Zumba u di ti lulamisete kuta ka ditshiku da Jehovha

1. Hi nga maha txani kasi ku hi ta huluka ka ditshiku da Jehovha?

BHIBLIA yi txi womba-womba ngu “ditshiku da Jehovha,” yi womba mbimo yi Jehovha a no ta lamula valala vakwe ni kuhulukisa vathu vakwe. Ka timbimo ta kale, Jehovha a lamute matiko o kari. (Isaya 13:1, 6; Eze. 13:5; Zef. 1:8) Se ka timbimo ta nyamsi, “ditshiku da Jehovha” di na khata ngu ku xaselwa ka Bhabhilona wa hombe ku ya hokela ka yimbi ya Armagedhoni. Kasi ku hi ta huluka ka “ditshiku” donedo ti lava hi ti lulamisela konku. Jesu a hi gondisile ti to hi fanete “kuzumba hi di ti lulamisete” mbimo yotshe i si nga ku ti lulamisela dwe ka kuta ka “xanisa ya hombe.”—Mat. 24:21; Luka 12:40.

2. Hi nga wuyeliswa kutxani ngu dibhuku da 1 Vatesalonika?

² Ka dipasi dakwe do khata adi a nga bhalela Vatesalonika, mpostoli Paulo a thumisile sikombiso so tala kasi kuvhuna Makristu ku me zumba ma di lulamile ka ditshiku da hombe da kulamula ka Jehovha. Paulo a txi ti ziva ti to ditshiku da Jehovha di na mbi hoka ngu mbimo yile. (2 Vat. 2:1-3) Hambiketo a alakanyisile Makristu a mbimo yile ti to me ti lulamisela ditshiku dile nga do hoka mangwana, se nathu hi nga thumisa txialakanyiso txakwe. Konku he wone titxhamuselo takwe mayelano ni timhaka ati ti londiselako: 1) ditshiku da Jehovha di na hokisa kutxani? 2) mba mani ava va no mbi ta huluka ka ditshiku donedo ni ku 3) hi nga ti lulamiselisa kutxani kasi ku hi ta huluka?

DITSHIKU DA JEHOVHA DI NA HOKISA KUTXANI?

3. Ditshiku da Jehovha di na tisa ku nga dikhamba ni wusiku ngu nzila muni? (Wona ni mfota.)

³ “Ku nga dikhamba ahawa ka wusiku.” (1 Vat. 5:2) Ayiya i nzila yo khata ka ta tiraru ati ti nga thumiswa kasi kutxhamusela kuhoka ka ditshiku da Jehovha. Ngu mtolovelo, makhamba ma tolovela kupa ni wusiku, vathu va sa ti emela. Ditshiku da Jehovha ni dona di na ta ngu txidhukisa, vathu va sa di emela. Ti nga maha hambi Makristu a ditshuri me ta dhuka ngu nzila ayi simahakalo si no maheka ngu yona ngu txitshuketi. Kambe, kuhambana ni vabihi, athu hi na mbi ta loviswa.

4. Ditshiku da Jehovha di fana ni kulumwa ka wamsikati ngu nzila yihi?

⁴ “Nga wamsikati, ngako a txi lumwa.” (1 Vat. 5:3) Wamsikati awu a ku ni txirumbu kha wu zivi mkama wu a no hefemula ngu wona. Kambe kha kanakani ti to a na hefemula. Ni ku ngako wu txi hoka mkama i nava ngu txitshuketi, a na pfa kupanda ni ku mwanana a na velekwa. Ngu ha ku fanako, kha hi di zivi ditshiku nem mbimo yi ditshiku da Jehovha di no khata ngu yona. Kambe ha tsaniseka ti to da ta, ni ku wulamuli wa Txizimu ka vabihi wu na hoka ngu txitshuketi ni ku va na mbi huluka.

5. Xanisa ya hombe yi fana ni mabembekutxa ngu nzila muni?

⁵ Kufana ni mabembekutxa. Txikombiso txa wuraru txa Paulo txi kombetela makhamba ma txi pa ni wusiku. Kambe ahawa Paulo a ti ta fananisa ditshiku da Jehovha ni mabembekutxa. (1 Vat. 5:4) Makhamba ma nga va bhisi ngutu ngu kupa aha koza ma si ti woni ti to se do txa. Ma nga ta xamala ditambo di di humile, se me wonwa. Ngu ha ku fanako, xanisa ya hombe yi na ta wonekisa ava va fanako ni makhamba, i ku ava va ku txidemani va simamako ve maha mithumo ayi yi si tsakisiko Txizimu. Kuhambana navo, athu hi nga zumba hi di ti lulamisete ngu kuvayilela simaho asi si si tsakisiko Jehovha ni ku lwela ku hokelela “ati i ku ta tinene, ni kululama ni ditshuri.” (Vaef. 5:8-12) Paulo a tshumela e womba-womba ngu sikombiso simbidi asi si yelanako kasi kukombisa ava va no mbi ta huluka.

