i lungelo ya hombe kwangu kuva ni di txhadhile nayo.”

Ka mafu yawa a Sathani, hi fanete kutula maso hi tshumela hi pfisisa ti to kumana kutshura aku ku ku ni lisima kha ti hehuki. Ta koteka kusakulela tifanelo tatinene ati ti nga hi mahako hi tshura ngu mbiluni. Bhiblia yi womba tiya: “Kutshura ka kanganyisa, kambe kona kutshura ngutu mbukanganyisi, aniko msikati wule a thavako Mkoma, eyo a na dhundwa.” Bhiblia yi tshumela yi hi txharihisa yi txi: “Kufana ni disinda da nzalama thonvuni ka khumba, ngu nga toneto wamsikati wo tshura a txi hambana ni ditshuri.”—Mavingu 11:22; 31:30.

Dipswi da Txizimu da hi vhuna kuninga lisima “wuthu wo sisaleka wa mbilu, i ku kubasa ko mbi guma ka moya wo thutha ni wa kurula, wu ku ni lisima masoni ka Txizimu.” (1 Pedro 3:4) Ngu ditshuri, kutshura ka mbilu nga lisima ngutu kupinda kutshura ka khohe. Vathu votshe va nga kusakulela.

Tithomba ta moya

w06 15/11 18 ¶4

Tithomba ta moya ta dibhuku da Ndando ya Tindando

2:7; 3:5—Ngu kutxani mahorana a Jerusalema ma di xambanyisilwe ngu “timhoti ni timbavala ta txitinga”? Timhoti ni timbavala si ziwa ngu kutshura ngutu. Ngu toneto, dihorana da Mxulamita di xambanyisile mahorana yale ngu ditina da sotshe silo so tshura ngutu ti to ma si zami ku mmaha e randana ni m’thu wu a nga ti si m’dhundi.

17-23 KA NOVEMBRO

TITHOMBA TA MU KA DIPSWI DA TXIZIMU TA DIBHUKU DA NDANDO YA TINDANDO 6-8

Simama u va ni mahanyelo a manene

it “Ndando ya Tindando” ¶11

Ndando ya Tindando

Ti tikomba nga Solomoni a ti tumelete ku dihorana da Mxulamita di tshumelela mtini. Mbimo yi ti nga m’wona, tindiya ta dihorana ti wotisile tiya: “I mani wule a tako ngu didhawa da txiwulani a di khutarete txirandwa txakwe kani?” (Nda 8:5a) Tindiya ta dihorana da Mxulamita ti si ti zivi to ndiyawe i m’thu wo thembeka ka dijaha di a nga ti randana nado. Malembenyana msana, ndiya dihorana da Mxulamita yi ti wombile tiya: “Hi ni ndiya ya yidotho, yi sanziko kuva ni titshumbu; Hi na maha txani ngu yona, ditshiku di yi no ta wutwa kani?” (8:8) Ndiyakwe yimwani yi xamute yi txi: “I ti ku ova diguma, hi ndi na aka txidingililelo txa silivhela txitimwi ka yona, i ti ku ova ditimba, hi ndi na m’bhiyela ngu mapulango a mikedhari.” (8:9) Kambe aku dihorana da Mxulamita di nga lamba kuxengetelwa, di tsaka ngu mvhinya wa dona ni kusimama di di thembekile ka dijaha da m’dyisi (8:6, 7, 11, 12), dona di ndi na womba di di tsanisekile di txi: “Ani ni diguma, titshumbu tangu ti fana ni sidingililelo sa dona; masoni kwakwe ni fana ni wule a manako kudikha.”—8:10.

yp 188 ¶2

Ina ti bihile kumaha timhaka ta mataho hi si se txhadha?

Kwambi tiñola ngu nzila yo biha ngu timhaka ta mataho ti nga vhuna dijovhem ku di vayilela wuyelo yo biha. Bhiblia yi womba-womba ngu dihorana adi i nga ti divhirjem di nga simama di di thembekile hambiku di nga ti randa ngutu namoradhu wa dona. Kota wuyelo, dona di wombile di di tsanisekile di txi: “Ani ni diguma, titshumbu tangu ti fana ni sidingililelo sa dona.” Ene a si fani ni ditimba da txitolo aha kuwulelako awu a ku nga tilava, kambe ati fana ni mmuru wo karata ku wukwela! Ene ati fanelwa ngu kudhanwa kota “wo sawuleka” ni ku a wombile tiya ka wu a ndi no txhadha nayo: “Masoni kwakwe ni fana ni wule a manako kudikha.” Kurula kwakwe ku ti maha ti to votshe va vambidi ve va ni litsako.—Ndando ya Tindando 6:9, 10; 8:9, 10.

