Wuseta wuxaka wako ni Jehovha

DILEMBE ni dilembe tinvuta to tala ta Jehovha ta wuyela dibanzani. Toneto ti tisa “litsako la hombe” nzumani. (Luka 15:7, 10) Ngako u di wuyisilwe dibanzani, tsaniseka ti to Jesu, tingelozi, Jehovha va tsaka ngutu kukuwona u txi wuseta wuxaka wako ni Txizimu. Kambe mbimo yi u mahako toneto ti nga maha u tshangana ni sikarato. Ngu sihi sikarato sa kona, u nga si xulisa kutxani?

NGU SIHI SIKARATO U NGA TSHANGANAKO NASO?

Vanathu vo tala va simama ve godhola hambi msana kova va di wuyisetwe dibanzani. Konkuwa ti nga maha u txi ti pfisisa to ngu kutxani Dhavhidha a di wombile mapswi ya ma ku: “Sa simama sionho kwangu.” (Mas. 40:12; 65:3) Phela Dhavhidha a wombile mapswi yawa msana kova Jehovha a di mu divalete ka sionho sakwe. Msana kova m’thu a di tshumelete ka Jehovha, ti nga maha m’thu a tipfa mnando mwendo tingana kudingana malembe o tala. Isabelle, a hetile 20 wa malembe a di thavisilwe dibanzani.a Ene a womba tiya: “Ni txi tipfa ti txi ni karatela ku kholwa to Jehovha a ni divalete.” Ngako u txi godhola ti nga maha u hola ngu didhawa da moya. (Mav. 24:10) Ngu toneto, zama ku eto ti si maheki kwako.

Vamwani va nga dhukiswa va txi pimisa ngu mithumo yi yi patekako ko wuseta wuxaka wawe ni Jehovha. Antoine msana ko va a di wuyisetwe dibanzani a womba tiya: “Ni ti tipfa nga to tala ti ni nga ti tiziva ni si se thaviswa dibanzani se ni ti ti divate.” Ngu kona ha ka mipimiso yoneyo, vamwani ta va karatela ku ve pateka ka mithumo ya moya.

Alakanyisisa ngu m’thu wu a ku ni nyumba yo tshura ayi yi haxulwako ngu txingulo, u pimisa to a ti pfisa kutxani? Ene ti nga mnemelela ngutu a txi pimisa ngu ti ti lavekako kasi kuwuseta nyumba yoneyo. Ngu ha kufanako, ngako wuxaka wako ni Jehovha wu di haxutwe ngu kona ha ka txionho txako txa hombe, ti nga maha ti kukaratela u txi pimisa ngu ti ti lavekako kasi kuwuseta wuxaka wako ni nene. Kambe txiho txivhuno.

Jehovha wa hi ramba a txi khene: “Sekoko ngonani hi ta wombawombisana [hi ta lulamisa timhaka, NM].” (Isaya 1:18) Jehovha wa kuranda ngutu ngu ku se u mahile dizambo do khata da lisima i ku ku “lulamisa timhaka.” Aku u nga tshumelela u ya ka Jehovha, Jehovha a nga kuthumisa kasi kukombisa ti to Sathani m’hembi!—Mav. 27:11.

Kuva se u di tshumelete ka Jehovha, e to ti komba to u tshuketile hafuhi nayo, se ene a thembisa ti to a na maha ti ti fanako i ku kutshuketa hafuhi ni nawe. (Jak. 4:8) Tinene ku vanathu dibanzani ve kuwona ti to u wuyete, kambe ti lava u maha timwani to pinda eto. Ti lava u tsanisa lirando lako ngu Tate wako i ku mngana wako Jehovha. U nga mahisa kutxani toneto?

TI VEKELE MAKUNGU A YA U NO MA HOKELELA

Zama ku ti vekela makungo a ya u no sikota ku va u txi ma hokelela. Ti hakubasani ti to u nga di u txi ti khumbula tigondo ta makhato a ti u nga ti gonda mayelano ni Jehovha ni ngu sikongomelo sakwe sa mbimo yi yi tako. Kambe, ku va ni mahanyelo a Wukristu ti womba ti to u fanete kuhiseka ka mthumo wo txhumayela ni kuya mitshanganoni ni kutshumela u ti tshanganisa ni vanathu. Wona makungo mamwani a ya u nga ma hokelelako.

