He tsaniseni likholo lathu ka txithembiso txa Jehovha txo tisa mafu a maphya

1-2. Ngu tihi ti hi fanelako kumaha hi txi ngadi hi emela mafu a maphya?

ATHU ha ninga lisima txithembiso txa Jehovha txo phindula mafu me va a maphya. (2 Pedro 3:13) Hambiku hi si ti ziviko to txithembiso txiya txi na maheka ditshiku kambe ati ti mahekako nyamsi ti kombisa ti to ti na mbi swela.—Mat. 24:32-34, 36; Mith. 1:7.

² Ti singa ni mhaka ti to hi ni malembe mangahi hi di Tifakazi, hotshethu ti lava hi tsanisa likholo lathu ka txithembiso txiya. Ngu kutxani? Nguko likholo lo tsana li nga thuka li hola. Paulo a fananisile kuhola ka likholo ni “txionho txi txi hi namarelako.” (Vaheb. 12:1) Kasiku likholo lathu li si holi tilava mbimo yotshe hi xolisisa simahakalo si si kombisako ti to txithembiso txa mafu a maphya txi na maheka ngu ditshuri.—Vaheb. 11:1.

3. Hi na bhula ngu txani ka gondo yiya?

³ Ka gondo yiya hi na bhula ngu tinzila tiraru ati hi nga tsanisako ngu tona likholo lathu ka txithembiso txa Jehovha txa mafu a maphya: 1) ngu kualakanyisisa ngu mtirulo, 2) ngu kualakanyisisa ngu mtamo wa Jehovha, 3) ni kuheta mbimo yo tala hi di ka mthumo wa Jehovha. Hi na bhula ngu nzila yi didungula di Jehovha a nga gela Habhakuki di tsanisako ngu yona likholo lathu nyamsi. Konku he khati ngu kuxolisisa siemo simwani asi hi nga wonisanako naso asi si lavako hi tsanisa likholo lathu ka txithembiso txa ku ta ka mafu a maphya.

SIEMO SI SI LAVAKO LIKHOLO LO TSANA

4. Ngu sihi sisungo asi si lavako likholo lo tsana?

⁴ Ditshiku ni ditshiku ha maha sisungo asi si lavako likholo lo tsana. Ngu txikombiso ha maha sisungo mayelano ni kusawula vangana, misakano, ta txikolwa, mtxhadho, vanana ni mthumo wo ti hanyisa. Nda lisima kutiwotisa tiya, ‘Ina mahanyelo angu ma kombisa ti to na tsaniseka to i singa kale Jehovha a na thavisa mafu awa o biha e tisa mafu a mphya? Mwendo mahanyelo angu ma fana ni a vathu ava va si ngako ni themba yo hanya ngu ha ku si gumiko mbimo yi yi tako?’ (Mat. 6:19, 20; Luka 12:16-21) Ngako hi txi tsanisa likholo lathu ti na hi vhuna kumaha sisungo sasinene asi si no kombisa to ha kholwa ku mafu a maphya ma na hoka i singa kale.

5-6. Ngu kutxani hi txi lava likholo lo tsana ka timbimo ta sikarato? Ningela txikombiso.

⁵ Ha tshumela hi wonisana ni sikarato asi si lavako ti to hi va ni likholo lo tsana. Hi nga manana ni kuxaniswa, malwati o mbi pinda, mwendo timhaka timwani ati ti nga hi godholisako. Makhatoni ti nga woneka nga ta hehuka kutsanisela sikarato soneso. Kambe ngako si txo simama mbimo yo lapha ti nga lava hi simama hi tsanisa likholo lathu kasiku hi thumela Jehovha ngu litsako.—Var. 12:12; 1 Pedro 1:6, 7.

⁶ Ngako hi di mndani ka sikarato hi nga tipfa nga mafu a maphya a Jehovha ma na mbi hoka. Ina eto ti womba to likholo lathu li hote? Hi nga mbimo yotshe. Wona txikombiso txiya. Hi di ka mbimo yo titila ngutu hi nga thuka hi pimisa to yi na mbi hoka mbimo yo hisa. Kambe ha tsaniseka to ku na hoka ku hisa. Ngu ha ku fanako, hi di godhote hi nga thuka hi pimisa to mafu a maphya ma na mbi hoka. Kambe ngako hi di ni likholo lo tsana ha tiziva to sithembiso sa Jehovha si na maheka. (Mas. 94:3, 14, 15; Vaheb. 6:17-19) Themba yoneyo ya hi vhuna kusimama hi thangetisa wukhozeli wa Jehovha ka wutomi wathu.