yp2 33

Tekelela txikombiso txa Mxulamita

Dihorana da Mxulamita di txi tiziva to di ti fanete kupimisa khakwati mayelano ni timhaka to randana. Dona di gete vangana va dona di txi: “Na mi xambanyela ti to, mi nga wuseni hambi kuvhumukisa lirando langu, kala kuza li ti lava li pune.” Dihorana da Mxulamita di txi tiziva to matipfelo a dona ma nga di xenga. Ngu txikombiso, dona di txi tiziva ti to vamwani va ndi na di kuzetela ku di randana ni m’thu wu di nga ti si mlavi. Phela matipfelo a dona ma ndi na di maha di si pimisi ngu nzila ya yinene. Ngu toneto, dihorana da Mxulamita di simamile di va “diguma.”—Ndando ya Tindando 8:4, 10.

Ina mawonelo yako mayelano ni kurandana ma fana ni ya dihorana da Mxulamita? Ina wa sikota kuthumisa kwati mapimo ako kupinda minavelo ya mbilu yako? (Mavingu 2:10, 11) Mbimo yimwani, vamwani va nga kukuzetela kunamorara u si se tiemisela kumaha toneto, mwendo u kuzetelwa ngu minavelo yako. Ngu txikombiso, mbimo yi u wonako dijaha ni dihorana va di ñolani mawoko va txi tsimbila, ina wa navela kuva ni wako nawe? Ina u ndi na tumela kurandana ni m’thu wu i si ngaku Fakazi ya Jehovha? Dihorana da Mxulamita di ti sikota kumaha sisungo sasinene mayelano ni minavelo ya mbilu yo fana ni timhaka ta lirando. Nawe u nga sikota kumaha toneto!

Tithomba ta moya

w15 15/1 29 ¶3

Ina liho lirando la ditshuri?

Lera Ndando ya Tindando 8:6. Mapswi aya ma ku “titshatsha ta Mkoma” ma thumiswako kasi kutxhamusela lirando, ma ni txhamuselo ya hombe. Lirando la ditshuri “titshatsha ta Mkoma” nguku Jehovha ngene M’vangi wa lixaka la lirando lonelo. Ene a vangile m’thu ngu txifaniso txakwe adi ni wusikoti wo kombisa lirando. (Gen. 1:26, 27) Mbimo yi Txizimu txi nga mahela Adhamu wamsikati i ku Evha, Adhamu a wombile mapswi o tsakisa. Ngu ditshuri, Evha a pfite lirando la hombe ngu Adhamu. (Gen. 2:21-23) Aku Jehovha a nga ninga vathu wusikoti wo ve kombisana lirando, ti hakubasani ti to ta koteka to wamwamna ni wamsikati ve randana kala ve hambaniswa ngu lifo.

24-30 KA NOVEMBRO

TITHOMBA TA MU KA DIPSWI DA TXIZIMU ISAYA 1-2

Themba ka vale va “nga tala ngu wubihi”

ip-1 14 ¶8

Tate ni vanana vakwe va si ndaka milayo

Isaya wa simama e gela Vajudha didungula da mtamo atxi: “Dikhombo ka ditiko da vaonhi, vathu vo tala ngu wubihi, lihunzu la mikhuwo yo biha, vanana vo hundeka! Va lekile Mkoma, ve ruketela Msawuleki wa Israyeli; va tshumelete msana.” (Isaya 1:4) Simaho so biha si nga sengeletana si txi nga mrwalo wo nemela ngutu. Ka timbimo ta Abrahamu, Jehovha a wombile ti to sionho sa Sodhoma ni Gomora si ti “thisa ngutu.” (Genesisi 18:20) To fana eto ti txi maheka khe Judheya, nguku Isaya a womba ti to vathu va ti ‘tate ngu wubihi.’ I singeto dwe, Isaya a tshumela e dhana Vajudha kota “lihunzu la mikhuwo yo biha, vanana vo hundeka.” Ngu ditshuri, Vajudha va ti ko nga vanana vo hundeka. Vona va ti “tshumelete msana”, mwendo ku va ti “tshuralete” Tate wawe.

ip-1 28-29 ¶15-17

“Ngonani hi ta lulamisa timhaka”