Bwabwata ni Jehovha mbimo yotshe. Tate wako Jehovha wa ti ziva ti to aku u ku ngadi kuhuma ka txikarato txiya ti nga kukaratela kumaha mkombelo. (Var. 8:26) Hambiketo “simama kukhongelani” u gela Jehovha ti to wa ti lava ngutu ku va mngana wakwe. (Var. 12:12) Andrej a womba tiya msana kova a di wuyisilwe dibanzani: “Ni txi tipfa ngutu mnando ni tingana. Kambe mbimo yi ni nga txi maha mkombelo, matipfelo oneyo ma txi hunguka, ni ti tipfa kurula mbiluni.” Ngako u si tizivi to u na womba txani ka mkombelo, alakanyisisa ngu mkombelo wu Dhavhidha a nga maha wu ku ka Masalmo 51 ni 65 msana kova a di tisote ka sionho sakwe.

Gonda Bhiblia. A tiya ti na kuvhuna ku u va ni likholo lo tsana ni kutshumela ti kuvhuna kukulisa lirando lako ngu Jehovha. (Mas. 19:7-11) Felipe a womba tiya: “Kupwata txiemiso txa timhaka ta moya ngu tona ti nga ni maha ti to ni hola ngu didhawa da moya ni kutshumela ni tshuralela Jehovha. Kha ni lavi kutshumela ni maha kambe phazamo yi ya, se ni mahile txisungo txo tshumela ni va ni gondo yangu nipune, kasi ku yi va txivhikelo.” Nanawe u nga maha ti ti fanako. Ngako u txi la txivhuno kasi kuziva to ngu tihi timhaka a ti u nga ti thumisako ka gondo yako upune u nga kombela mwanathu wu a nga wu a nga vitwa ti to e kuvhuna?

Wuseta wuxaka wako ni vanathu dibanzani. Vamwani ava va wuyelako dibanzani va karateka va txi pimisa ti to vanathu va na va wonisa kutxani. Larissa a womba tiya: “Ani ni ti ni tingana ni txi thava ni txi pimisa to vanathu dibanzani va na tipfa nga ni va gohete ngutu. Ni hetile mbimo yo lapha ni txi lwisana ni matipfelo yawa.” Tsaniseka ti to madhota ni vanathu vamwani vo vitwa va na kuvhuna ti to u wuseta wungana wako ni Jehovha. (Wona dibhokiso di di ku: “Madhota ma nga maha txani?”) Vona va tsaka ngutu a ku u nga tshumelela ka Jehovha ni ku va ku navelela ta tinene!—Mav. 17:17.

Nji txani txi ngako vhunako ti to u wuseta wuxaka ni vanathu? Pateka ka mthumo wo txhumayela ni kuxalela mitshangano. Eto ti na kuvhuna. Ngu nzila muni? Felix a womba tiya: “Vanathu dibanzani va tsakile ngutu mbimo yi ni nga wuyela. Ni ti pfite ni di wa lisima, vona va ni vhuni ti to ni tipfa ni txi lumba dibanza ni kutipfa ni di divaletwe ni ku tiemisela ku ya masoni.”—Wona dibhokiso di di ku: “Awe u nga maha txani?”

U NGA REREKI!

Sathani a na zama kukukaralisela mbimo yi u zamako kuwuseta wuxaka wako ni Jehovha. (Luka 4:13) Tiemisele kutsanisa wuxaka wako ni Jehovha konkuwa.

Jehovha a thembisa tiya ka tinvuta takwe: “Ni na tsimbila ni lava yi le yo mwalala, kambe ni na yi wuyisa yi le yo penga, ni txi tsanisa yi le yo khudukiswa ngu kuthuma yile yo lwala.” (Eze. 34:16) Jehovha a vhunile vathu vo tala ava va nga di thavisilwe dibanzani ti to ve wuka ngu didhawa da moya. Tsaniseka ti to ene a na kuvhuna ti to u simama u wuseta wuxaka wakwe ni nene.