7. Ngu yahi mawonelo ya hi fanelako ku ma vayilela?

⁷ Wukhalo wumwani wu ti lavako hi va ni likholo lo tsana nga mthumo wo txhumayela. Kutala ka vathu va hi va txhumayelako ‘mahungu a manene’ mayelano ni ku ta ka mafu a maphya a Txizimu kha va kholwi to eto ditshuri. (Mat. 24:14; Eze. 33:32) Se ti lava hi tiwonela to hi si tshapelwi ngu mawonelo awe. Kasi kuvayilela toneto ti lava hi simama hi tsanisa likholo lathu. He wone tinzila tiraru ati ti nga hi vhunako kumaha toneto.

ALAKANYISISA NGU MTIRULO

8-9. Kualakanyisisa ngu mtirulo ti tsanisisa kutxani likholo lathu?

⁸ Kualakanyisisa ngu mtirulo i nzila yimwani yo tsanisa likholo lathu. Phela mtirulo txitsanisekiso txa ti to sithembiso sa Jehovha si na maheka ngu ditshuri. Kualakanyisisa ngu totshe ti nga pateka kasi ku mtirulo wu ningelwa ti nga tsanisa likholo lathu ka ti to txithembiso txa Jehovha txa wutomi wo mbi guma ka mafu a maphya txi na hetiseka. Ngu kutxani hi txi womba toneto?

⁹ Ngu tihi ti ti nga pateka ka mtirulo? Jehovha a ningete mwanana wakwe wa matiwula mngana wakwe wa hombe kasiku e ta velekwa hamafuni kota wo hetiseka. Mbimo yi a nga ti ha mafuni ene a tsanisete yotshe mixowo ya sikarato. Ene a xanisekile e tshumela e fa ngu nzila yo panda ngutu. Jehovha a hakete mtengo wa hombe! Txizimu txathu txa lirando txi sa tumelela mwanana wa txona ti to e xaniseka ni ku fa ti to hi hanya ta mbimonyana. (Joh. 3:16; 1 Pedro 1:18, 19) Aku a nga hakela mtengo wa hombe ngu kuningela mwanana wakwe ene a txi hi tsanisekisa ti to hi na mana wutomi wu si gumiko ka mafu a maphya.

ALAKANYISISA NGU MTAMO WA JEHOVHA

10. Ngu kuya ngu Vaefesu 3:20, ngu tihi ti Jehovha a tikotako kumaha?

¹⁰ Nzila ya wumbidi yo tsanisa likholo lathu ngu alakanyisisa ngu mtamo wa Jehovha. Ene a ni mtamo wo hetisisa sotshe sithembiso sakwe. Vo tala va pimisa to ti nge koteki ku hi mana wutomi wo mbi guma ka mafu a maphya. Kambe mbimo yotshe Jehovha a maha sithembiso asi vathu va si na kusikota ku si hetisisa. Nguko ene Txizimu txa mtamo. (Jobe 42:2; Marku 10:27) Ngu toneto kha hi xamali ngako a txi hi mahela sithembiso so tsakisa.—Lera Vaefesu 3:20.

11. Ningela txikombiso tximwetxo txa sithembiso so xamatisa sa Txizimu. (Wona dibhokiso di di ku “Sithembiso simwani so xamatisa asi si nga tatiseka.”)

¹¹ Wona sithembiso si Jehovha a nga thembisa malanda akwe a kale asi si nga txi woneka nge si nge hetiseki. Ene a thembisile Abrahamu ni Sara ti to va di na va ni mwanana hambiku va nga di kute ngu tanga. (Gen. 17:15-17) A tshumete e thembisa Abrahamu ti to adi na ninga liveleko lakwe ditiko da Kanana. Mbimo yi liveleko la Abrahamu i ku Vaisrayeli va nga heta malembe o tala i di sibotxhwa a khe Egipta ti txi woneka nga txithembiso txiya txi na mbi maheka. Kambe ti mahekile. Msana keto, Jehovha a gete Izabheli wu a nga ti kute ngu tanga ti to a ndina va ni mwanana. A tshumete e gela Mariya wa mbiri ti to a ndina veleka Mwanana wa Txizimu eto ti ndi na hetisisa txithembiso txi Jehovha a ngadi txi mahile kudingana malembe o tala khe jaradhi ka Edheni!—Gen. 3:15.