Ngu msana, Jehovha ngu wunene a wombile tiya: “‘Ngonani, hi ta lulamisa timhaka,’ kuwomba Jehovha. ‘Hambi ngako sionho sanu si di mi bhilivilisile mi fana ni txiwunguwungu, si na basa kufana ni hunguva; hambi ngako si di bhilivilisile kunzihala, si na nga matoya o basa.’” (Isaya 1:18, NM) Txirambo atxi txi ku makhatoni ka vhersikulo yiya, makhambi o tala txi pfisiswa ngu nzila ya walo. Ngu txikombiso, ma Bhiblia mamwani ma womba tiya: “Ngonani hi ta wombawombisana” nga ti to Jehovha ni vathu va fanete kuwombawombisana kala ve za ve pfana. Kambe eto hi nga ditshuri! Phela Jehovha a singa ni mnando ka nzila ayi a nga ti ñola ngu yona vathu vale va si ndaka milayo ni va wukanganyisi. (Dhewuteronome 32:4, 5) Ndimana yiya kha yi wombawombi ngu kubhulisana ka vathu vambidi vo fana kasiku ve pfana ka mhaka yo kari, kambe yi womba-womba ngu lulamiselo yo kombisa wululami. Ti ti ko fana ni kuva Jehovha adi rambile Vaisrayeli ku veya tribhunali.

Eto ti ti komba nga i mhaka yo dhukisa, kambe Jehovha Mlamuli awu a ku ni wuxinji ni wululami kupinda vathu votshe. Phela nzila yi Jehovha a divalelako ngu yona kha yi pimaniswi ni ya m’thu. (Masalmo 86:5) Ngene dwe a ku ni wusikoti wo pfhuta sionho so fana ni dinodhwa do ‘bhilivila’ e si ‘basisa kufana ni hunguva.’ Kha txi ngaho atxi txi sikotako kupfhuta sionho i singa Jehovha. Jehovha a divalela wule a londetako mlayo awu a nga wu veka i ku wo tisola ti txi khukhela mbiluni.

Ditshuri donedo nda lisima ngutu aha koza Jehovha e womba to hambi sionho si di “bhilivilisile kundzihala,” si na nga matoya o basa. Jehovha a lava hi tiziva ti to ene M’divaleli wa sionho, hambi i di sionho so thisa ngutu bhaxta hi tisola ti txi khukhela mbiluni. Awu ti mkaratelako kukholwa ka toneto, ndatinene ku e gonda matimu a Manasi. Phela ene a mahile sionho sa hombe kudingana malembe o tala. Kambe mbimo yi a nga tisola, Jehovha a m’divalele. (2 Makronika 33:9-16) Jehovha a navela ti to hotshethu, kupata ni vale va nga maha sionho sa hombe, hi tiziva ti to ku ngadi ni mbimo yo hi ya ‘lulamisa timhaka’ tathu nayo.

Tithomba ta moya

ip-1 39 ¶9

Kuguleka ka nyumba ya Jehovha

Ka masiku athu, vathu va Jehovha kha va mkhozeli ka mmango mwendo ka dithempele adi di nga mahwa ngu marigwi. Dithempele da Jehovha di nga ti khe Jerusalema di hoxotilwe ngu dibutho da masotxhwa a Varoma ngu 70 E.C. I singeto dwe, mpostoli Paulo ati vekile hakubasani ti to dithempele da Jerusalema ni tabhernakela i ti so fanekisela. Sona si txi fanekisela timhaka ta moya i ku “ditenda da ditshuri, adi di nga akwa ngu Mkoma, i si nga ngu m’thu.” (Vahebheru 8:2) Dithempele donedo i lulamiselo ayi yi hi vhunako kutshuketa ka Jehovha hi mkhozela, ayi yi nga seketelwa ka digandelo da mterulo da Jesu Kristu. (Vahebheru 9:2-10, 23) Se, “mmango wa Nyumba ya Mkoma” awu kuwombwawombwako ngu wona ka Isaya 2:2 wu emela wukhozeli wo sawuleka ka timbimo tathu. Ava va seketelako wukhozeli wo sawuleka ka masiku athu, kha ti lavi to votshe veya ka wukhalo wo kari wo kongoma kasi ku veya khozela nga ha Vaisrayeli va nga ti maha ngu kona ngu kuya dithempeleni khe Jerusalema.

1-7 KA DEZEMBRO

TITHOMBA TA MU KA DIPSWI DA TXIZIMU ISAYA 3-5

Jehovha a emela ti to vathu vakwe ve muengisa

ip-1 73-74 ¶3-5

Dikhombo ka thembwe ya mivhinya ayi yi si velekiko!

Ti singa ni mhaka ni ti to Isaya a va gete mapswi yawa a txi embelela mwendo nem, ditshuri ngu ti to a ti a nga ti womba ti mahile to va engiseli vakwe ve riya nzeve. Phela wungi wawe va txi ti ziva kuphaya mivhinya, ngu toneto va ti pfisisile ati Isaya a nga txi ti womba. Kufana ni vaphayi va mivhinya va nyamsi, nyamne wa thembwe ya mivhinya wu Isaya a wombawombako ngu ngene, a si thumisi tinyingi kasi kuphaya yimwani mivhinya, kambe a txi thumisa madhavi ni mikoloti. Nyamne wa thembwe ya mivhinya a phayile mivhinya ka “tximangwana txo nona” aha mivhinya yi ndi no veleka mihando yo tala.