MBA MANI AVA VA NO MBI TA HULUKA KA DITSHIKU DA JEHOVHA?

6. I ngu nzila muni vathu vo tala va otelako? (1 Vatesalonika 5:6, 7)

⁶ “Ava va otelako.” (Lera 1 Vatesalonika 5: 6, 7.) Paulo a fananisile ava va no mbi ta huluka ka ditshiku da Jehovha ni vathu ava va otelako. Kha va ti woni ati ti humelelako ni ku kha va ti pfisisi ti to mbimo ya pinda ngu txikuluveta. Kha va ti pfisisi timhaka ta lisima ati ti humelelako mwendo to va na angulisa kutxani. Nyamsi vathu vo tala va otete ngu didhawa da moya. (Var. 11:8) Vona kha va kholwi ti to hi hanya ka “masiku a magwito” ni ti to xanisa ya hombe yi na hoka i si nga kale. Mbimo yi simahakalo sa mafu si yako si txitxa, vathu vamwani va kombisa kutsakela didungula dathu da Mfumo, kambe kutala kwawe va tshumela ve otela hahanze ko ve khenjemuka. Hambi vamwani ava va kholwako ka ditshiku da wulamuli va pimisa to di nga di kule. (2 Pedro 3:3, 4) Hambi keto, athu ha ti ziva ti to txialakanyiso txo zumba hi di rinzete nja lisima ni ku nja txikuluveta.

7. Vathu va va no ta loviswa va fana ni madevi ngu nzila yihi?

⁷ “Ava va levako.” Mpostoli Paulo a tshumete e fananisa ava va no ta loviswa ngu Txizimu ni madevi. Vathu ava va nga leva va swela kuangula ka ti ti mahekako ni ku kha va mahi sisungo sa sinene. Ngu ha ku fanako, vabihi kha va nga ni mhaka ni sialakanyiso sa Txizimu. Vona va sawula nzila ayi yi yisako kuloviswani. Kambe Makristu ma kuzetwa kusimama me txhariha ma si levi. (1 Vat. 5:6) Txigondi tximwani txi fananisile m’thu wo mbi leva ni m’thu “wo thutha awu a si jujekiko mapimo, a si kotako kumaha sisungo sa sinene.” Ngu kutxani hi di fanete ku va vathu vo thutha ni kutsana kasi ku hi si ti beteli ka timhaka ta politika ni mahanyelo a mafu yawa? Kota ku ditshiku da Jehovha di yako di tshuketela, mikuzetelo yo hi pateka ka timhaka tiya yi na ya yi engetela, kambe kha ha fanela kukarateka ngu ti to hi na angulisa kutxani. Moya wo sawuleka wa Jehovha wu nga hi vhuna ku va vo thutha ni kusimama hi di tsani kasi ku hi maha sisungo sa wutxhari.—Luka 12:11, 12.

HI NGA MAHA TXANI KASI KU TI LULAMISELA DITSHIKU DA JEHOVHA?

8. Ngu tihi tifanelo ati ti nga txhamuselwa ka 1 Vatesalonika 5:8 ati ti nga hi vhunako kuzumba hi di rinzete? (Wona ni mfota.)

⁸ “He ambaleni txikatawu txa txikete . . . ni . . . txigoko.” Paulo a hi fananisile ni masotxhwa aya ma nga ti lulamisela kulwa yimbi. (Lera 1 Vatesalonika 5:8.) Ku emelwa ti to mbimo yotshe disotxhwa di zumba di di ti lulamisete kulwa yimbi. Ngu ti ti emelwako kwathu. Hi zumba hi di ti lulamisete ditshiku da Jehovha ngu kuzumba hi di ambate txikatawu txa txikete txa likholo ni lirando ni kuambala txithembo txi va txigoko txathu. Tifanelo tiya, ti nga hi vhuna ngutu.