12. Ngu tihi ti dibhuku da Joxuwa 23:14 ni da Isaya 55:10, 11 ma hi tsanisekisako ka tona mayelano ni mtamo wa Jehovha?

¹² Hi nga tsanisa likholo lathu ka mtamo wa Jehovha ngu kualakanyisisa ngu sotshe sithembiso si a nga si maha ni nzila yi a si hetisisako ngu yona. (Lera Joxuwa 23:14; Isaya 55:10, 11.) Eto ti na hi maha hi tiemisela kuvhuna vamwani ve pfisisa to txithembiso txa Jehovha txa mafu a maphya hi nga mloro mwendo sitoriya. Jehovha a wombile apune mayelano ni nzuma ya yiphya ni mafu a maphya atxi: “Bhala, nguko mapswi awa ngo thembeka ni a ditshuri.”—Mtu. 21:1, 5.

TININGETELE NGUTU KA TIMHAKA TA MOYA

13. Mitshangano ya dibanza yi nga tsanisa likholo lathu ngu nzila yihi?

¹³ Nzila ya wuraru hi nga tsanisako likholo lathu ngu tiningetela ka timhaka ta moya. Ngu txikombiso alakanya nzila yi hi wuyelwako ngu yona ngu mitshangano ya dibanza. Ana, a wu a nga heta malembe o tala a txi thuma ka makhalo o hambana ka mthumo wa mbimo yotshe a womba tiya: “Mitshangano ya ni vhuna kusimama ni tsanisa likholo langu. Hambi i di ti to mwomba-wombi kha nga ni wusikoti wo gondisa mwendo a txi womba timhaka ti se ni tizivako, mbimo yi ni engiselako ta ni vhuna ku ni thavisa gondo yo kari ayi yi ni vhunako kupfisisa ditshuri da mu ka Bhiblia, se eto ta tsanisa likholo langu.”b Likholo lathu la tsana mbimo yi hi engiselako tixamulo ti ti akako ta vanathu mitshanganoni.—Var. 1:11, 12; 10:17.

14. Mthumo wo txhumayela wu tsanisa likholo lathu ngu nzila yihi?

¹⁴ Hi tshumela hi tsanisa likholo lathu mbimo yi hi patekako ka mthumo wo txhumayela. (Vaheb. 10:23) Barbara awu a thumelako Jehovha kupinda 70 wa malembe a womba tiya: “Mbimo yotshe mthumo wo txhumayela wa tsanisa likholo langu. Mbimo yi ni yako ni bhula ni vamwani mayelano ni sithembiso so xamatisa sa Jehovha, likholo langu li ya li wuka li tsana tatinene.”

15. Gondo yathu hipune yi nga tsanisa likholo lathu ngu nzila yihi? (Wona ni mifota.)

¹⁵ Wona timwani ati ti nga tsanisako likholo lathu. Gondo yako upune. Susan a vhunekile mbimo yi a nga ti mahela txiemiso txa ti a no ti gonda. Ene a womba tiya: “Ngu Sonto ni wuseta Muwoneleli wa divhiki di di londiselako. Ngu Segunda ni Terça ni lulamisela mitshangano ya hagari ka divhiki. Kasi masiku ya ma salako ni ma vekisela para gondo yangu nipune.” Aku Susan a simamako ni txiemiso txakwe txa gondo, ene wa tsanisa likholo lakwe. Irene awu a nga thuma malembe o tala khe mzinda ka ha mafuni kotshe, a tsanisile likholo lakwe ngu kugonda ta wuprofeti wa mu ka Bhiblia. Ene a womba tiya: “Ta xamatisa kuwona wuprofeti wa Jehovha wu txi hetiseka ka totshe ti a nga ti womba.”c

“KHA DITSHURI TXI NATA”