Ta karata kumaha ti to mvhinya wu veleka mihando yo tala. Isaya a womba ti to nyamne wa thembwe ‘a dimile ni kuthavisela marigwi.’ Ewo mthumo wo karata ngutu ni ku wa karalisana! Ti nga maha nyamne wa thembwe a di thumisile marigwi oneyo kasi kuaka “txitezi”. Ka timbimo ta kale sitezi i ti wukhalo awu vawoneleli va nga ti thuma ka wona kasiku ve wonelela makhamba ni sihari. Ene a tshumete e aka mmuru wa marigwi kasi kuvhikela thembwe ya mivhinya. (Isaya 5:5) Eto ti txi mahelwa ku mafu yo nona ma si khukhulwi ngu mati ya nzuma.

Msana ko va nyamne wa thembwe ya mivhinya a di thumile ngutu, ene a txi emela ti to mivhinya yi veleka mihando yo tala. Ngu toneto, ene a kelete dipipa. Kambe ina mivhinya yi velekile mihando yo tala? Nadha, yona yi to veleka mihando yo bava.

ip-1 76 ¶8-9

Dikhombo ka thembwe ya mivhinya ayi yi si velekiko!

Isaya a dhani Jehovha nyamne wa mivhinya kota, “txirandwa txangu”. (Isaya 5:1) Isaya a dhani Jehovha kota txirandwa txakwe nguko a ti ni wuxaka wo tsana nayo. (Fananisa ni Jobe 29:4; Masalmo 25:14.) Hambiketo lirando li Isaya a nga ti nalo ngu Txizimu i ti la lidotho li txi fananiswa ni li Jehovha a nga ti nalo ngu “thembwe yakwe ya m’vhinya” i ku ditiko da Israyeli adi ‘a nga di phaya.’—Fananisa ni Eksodha 15:17; Masalmo 80:8, 9.

Jehovha “a phayile” ditiko da Israyeli khe Kanana, ni ku a di ningile milayo ayi yi nga txi thuma kota mmuru, awu wu nga ti va vhikela ka mkuzetelo wo biha wa matiko mamwani. (Eksodha 19:5, 6; Masalmo 147:19, 20; Vaefesu 2:14) I singeto dwe, Jehovha a mahile ti to ka ditiko dakwe ku va ni valamuli, vaprista ni vaprofeti kasi ku ve gondisa vathu. (2 Vafumeli 17:13; Malakiya 2:7; Mithumo 13:20) Mbimo yi Vaisrayeli va nga ti xaselwa ngu valala vawe, Jehovha a ti maha ti to ku va ni m’thu wu a ndi no va hulukisa. (Vahebheru 11:32, 33) Ta pfala kuva Jehovha a di wotisile tiya: “Nji txani tximwani txo dingana ku txi mahwa ka thembwe yangu atxi ni nga mbi txi maha kani?”

w06 15/6 18 ¶1

“Khatalela mvhinya wuwa”!

Isaya a fananisile “nyumba ya ka Israyeli” ni mivhinya ayi yi velekako “mihando yo bava” mwendo “si uvhana so sina”. (Isaya 5:2, 7) Mauvha o bava, nzi uvhana sa sidotho kupinda ya ma nga toloveleka ni ku kha si nga ni dithoma, si to tala tinyingi. Si uvhana soneso so bava si si dyeki nem u si na kumaha ngu sona vhinya. Phela eto ti ti fanekisela nzila yi ditiko da Israyeli di nga ti ngu tona. Vona va ti wukete Txizimu ni milayo ya txona yo lulama. Mnando hi nga wa mphayi wa mivhinya ayi yi nga veleka mihando yo mba vhuna txilo. Phela Jehovha a mahile totshe ati a nga ti kota kasiku ditiko da Israyeli di veleka mihando ya yinene mwendo ku di m’engisa. Se nyamne a mivhinya a to wotisa tiya: “Nji txani tximwani txo dingana ku txi mahwa ka thembwe yangu atxi ani ni nga mbi txi maha kani?”—Isaya 5:4.

w06 15/6 18 ¶2

“Khatalela mvhinya wuwa”!

Aku Vaisrayeli va nga mbi veleka mihando ya yinene, Jehovha a va gete ti to a ndi na khundumusa mmuru awu a nga ti va vekete kasiku wu va vhikela. Ene a sina ku swa kambe e khatalela mivhinya yile yo fanekisela i ku ku yi sakulela ni ku yi nisela nzuma. Yi ndi na tshumela yi zumba txitingani yi milelwa ngu maxexwa.—Isaya 5:5, 6.

