Mkombelo wu nga kuvhunisa kutxani

Mbimo yi Pamela a nga tumbula ti to a ti ni câncro, a lavile txivhuno txa dhokodhela. Kambe ene a tshumete e maha mkombelo ka Txizimu e kombela mtamo wo e wonisana ni txiemo txile txo karata. Ina mkombelo wu m’vhuni?

Pamela a womba tiya: “Ka mbimo yi ni nga txi thumwa câncro, makhambi a mangi ni txi thava. Kambe mbimo yi ni nga txi maha mkombelo ka Jehovha Txizimu, ni txi pfa kuthutha ni ku ni txi sikota kuwonisana ni txiemo txile ni si thavi. Ani ni ngadi txi pfa kupanda, kambe mkombelo wa ni vhuna ku ni simama ni di tsani. Kambe ngako vathu va txi ni wotisa va txi wo txani ani ni khani: ‘Ani kha ni nga mtomi bhem, kambe ni tsakile.’”

Ti hakubasani ti to, kha ti lavi ku hi emela siemo so karata ngutu ka wutomi wathu kasi ku hi maha mkombelo. Hotshethu ha wonisana ni sikarato, sa hombe mwendo sa sidotho, ni ku makhambi a mangi hi lava txivhuno kasi ku hi kota kuwonisana naso. Ina mkombelo wu na hi vhuna?

Bhiblia yi womba tiya: “Veka wutomi wako manzani ka MKOMA se ene a na kuxayisa, txima kha na mbi leka m’thu wo lulama e xaniseka yotshe mbimo.” (Masalmo 55:22) Ta thavelela kuziva eto! Se mkombelo wu nga kuvhunisa kutxani? Mbimo yi u mahako mkombelo ka Txizimu ngu nzila yi txi yi tsakelako, txi na kuninga ati u ti lavako kasi ku u kota kuwonisana ni sikarato sako.—Wona dikwadro adi di ku “Makatekwa aya u nga ma manako ngu konaha ka mkombelo.”

Makatekwa aya u nga ma manako ngu kona ha ka mkombelo

Kurula ka mialakanyo

“Aniko mikombelo yanu yi na kombe minavelo yanu ni kubonga kwanu ka Txizimu. Sekoko kuthutha ka Txizimu, kupindako wotshe wuzivi, ku na veketa timbilu tanu ni mialakanyo yanu ngu Kristu Jesu.” (Vafilipiya 4:6, 7) Ngako u txi bhulela Txizimu sikarato sako, txona txi na kuvhuna ku u mana kurula ni kuziva ati u nga ti mahako hambi ka siemo so karata.

Wutxhari

“Se ngako mmweyo wanu a txi pwata wutxhari a na wu kombele ka Txizimu, atxi txi ningako votshe vathu ngu wunene, na txi si feleli, a na ningwa.” (Jakobe 1:5) Mbimo yi hi wonisanako ni sikarato sa hombe, hi nga mbimo yotshe ti hehukako kumaha sisungo sa sinene. Ngako u txi maha mkombelo ka Txizimu u txi kombela wutxhari, txona txi nga kuvhuna kukhumbula sialakanyiso sa sinene asi si ku mu ka dipswi da txona, i ku Bhiblia.

Mtamo ni thavelelo

“Totshe na ti kota, ngu kutsaniswa ngu wule a ni ningako mtamo.” (Vafilipiya 4:13) Jehovha Txizimu txa mtamo wotshe. Ngu toneto a nga kuninga mtamo awu u wu lavako kasi ku u wonisana ni sikarato mwendo ku si tsanisela. (Isaya 40:29) Bhiblia yi womba ti to Jehovha “Txizimu txa kotshe kuthavelela.” Txona txi nga hi thavelela “ka sotshe sixaniso sathu.”—2 Vakorinto 1:3, 4.