U nga maha txani ti to u ta hanya ka mafu a maphya?

Ka gondo ayi hi nga yi wona ka mapajina ya msana hi woni ti to Txizimu txi na fuvisa wotshe wubihi hamafuni kumweko ni sikarato. Tsaniseka ti to eto ti na maheka, ngu kutxani? Nguko Dipswi da Txizimu i ku Bhiblia da thembisa tiya:

“Ditiko da pinda.”—1 JOHANI 2:17.

Mbimo yi Txizimu txi no fuvisa vabihi ku ni va va no huluka nguko vhersi yoyi ya yimweyo ya thembisa tiya:

“Awu a mahako kuranda ka Txizimu, a zumba ngu ha ku si gumiko.”

Ngu toneto ti to hi huluka hi fanete hi maha kuranda ka Txizimu. Kasi kuziva ti to kuranda ka Txizimu ngu kuhi hi fanete kukhata ngu ku txi ziva.

NZILA YO HULUKA NGU “KUZIVA” TXIZIMU

Mifota: 1. Emfermera a di sibhejela a di khalahatshile a di karate 2. E huma intervhalo e ya peka kafe, e wona mthumi kolowe a di tsakile a txi lera direvhista. 3. Mthumo wule a mu lerela Bhiblia ni ku mu ninga kartawu ya site ya jw.org.

Jesu a wombile tiya: “Wutomi wo mbi guma ngu kuva va txi kuziva, awe, u ku Txizimu txa tximwetxo txa ditshuri.” (Johani 17:3) Kasi ku hi ta huluka mbimo yi ku no hoka magwito ni kutshumela hi ta hanya hi si fi mbimo yi yi tako hi fanete “kuziva” Txizimu. Atiya hi nga kuwomba basi ti to m’thu wa txi ziva Txizimu, kambe ti womba kuziva to tala ngu ngene. Hi fanete kuva ni wuxaka nayo kufana ni ku ngako hi txi maha wuxaka ni m’thu ti lavako hi tiha mbimo, ngako hi txi lava kumaha wuxaka ni Txizimu ni tona ti lava mkama. Wona tigondo ta lisima ati hi ti manako a mu ka Bhiblia ati ti nga hi vhunako kuva ni wuxaka ni Txizimu.

Tigondo ati hi ti manako amu ka Bhiblia

Hi gonda ti to Txizimu txi txi lava ku vathu ve hanya Parayiso.

Txizimu txi mahile Adhamu ni Evha e va veka ka wukhalo wo tshura ngutu awu wu nga txi dhanwa ku i Jaradhi ya Edheni. Vona va si na sigoho ni ku Txizimu txi di va ningile sotshe si va nga txi si lava ti to ve hanya wutomi wo tsakisa. I tiko va to ko simama ve va ni wuxaka ni Txizimu, vona va si nga fa. Kambe vona kha va maha toneto, va sawute kwa mba engisa milayo ayi Txizimu txi nga di va ningile.

Hi gonda ti to ngu kutxani hi txi xaniseka.

Aku Adhamu ni Evha va nga mbi engisa Txizimu, va luzeketwe ngu wutomi wo mbi na magwito. Se ti mahile ti to ni nathu hi tumbunukako kwakwe hi fa. Bhiblia yi womba tiya: “Ngako txionho txi nga wulela ha ditikoni ngu mhaka ya m’thu wa mmweyo, ngu msana ku txi wulela lifo, ngu toneto lifo nilona li wulelete votshe vathu.” (Varoma 5:12) Kufana ni m’thu awu a nga velekwako e tekelela vaveleki vakwe nathu hi tekelete vaveleki vathu Adhamu ni Evha ngu toneto ha maha sigoho. Ngu toneto ha kumba ni kufa.

Hi gonda ti Txizimu txi nga maha ti to txi hi vhuna.