Tithomba ta moya

ip-1 80 ¶18-19

Dikhombo ka thembwe ya mivhinya ayi yi si velekiko!

Khe Israyeli wa kale nyamne wa tithembwe i ti Jehovha. Mwaya wumwani ni wumwani wu ti amukete tithembwe ati wu nga ti tumelelwa ku ti lugarisa mwendo kulombisa, kambe wu ti sa fanela kuxavisa “da magwito.” (Levhi 25:23) Mlayo wonewo wu ti tsivela wukanganyisi wo m’thu e va ni tithembwe ta tingi aha koza e ti gela to ngene nyamne wa tithembwe totshe. Mlayo wonewo wu ti tshumela wu vhuna timwaya ti to ti si ve sisiwana. Txo mbi tsakisa ngu ti to vathu vamwani va khe Judheya va si engisi mlayo wonewo wa Txizimu mayelano ni tithembwe. Mika a bhate tiya: “Se va navela tithembwe ni tinyumba ve ti honyola; ngu kumaha eto va lwisa wamwamna ni mwaya wakwe, ni m’thu kumweko ni thomba yakwe.” (Mika 2:2) Kambe Mavingu 20:21 yi womba tiya: “Thomba yo yi mana ngu txikuluveta kukhatani, magwito a kona kha ma nga ni kukateka.”

Jehovha a thembisile kuhudzula sotshe asi vanyamakolo vonevo va nga si teka ngu wukanganyisi. Tinyumba ti va nga kho ve teketela ngu wukanganyisi ti ndi na sala “ti singa ni vathu.” Tithembwe ti va nga honyolela ti si na ku ngadi ti bhindula txilo. Kha ta wombwa to ti ndi na hetiseka mbimo muni toneto. Ti nga maha timhaka tiya ti txi kombetela ka ti ti ndi no maheka mbimo yi Vaisrayeli va ndi no yiswa wukhumbini Bhabhilona.—Isaya 27:10.

8-14 KA DEZEMBRO

TITHOMBA TA MU KA DIPSWI DA TXIZIMU ISAYA 6-8

“Ngani wuwa, ni rume!”

ip-1 93-94 ¶13-14

Jehovha a dithempeleni kwakwe ko sawuleka

A hi woneni ati Isaya a nga ti womba. “Msana keto ni to pfa dipswi da MKOMA di txi kha dona: ‘Ni na ruma mani, i mani a no hi yela kani?’ Sekoko ni txi khani: ‘Ngani wuwa, ni rume.’” (Isaya 6:8) Jehovha a txi lava ti to Isaya e xamula txiwotiso txi a nga m’mahela. Atxiya txirambo atxi Jehovha a nga mahela Isaya, ti to e va mtxhumayeli wa didungula dakwe. Kambe ngu kutxani Jehovha a di wotisile tiya: “I mani a no hi yela kani?” Ngu kuva Jehovha a di thumisile mapswi aya ma ku “I mani a no hi yela kani,” eto ti kombisa ti to Jehovha a singa ekha mbimo yi a nga wombawomba ni Isaya. Se a ti ni mani? A ti ni mwanana wakwe wa matiwula, awu ngu kutsimbila ka mbimo a nga ziwa kota Jesu Kristu. Phela ngene mwanana wu Jehovha a nga m’gela tiya: ‘A hi vangi m’thu ngu txifaniso txathu.’ (Genesisi 1:26; Mavingu 8:30, 31) Jehovha a ti ni mwanana wakwe wa matiwula nzumani mbimo yi a nga wombawomba ni Isaya.—Johani 1:14.

Isaya kha swela kuxamula. Hambiku a nga si ti zivi ti to ngu dihi didungula adi a ndi no di txhumayela, ene a xamute ngu txikuluveta a txi: “Ngani wuwa, ni rume.” Phela Isaya kha wotisa to a ndi na wuyelwa ngu txani ngu kumaha mthumo wonewo. Moya wo ti ningetela wa Isaya njikombiso txa txinene ka malanda ya Jehovha nyamsi, aya ma ku ni wutixamuleli wo txhumayela ‘mahungu a manene a Mfumo hamafuni kotshe.’ (Matewu 24:14) Kufana ni Isaya, vona va txhumayela mahungu a manene ngu kuthembeka “kasiku matiko otshe me ti ziva,” hambiku vathu vo tala va si ma amukeliko mahungu oneyo. Ni ku, kufana ni Isaya vona va simama ve maha mthumo wuwa nguko va ti ziva ti to va ningilwe ngu Jehovha.