9. Likholo li nga hi vhikelisa kutxani?

⁹ Txikatawu txa txikete txi txi vhikela mbilu ya disotxhwa. Likholo ni lirando si vhikela mbilu yathu yo fanekisela. Sona si na hi vhuna kusimama hi thumela Jehovha ni kulondeta Jesu. Likholo li hi tsanisekisa ti to Jehovha a na hi hakela aku hi mu lavako ngu mbilu yathu yotshe. (Vaheb. 11:6) Eto ti na hi vhuna kusimama hi di thembekile ka Mthangeli wathu Jesu hambi hi txi wonisana ni sikarato. Hi nga tsanisa likholo lathu ni kutimisela sikarato ngu kugonda ka sikombiso sa ngweno sa va va nga simama va di thembekile ti si nga ni mhaka ni kuxaniswa mwendo sikarato sa wutomi. Hi nga vayilela mlawu wo thangetisa silo sa nyama ngu kuetetela ava va nga hehukisa wutomi wawe kasi ku thangetisa timhaka ta Mfumo.b

10. Lirando lathu ngu Jehovha ni ngu vaakelani vathu li hi vhunisa kutxani kutsanisela?

¹⁰ Lirando ni lona nda lisima kasi ku hi zumba hi di thembekile ni ku va vo tsana. (Mat. 22:37-39) Lirando li hi ku nalo ngu Txizimu la hi vhuna kusimama hi txhumayela ku si nga ni mhaka ni sikarato asi hi wonisanako naso. (2 Tim. 1:7, 8) Akuwa lirando lathu li hokelako ni vale va si thumeliko Jehovha, ha simama hi txhumayela ni kuthuma ka teritoriyo yathu, hi txhumayela ngu telefone ni ngu mapasi. Ni ku hi ni themba ya ti to ditshiku dimwani vaakelani vathu va na txitxa ve khata kumaha ati i ku ta tinene.—Eze. 18:27, 28.

11. Lirando ngu vanathu li nga hi vhunisa kutxani? (1 Vatesalonika 5: 11)

¹¹ Lirando ali hi li kombisako ka vaakelani hi tshumela hi li kombisa ka vanathu. Hi kombisana lirando lonelo ngu ‘ku thavelelana ni ku akisana.’ (Lera 1 Vatesalonika 5:11.) Kufana ni masotxhwa ma thumisanako, nathu ha thavelelana. Ditshuri ti to mbimo yi di ku yimbini, disotxhwa di nga thuka di phazama di dayisa disotxhwa kuloni, kambe di nge mahi eto khakwenye. Ngu ha ku fanako, hi nge thuki hi henyisa mwanathu khakwenye mwendo kuphota ngako a di hi henyisile. (1 Vat. 5:13, 15) Hi tshumela hi kombisa lirando ngu kuxonipha vanathu ava va thangelako dibanzani. (1 Vat. 5:12) Mbimo yi Paulo a nga bhala dipasi diya, dibanza da Tesalonika di si se vhala dilembe di di simekilwe. Se vavamna ava va nga di sawutwe kuthangela va si nga ni experiyensiya, ni ku ku ti lava va mahile tiphazamo. Hambiketo, ti txi lava ve xonipwa. Aku xanisa ya hombe yi yako yi txi tshuketela, hi na lava madhota kasiku me hi ninga mkongomiso wo pinda awu hi wu manako nyamsi. Ti nga maha ti si koteki kumana mkongomiso wo ta ngu mzinda mwendo ngu Bhetele ngu kukongoma, se nda lisima kukombisa lirando ni txixonipho madhota i di nga di konku. Ti si nga ni mhaka ni ti ti no humelela, hi lava kusimama hi di tsani, hi si veki mapimo ka tiphazamo tawe, kambe hi veka mapimo ka ti Jehovha, ngu kuthumisa Jesu a no kongomisa vavamna vava vo thembeka.

12. Themba yi nga vhikelisa kutxani mialakanyo yathu?

¹² Kufana ni ku txigoko txi vhikelako msungo wa disotxhwa, themba yathu ya kuhanyiswa ya vhikela mialakanyo yathu. Ngu mhaka ya themba yathu yo tsana ha ti ziva ti to asi mafu yawa ma si ningelako nyamsi hi nga sa txilo. (Vaf. 3:8) Themba yathu ya hi vhuna kusimama hi thutha ni kutsana. Eto ive ditshuri ka Wallace ni Laurinda, ava va thumako África. Mndani ka mavhiki mararu, ngu wumbidi wawe va luzeketwe ngu vaveleki vawe. Se ngu mhaka ya mtungu wa COVID-19 va si na ku ti kota kutshumela mtini kasiku ve ya va ni maxaka awe. Wallace a bhate tiya: “Themba ya kuwuswa ka vafi yi ni vhuni ku ni pimisa ngu vona, i si nga ngu ti va nga di ngu tona ka masiku awe o gwitisa ka mafu awa, kambe ati va no ta va ngu tona ka mafu a maphya. Themba yoneyo ya ni vhuna ku va wo thutha ngako ni di pandisekile mwendo ni txi lwisana ni matipfelo awa.”