Bhiblia yi khene: “Txizimu txi kombile lirando ka vathu, ahawa txi nga za txi ningela Mwanana wa txona wa Mmweyo ekha, kufela ku, votshe va va no kholwa kwakwe, va si lovi, aniko va na mana wutomi wo mbi guma.” (Johani 3:16) Txizimu txi rumete Jesu ti to a ta hi fela. Wamwamna mmwani a dhanwako ku i Prabhakar wa Índia aku ni 86 wa malembe a txi pimisa ngu lirando la Txizimu a womba tiya: “Lirando la Jehovhaa li ni ninga themba yo ta hanya ni si fi.”

Hi gonda nzila yo kombisa ku bonga ati Txizimu txi nga hi mahela.

Bhiblia yi womba ti to hi nga sikota kukombisa kubonga ti Txizimu txi nga hi mahela ngu ‘kuveketa milayo yakwe.’ (1 Johani 2:3) Aku Jehovha Txizimu a hi randako ene wa hi gela ti hi nga ti mahako kasi ku hi hanya wutomi wo tsakisa konkuwa. (Isaya 48:17, 18) Txizimu kha txi lavi ti to hi xaniseka. Ene a thembisa ti to ngako hi txi maha kuranda ka txona kha hi na mbi hanya wutomi wo tsakisa dwe kambe hi na ta hanya hi si fi mbimo ayi yi tako.

GONDA DIPSWI DA TXIZIMU DITSHIKU NI DITSHIKU

Emfermera wule a txi wona nzumani msana ko va a di lerile Bhiblia ka mbimo ya interhalo mthumoni. — Ti to u huluka mbimo yi mafu ma no ta fuviswa ti lava u maha mkombelo u kombela txivhuno ka Txizimu ni kumaha kuranda ka txona

Hi dya sakudya ditshiku ni ditshiku ti to hi hanya. Kambe Jesu a wombile tiya: “M’thu kha na kuhanya ngu dipawu basi, kambe a hanya ngu otshe mapswi awa ma wombwako ngu Txizimu.”—Matewu 4:4.

Nyamsi hi nga gonda ngu Jehovha amu ka Bhiblia. Mbimo yi u lerako dibhuku diya do sawuleka u na gonda timhaka ta lisima mayelano ni vathu va kale, va makono ni ti Txizimu txi no mahela vathu mbimo ayi yi tako.

KHONGELA KA TXIZIMU PARA TXI KUVHUNA

Se u nga maha txani ngako u txi zama kuleka to kari ati Txizimu txi wombako ti to ti bihile u txi tandeka? Ti di nga eto kuziva kwati Txizimu ti nga kuvhuna ngutu.

He woni txikombiso txa wa msikati a dhanwako ku i Sakura awu a nga ti dhunda kuotela ni majaha. Mbimo yi a nga khata kugonda Bhiblia ene a gondile ti to Txizimu txi lava ti to hi ‘thava wugelegele.’ (1 Vakorinto 6:18) Sakura a khongete ka Txizimu ti to txi mninga mtamo kasi ku e leka kuotela ni majaha, hambi keto ene a nga di a txi lwa ni minavelo yo la kuotela ni vavamna. Ene a womba tiya: “Ngako yi txi ta minavelo yo maha ta walo ni khongela ka Jehovha nguko na ti ziva ti to kha ni na ku sikota ku xula txikarato txiya nokha. Kumaha mkombelo ti ni vhuni ku ni va ni wuxaka ni Jehovha.” Vathu vo tala va gonda ngu Txizimu kufana ni Sakura. Txizimu txa ninga mtamo vathu vonevo ti to ve maha kutxitxa ka wutomi wawe kasi ku ve hanya ngu nzila ayi yi tsakisako Txizimu.—Vafilipiya 4:13.

Ngako u txi ziva Txizimu nanawe u na ‘ziwa’ ngu txona u va ni wuxaka natxo. (Vagalatiya 4:9; Masalmo 25:14) U txi maha toneto u na faneleka ku u ta hanya ka mafu a maphya. Se mafu a maphya ma na zumbisa ku txani? Gondo ayi yi londiselako yi na txhamusela mhakeyo.

a Bhiblia yi kombisa ti to Jehovha ditina da Txizimu.