ip-1 95 ¶15-16

Jehovha a dithempeleni kwakwe ko sawuleka

Ngu msana, Jehovha a gete Isaya ati a ndi no ya gela vathu ni nzila yi vona va ndi no angula ngu yona. Jehovha a wombile tiya: “Tsula u ya gela vathu vava u txi khawe: Mi na engisa aniko kha mi na mbi ti pima; kha ditshuri mi na wona, aniko kha mi na mbi wonisisa.’ Bangisa timbilu ta vathu vava, u tsiva tinzeve tawe, vhala maso awe; kasi ku va si woni ngu maso awe, va si engisi ngu tinzeve tawe, va si pimisi ngu timbilu tawe, va nga thuka ve hunduluka, ve mana kuhanyiswa.” (Isaya 6:9, 10) Ina eto ti lava kuwomba ti to Isaya a ti fanete kuwombawomba ngu nzila yo va bhongela, e va maha ve tipfa va si amukelwi ngu Jehovha? Nadha! Phela Isaya a ti zumba ni vathu vonevo ni ku a ti va dhunda ngutu. Kambe mapswi a Jehovha ma kombisa nzila yi vathu va ndi no angula ngu yona, ti singa ni mhaka ni nzila yi Isaya a ndi no va gela ngu yona.

Vajudha ngu vona va nga ti onhete Jehovha. Isaya a ndi na wombawomba navo “makhambi o tala,” kambe vona va si na kuamukela nem va si na kupfisisa didungula donedo. Vavangi va ndi na bangisa timbilu, va si amukeli didungula, nga o va mabhofu mwendo maphanzeve. Ngu kuwombawomba navo makhambi o tala, Isaya a ndi na tumelela ti to “vathu” ve kombisa to kha va ti lavi kuengisa didungula. Ngu nzila yoneyo, vona va ndi na kombisa ti to kha va ti lavi kuengisa didungula adi Jehovha a nga gela Isaya ti to e ya va gela dona. Eto ta maheka ni nyamsi. Vathu vo tala nyamsi va lamba kuamukela mahungu a manene a Mfumo aya Tifakazi ta Jehovha ti ma txhumayelako.

ip-1 99 ¶23

Jehovha a dithempeleni kwakwe do sawuleka

Ngu kuthumisa mapswi a mprofeti Isaya, Jesu a txi kombisa ti to wuprofeti wonewo wu txi hetiseka ka masiku yakwe. Vathu ava va nga txi hanya ka mbimo ya Jesu va txi fana ni Vajudha ava va nga hanya ka timbimo ta Isaya. Vona va ti mahile mabhofu ni maphanzeve ngu kwambi engisa didungula da Jesu ni ku kota wuyelo va lovisilwe. (Matewu 23:35-38; 24:1, 2) Eto ti mahekile mbimo yi masotxhwa a Varoma aya ma nga txi thangelwa ngu disotxhwa di di dhanwako ku i Tito ma nga xasela Jerusalema ni kulovisa dithempele ngu 70 E.C. Kambe vamwani va ti engisile Jesu ve va valondeteli vakwe. Jesu a dhani vathu vonevo kota vathu vo “tsaka.” (Matewu 13:16-23, 51) Ene a ti va gete ti to mbimo yi va ndi no wona “Jerusalema a di randetwe ngu masotxhwa”, va di fanete ‘kututuma ve ya mimangoni.’ (Luka 21:20-22) Ngu nzila yoneyo “mbewu yo sawuleka” ayi yi nga ti kombisile likholo, yi va Israyeli wa moya, mwendo ku “Israyeli wa Txizimu,” yi hulukisilwe.—Vagalatiya 6:16.

Tithomba ta moya

w06 1/12 9 ¶4

Tithomba ta moya ta dibhuku da Isaya

7:3, 4—Ngu kutxani Jehovha a di hulukisile Akazi, mkoma awu a nga txi maha timhaka to biha? Mkoma wa Siriya ni mkoma wa Israyeli va ti mahile makungu o daya Akazi, awu i nga ti mkoma wa Judheya, ve mtxitxa ngu mwanana wa Tabheyali awu i nga ti singa wa liveleko la Dhavhidha. Eto ti ndi na onha kuhetiseka ka txitumelelano txa Mfumo, atxi Jehovha a nga txi maha ni Dhavhidha txa ti to Mesiya a ndi na ta ngu ka liveleko lakwe. Jehovha a hulukisile Akazi, kasi ku liveleko ali “Mkoma wa Kudikha” a ndi no velekwa ka lona li si fuviswi.—Isaya 9:6.