13. Hi nga wu amukelisa kutxani moya wo sawuleka?

¹³ “Mi nga timeni moya.” (1 Vat. 5: 19) Paulo a fananisile moya wo sawuleka ni mndilo wu ku mndani kwathu. Ngako hi di ni moya wo sawuleka wa Txizimu ha tura ni kumana litsako ngu kumaha ati i ku ta tinene ni ku ha mana mtamo wo thumela Jehovha. (Var. 12:11) Se hi nga maha txani kasi ku hi va ni moya wo sawuleka? Hi nga kombela moya wonewo wo sawuleka ngu kumaha mkombelo, hi gonda Bhiblia ni kutipata ni sengeletano ayi yi kongomiswako ngu moya wakwe. Kumaha tiya ti na hi vhuna kusakulela “mihando ya moya.”—Vag. 5:22, 23.

14. Ngu tihi ati hi fanelako ku ti vayilela ngako hi txi lava kusimama hi amukela moya wa Txizimu? (Wona ni mfota.)

¹⁴ Msana kova Txizimu txi di hi ningile moya wa Txona wo sawuleka, hi fanete kutiwonela ti to hi si ‘timi moya.’ Jehovha a ningela moya wakwe ka vale va simamako ni mahanyelo ni mapimiselo o sawuleka dwe. Ene kha nge hi ningi moya wakwe ngako hi di ni mahanyelo mwendo mapimiselo a nzambwa. (1 Vat. 4:7, 8) Ti to hi simama hi va ni moya wo sawuleka hi fanete kwa mbi ‘kanyisa siprofeto.’ (1 Vat. 5:20) Ka vhersikulo yiya, “siprofeto” ku wombwa madungula aya Jehovha a hi ningako ngu kuthumisa moya wakwe wo sawuleka, ona ma pata kukuluveta ka timbimo tathu ni kuta ka ditshiku da Jehovha. Kha ha fanela kupimisa to ditshiku da Jehovha ni Armagedhoni kha si na mbi hoka ka masiku athu. Hi nga kombisa ti to ha emela ditshiku da Jehovha ni ku di na hoka ngu txikuluveta ngu kusimama hi kombisa “mahanyelo o sawuleka” ditshiku ni ditshiku.—2 Pedro 3:11, 12.

“WONISISANI SOTSHE”

15. Hi nga vayilelisa kutxani kupengiswa ngu makuhu aya ma huwelelwako ngu madhimoni? (1 Vatesalonika 5:21)

¹⁵ Ka masiku aya ma tako, valala va Txizimu va na huwelela va txi: “Ka ho kudikha ni kukhaliseka!” (1 Vat. 5:3) Mimoya ya madhimoni yi na hangalasa makuhu ha mafuni kotshe kasi kutimeta vo tala. (Mtu. 16:13, 14) Se ku wombwa txani ngu ngathu? Kha hi na mbi timetwa ngako hi txi ‘wonisisa sotshe.’ (Lera 1 Vatesalonika 5:21.) Dipswi da Txigriki adi di ku “kuwonisisa sotshe” di txi thumiswa ngu va va nga txi textara nzalama ni prata kasi kuwona to nja yinene mwendo nem. Ngu toneto, nathu ti lava hi wonisisa kha kwati a ti hi ti lerako ni ti hi ti pfako kasi kuziva ti to nda tinene kani. Eto i di ta lisima ka Vatesalonika ni ku i na ta va ta lisima kwathu, ngutu-ngutu aku xanisa ya hombe yi tshuketelako. Hahanze ko tumela totshe ati vathu va ti wombako, hi na thumisa wusikoti wathu wo pimisa ka ti hi ti lerako ni ku ti pfa kumweko ni ti Bhiblia ni sengeletano ya Jehovha si wombako tona. Hi txi maha toneto, hi na mbi pengiswa mwendo kukanganyiswa ngu makuhu aya ma no hangalaswa ngu madhimoni.—Mav. 14:15; 1 Tim. 4:1.

16. Ngu yihi themba yo tsana ayi hi ku nayo ni ku eto ti hi kuzeta kumaha txani?

¹⁶ Malanda a Jehovha ma na ta huluka kota mtxawa ka xanisa ya hombe. Kambe kha hi ti zivi ati ti no humelela mmweyo ni mmweyo wathu mbimo yi yi tako. (Jak. 4:14) Ti si nga ni mhaka ni ti to hi na ta maneka ka xanisa ya hombe mwendo hi na fa yi si se hoka, hi na ta hakelwa ngu wutomi awu wu si gumiko ngako hi txi simama hi di thembekile. Vasawuleki va na ta va ni Jesu nzumani. Kasi ava va tinvuta timwani va na ta va ka paradhise ha mafuni. Nga hotshethu hi nga veka mapimo ka themba yiya yo tsakisa ni kuzumba hi di ti lulamisete ditshiku diya da Jehovha!