16. Ngu kutxani txitsanisekiso txi Jehovha a nga gela Habhakuki txi di ni txhamuselo kwathu nyamsi? (Vahebheru 10:36, 37)

¹⁶ I kale malanda a Jehovha ma di emete kuwona kugumiswa ka mafu yawa. Kambe ngu kuya ngu mawonelo a vathu kuhetiseka ka txikongomelo txa Txizimu ti ti komba nga ka swela kumaheka. Jehovha a womba-wombile mayelano ni toneto mbimo yi a nga tsanisekisa mprofeti Habhakuki: “Nguko txiwoniso njo dingana mbimo yo kari, se kala magwito txi na womba-womba, kha txi na mbi hemba; ngako txiwoniso txi txi swela, txi verele, nguko kha ditshuri txi nata, kha txi na mbi swela!” (Hab. 2:3) Ina txi tsanisekiso txiya a txo gela Habhakuki dwe mwendo dipswi dakwe di ni txhamuselo nyamsi? Ngu kususumetwa ngu moya wo sawuleka mpostoli Paulo a thumisile mapswi awa ka Makristu ya ma nga ti emete mafu a maphya. (Lera Vahebheru 10:36, 37.) Hambi txithembiso txo hulukisa vathu txi woneka nga txa swela hi nga tsaniseka to “kha ditshuri txi nata. Kha txi na mbi swela!”

17. Mwanathu mmwani wa txisikati a txi thumisisile kutxani txialakanyiso txi Jehovha a nga ninga Habhakuki?

¹⁷ Malanda o tala a Jehovha ma thumisile txialakanyiso txo “simama ma txi wonelela” kudingana malembe o tala. Ngu txikombiso Louise a khatile kuthumela Jehovha ngu dilembe da 1939. Ene a womba tiya: “Ka mbimo yoneyo ni ti pimisa to Armagedhoni yi ndina hoka ni si se heta txikolwa txa Secundária. Kambe eto kha ta maheka. Kudingana malembe o tala ni gondile ngu matimu a Bhiblia aya ma womba-wombako ngu vathu ava va nga rinzela to Jehovha e hetisisa sithembiso sakwe, eto ti ni vhuni ku nani ni emela Jehovha e hetisisa sithembiso sakwe. Ni khatile kugonda ngu Nowa, Abrahamu, Josefa ni vamwani ava ti nga lava ve rinzela kudingana mbimo yo lapha va si se mana hakhelo yawe ka Jehovha. Kusimama ni txi wonelela ti vhuni ani ni vamwani hi tsaniseka ti to mafu a maphya ma hafuhi.” Kutala ka va va thumelako Jehovha ngu mbimo yo tala va tumelelana ni mapswi yawa!

18. Kuwonisisa kwati mtumbuluko ti nga tsanisisa kutxani likholo lathu mayelano ni txithembiso txa mafu a maphya?

¹⁸ Ditshuri ti to mafu a maphya kha ma se hoka. Kambe a walo wu a kana-kanako ti to tinyeleti, mindonga, sihari ni vathu nza ditshuri. Hambiku ku ngadi ni mbimo a yi silo soneso singa si ngaho. Kambe konku siho, nguko Jehovha a si vangile. (Gen. 1:1, 26, 27) Jehovha a ni txikongomelo txo tisa mafu a maphya. Ngu ditshuri a na txi hetisisa txikongomelo txiya. Ka mafu a maphya, vathu va na ta tidila ngu wutomi wo mbi guma ni dihanyo da dinene. Hi nga tsaniseka ti to mafu a maphya ma na hoka ngu mbimo yi Jehovha a nga yi veka.—Isaya 65:17; Mtu. 21:3, 4.

19. U nga tsanisisa kutxani likholo lako?

¹⁹ Konku thumisa yotshe mikhanjo yi u ku nayo ti to u tsanisa likholo lako. Kombisa kubonga ningo ya mtirulo. Alakanyisisa ngu mtamo wa Jehovha. Zumba u di ñolekile ngu timhaka ta moya. U txi maha toneto, u na va hagari “ka vale va amukelako thomba ya txithembiso ngu likholo ni kuhonisela.”—Vaheb. 6:11, 12; Var. 5:5.