15-21 KA DEZEMBRO

TITHOMBA TA MU KA DIPSWI DA TXIZIMU ISAYA 9-10

“Liwoningo la hombe” ali li nga profetwa

ip-1125-126 ¶16-17

Txithembiso mayelano ni mkoma wa kudikha

“Magwito” aya ma nga profetwa ngu Isaya ma hetisekile mbimo yi Jesu a nga txi txhumayela hamafuni. Jesu a hetile mbimo yayingi a txi zumba Galileya. I vile Galileya amu Jesu a nga khata mthumo wakwe wo txhumayela, atxi: “Mfumo wa nzumani wu hafuhi.” (Matewu 4:17) Khe Galileya Jesu a mahile gondo yakwe ya mmangoni, a sawute vapostoli vakwe, a mahile txidiwukiso txakwe txo khata, ni ku a humelete ka 500 wa valondeteli vakwe msana kova a di wusilwe ka va kufa. (Matewu 5:1–7:27; 28:16-20; Marku 3:13, 14; Johani 2:8-11; 1 Vakorinto 15:6) Jesu a hetisisile wuprofeti wa Isaya ngu kuguleta “ditiko da Zebhuloni ni ditiko da Naftali.” Kambe ti hakubasani ti to Jesu kha ya txhumayela Galileya basi. Ngu kutxhumayela ka ditiko dotshe, Jesu ‘a guletile’ dotshe ditiko da Israyeli kupata ni Judheya.

Kambe hi nga womba txani ngu mapswi a Matewu aya ma ku “dilambu do woninga ngutu” da Galileya? Mapswi eyo ma wombilwe ngu mprofeti Isaya awu a nga bhala atxi: “Vathu va va nga ti tsimbila txidemani, va woni liwoningo la hombe; ni ka va va nga ti zumbile ditikoni ka mtsudi wa lifo, kuhumelete liwoningo txitimwi kwawe.” (Isaya 9:2) Ngu dilembe dizana do khata E.C, tigondo ta makuhu ti vhalete liwoningo la ditshuri. Vathangeli va wukhongeli wa txijudha va simamile ve vhalela liwoningo la ditshuri ngu kulondetela sihena sa mtumbuluko wawe, ve maha ti to “dipswi da Txizimu di si vhuni txilo.” (Matewu 15:6) Vathu va timbilu ta tinene va ti xaniswa ngu kulondetela vathangeli va “mabhofu.” (Matewu 23:2-4, 16) Mbimo yi Jesu a nga ta ha mafuni, maso a vathu va timbilu ta tinene ma tulekile. (Johani 1:9, 12) Mthumo wu Jesu a nga wu maha ha mafuni ni makatekwa ya ma tiswako ngu digandelo da lifo lakwe si txhamuselwa kota “dilambu do woninga ngutu” ka wuprofeti wa Isaya.—Johani 8:12.

ip-1126-128 ¶18-19

Txithembiso mayelano ni mkoma wa kudikha

Ava va nga tumela liwoningo va ti ni sivangelo sasingi so ve tsaka. Isaya a simama a womba tiya: “Awe u andisile vathu vava, u engetete kutsaka kwawe, votshe va na tsaka masoni kwako, ku nga tile va tsakisako tona va di kufunyelani, ni ti va tsakisako tona va di kuabanelani ka sile va nga handa.” (Isaya 9:3) Kota wuyelo ya mthumo wo txhumayela wa Jesu ni valondeteli vakwe, vathu va timbilu ta tinene va kombisile kunavela kukhozela Jehovha ngu moya ni ditshuri. (Johani 4:24) Mndani ka 4 wa malembe, vathu vavangi va tumete ku va Makristu. Se 3.000 wa vathu va bhabhatisilwe ngu Pentekoste ya 33 E.C. Ku di pindile mbimonyana, “mtengo wa vavamna va va nga kholwa wu to hoka kona mu ka 5.000.” (Mithumo 2:41; 4:4) Mbimo yi vagondiswa va nga ti ya masoni ve hiseka ka mthumo wo txhumayela, “mtengo wa vagondiswa wu txi engeteleka ngutu Jerusalema ni ku vaprista vavangi va to kholwa.”—Mithumo 6:7.

¹⁹ Kufana ni vadimi ava va tsakako va txi funyela, valondeteli va Jesu ni vona va ti tsaka mbimo yi va nga ti wona kuengeteleka ka vagondiswa. (Mithumo 2:46, 47) Ngu kutsimbila ka mbimo, Jehovha a mahile ti to liwoningo li woninga ni ka vamatiko. (Mithumo 14:27) Ngu nzila yoneyo, vathu va tixaka totshe va tsakile nguku va nga tulelwa nzila yo ve tshuketa ka Jehovha.—Mithumo 13:48.

