Ina u ti ti ziva?

Ngu kutxani Bhiblia yi txi wuyeletela mapswi o kari?

MAKHAMBI mamwani vabhali va Bhiblia va wuyeletete mapswi ona ya a mamwewo, dipswi ngu dipswi. Wona sivangelo siraru si kombisako ti to ngu kona ha ka txani ti nga mahako va ti wuyeletete mapswi:

Mbimo yi yi nga bhalwa. Ka Israyeli wa kale, vathu vavangi va si nga ni ma kopiya a mlayo aya ma nga ti va lumba. Ka makhambi a mangi m’khanjo awu vathu va nga ti nawo wo engisa Mlayo i ti mbimo yi va nga txi sengeletana masoni ka ditenda. (Dhewut. 31:10-12) Ti hakubasani ti to ka simahakalo soneso, ti ndi na hehuka ku vathu ve tsulupeteleka mbimo yi va nga txi ema ve engisa Mlayo kudingana maora o tala hagari ka vathu vavangi. (Neh. 8:2, 3, 7) Ngu toneto, kasiku vathu ve khumbula ati ti nga txi gondwa ni kugwita ve ti thumisa ka wutomi wawe, ti txi lava ku me wuyeletelwa mapswi a lisima. Kuwuyeletela mapswi a lisima ti ndi na va ta lisima kasiku vathu ve kota kukhumbula kwati timhaka to kari ta mlayo ti nga txi pata milayo ya Txizimu ni sisungo sa wulamuli.—Levhi 18:4-22; Dhewut. 5:1.

Ti bhatwe ngu nzila muni. Sienge so kari sa Bhiblia si bhatwe ngu nzila ya tindando, ngu txikombiso, dibhuku da Masalmo, Ndando ya Tindando ni Sidilo. Timwani tindando ti ni makoru aya ma ku ni mapswi aya ma wuyeletelwako, eto ti junyatisa msungo mhaka wa ndando ni kuvhuna kambe ava va engisako ndando kukhumbula mapswi. Wona ngu txikombiso ati ti nga bhalwa ka Masalmo 115:9-11: “Anu Vaisrayeli, thembani Mkoma: Nguko ene ngene mvhuni ni m’vhikeli wako. Nyumba ya Aroni, themba Mkoma! nguko ene ngene mvhuni ni m’vhikeli wako. Anu mi kholwako ka Txizimu, thembani Mkoma! nguko ene ngene Mvhuni ni m’vhikeli wanu.” Ina wa yi wona nzila ayi kuwuyeletela mapswi yawa ti nga txi vhuna vaembeleli kuveketa hamsungo ni mbiluni didungula da ndando?

Txilaveko txo junyatisa timhaka ta lisima. Vabhali va Bhiblia mbimo yimwani va txi wuyeletela mapswi a lisima. Ngu txikombiso, mbimo yi Jehovha a nga ninga sileletelo ka Vaisrayeli mayelano ni kwa mbi dya mnoha, Jehovha a rumile Mosi ku e wuyeletela sivangelo sa kona makhambi a mangi. Jehovha a txi lava kujunyatisa ti to mnoha wu emela wutomi. (Levhi 17:11, 14) Ku di pindile mbimo yo kari, mbimo yi vapostoli ni madhota a Jerusalema ma nga bhala mayelano ni ti Makristu ma nga ti fanete kumaha kasi kutsakisa Jehovha, mwendo ati va nga ti fanete kuvayilela kasi kwambi m’tsakisa, va tshumete kambe ve junyatisa txilaveko txo vayilela mnoha.—Mith. 15:20, 29.

Ti hakubasani ti to Bhiblia ya wuyeletela mapswi a mangi, kambe eto kha ti txhamuseli ti to Jehovha a lava ti to yotshe mbimo hi wuyeletela mapswi a mamwewo. Ngu txikombiso, Jesu a wombile tiya: “Ngako u txi maha mkombelo, u nga wuyeletele mapswi a mamwewo.” (Mat. 6:7, NM) Ene a wombile timhaka to kari ati hi nga ti patako ka mikombelo yathu. (Mat. 6:9-13) Hambiku hi vayilelako kuwuyeletela mapswi oneyo a mamwewo ka mikombelo yathu, kambe hi nga pata timhaka ta timweto ka mikombelo yathu.—Mat. 7:7-11.

Ku ni sivangelo sa sinene so Bhiblia yi wuyeletela mapswi a mamwewo. Yimweyo ya tinzila ta tingi ati Jehovha, m’gondisi wathu wa hombe a ti thumisako kasi ku hi gondisa ati i ku tatinene kwathu.—Isaya 48:17, 18.