ip-1128-129 ¶20-21

Txithembiso mayelano ni mkoma wa kudikha

Nga ha mapswi ya mprofeti Isaya ma kombisako ngu kona, wuyelo ya mthumo wa Jesu yi na va ya ngu ha ku si gumiko. Isaya a womba tiya: “Nguko awe u funyile dikange dile di nga ti nemela txitimwi kwakwe, ni limhika lile li nga ti va peka makatani kwawe, ndonga ya m’xanisi wawe, kufana ni ditshiku da Vamidhiyani.” (Isaya 9:4) Ka malembe amangi msana na Isaya a si se velekwa, Vamidhiyani va mahile makungu o xenga Vaisrayeli ti to ve maha txionho. (Mitengo 25:1-9, 14-18; 31:15, 16) Ngu kutsimbila ka mbimo, kudingana 7 wa malembe Vamidhiyani va dyisetile Vaisrayeli ngu ku va pela mitini kwawe ni tithembweni kwawe. (Valamuli 6:1-6) Kambe ngu kuthumisa Gidhiyoni, Jehovha a xute dibutho da masotxhwa a Vamidhiyani. Kha ku na wufakazi awu wu kombisako ti to msana ka “ditshiku da Vamidhiyani,” vathu va Jehovha va tshumete ve dyisetwa ngu Vamidhiyani. (Valamuli 6:7-16; 8:28) Ka mbimo yi tako Jesu Kristu i ku Gidhiyoni wa hombe, a na ta daya votshe valala va vathu va Txizimu. (Mtuletelo 17:14; 19:11-21) Se, “kufana ni ditshiku da Vamidhiyani,” ka mbimo yi tako valala va na ta xulwa i singa ngu mtamo wa vathu, kambe ngu mtamo wa Jehovha. (Valamuli 7:2-22) Se vathu va Jehovha va nambi ngadi kambe ve xaniswa ngu valala vawe!

Hambiku Jehovha a nga kombisa mtamo wakwe ngu kuvhuna malanda yakwe ti to me xula tiyimbi, eto kha ti lavi kuwomba ti to Ene wa tidhunda tiyimbi. Mbimo yi Jesu awu i ku Mkoma wa Kudikha a no lovisa valala vakwe, a na maha ti to hamafuni ku va ni kurula ngu ha ku si gumiko. Isaya a womba tiya mayelano ni tiyimbi: “Nguko otshe matxhari a vale va nga lwa yimbini, ni siambalo sile si nga phutela mnoha, si na rinzwa mndiloni, si txi hiswa.” (Isaya 9:5) Kha ku nambi thuka kupfala sigingi sa mabhota a masotxhwa ma txi ya yimbini. Kha ku nambi ngadi kambe ku txi wonwa siambalo sa masotxhwa asi si nga tala ngu mnoha. Kha ku na mbi swa ku txi maneka kambe tiyimbi!—Masalmo 46:9.

Tithomba ta moya

ip-1130 ¶23-24

Txithembiso mayelano ni mkoma wa kudikha

Didhota i m’thu wu a ningelako sialakanyiso ni kuvhuna vamwani. Mbimo yi Jesu a nga ti hamafuni, ene a ningete sialakanyiso so xamatisa. Bhiblia yi womba ti to “txitshungu txi to xamala txi txi kaye, ngu kupfa magondiselo akwe.” (Matewu 7:28) Jesu didhota adi di ku ni wutxhari, a ni wumbilu, ni ku wa yi pfisisa nzila yi vathu va nga wumbwa ngu yona. Sialakanyiso sakwe hi nga so laya ni kutsayisa basi. Makhambi amangi sialakanyiso sakwe nzo gondisa ni ku a si ningela ngu nzila ya lirando. Sialakanyiso sa Jesu sa xamatisa nguko mbimo yotshe nza wutxhari, nzo hetiseka ni ku kha si pindelwi ngu nguva. Ngako hi txi si thumisa, si na hi yisa ka wutomi wo mbi guma.—Johani 6:68.

Hi nga ngu wutxhari wakwe Jesu a nga ti sikota kuningela sialakanyiso sa sinene. Jesu apune a wombile tiya: “Ati ni ti gondisako hi nga tangu, kambe ti lumba awu a nga ni rumela.” (Johani 7:16) Kufana ni ti a nga mahela Solomoni, Jehovha ngene a nga ninga Jesu wotshe wutxhari. (1 Vafumeli 3:7-14; Matewu 12:42) Txikombiso txa Jesu txi fanete kukuzeta madhota dibanzani ti to me thumisa Dipswi da Txizimu ngako ma txi lava kuningela txialakanyiso.—Mavingu 21:30.

22-28 KA DEZEMBRO

TITHOMBA TA MU KA DIPSWI DA TXIZIMU ISAYA 11-13

Ngu tihi ati Bhiblia yi ti wombako mayelano ni Mesiya awu a ndi no ta?

ip-1159 ¶4-5