Tixamulo ta siwotiso sa vagondi

Ma womba txani mapswi aya ma ku ka Mavingu 30:18, 19 aya ma ku “nzila ya dijaha di di ni dihorana ya xamalisa”?

Vathu vavangi kupata ni vale va nga gonda ngutu ta va karatela kupfisisa txhamuselo a mapswi awa. Yotshe ndimana yiya ngu Tradhusawu ya Mafu a Maphya yi womba tiya: “Ku ni silo siraru si ni xamalisako ni mune ni si si ziviko: Nzila ya digama nzumani, nzila ya mnyoka ha ka marigwi, nzila ya txitimela hagari ka linene, ni nzila ya dijaha di di ni dihorana.”—Mav. 30:18, 19, NM.

Kale hi txi pfisisa ti to, mapswi ya ma ku “nzila ya dijaha di di ni dihorana” ma txhamusela timhaka to biha. Ngu kutxani? Nguku tindimana timwani ti ku ka Mavingu kapitulo 30 ti womba-womba ngu silo so biha asi si si “enelisekiko.” (Mav. 30:15, 16) I singeto dwe, vhersikulo 20 yi womba-womba ngu “wamsikati wa digelegele” awu a wombako ti to kha maha to biha. Ngu toneto, hi txi pimisa ti to, kufana ni digama di purumelako kule nzumani, ni mnyoka wu tsimbilako ka marigwi, mwendo txitimela txa mati txi tsimbilako lineneni txi si siyi msesa, m’thu a ndi na maha to biha asi tumbulwi. Ngu kuya ngu mapimiselo awa, hi txi pimisa ti to mapswi aya ma ku “nzila ya dijaha di di ni dihorana” ma txhamusela timhaka to biha, to fana ni dijovhem do kari do txhariha adi di xengetelako dihorana ti to ve maha timhaka ta mataho.

Kambe, hi ni sivangelo so tala so hi kholwa to tindimana tiya ti womba-womba ngu timhaka tatinene. Ngu ditshuri, m’bhali wa tindimana tiya ati xamatiswa ngutu ngu silo si a nga womba-womba ngu sona.

Mibhalo ya Txihebheru ya seketela mhaka ya ti to tindimana tiya ti womba-womba ngu timhaka tatinene. Dibhuku dimwani di womba ti to dipswi da Txihebheru di ku ka Mavingu 30:18 adi di ku “si ni xamalisako,” “di kombetela ka silo asi m’thu asi wonako si txi xamatisa mwendo ku ti si kotekiko ku si maheka.”

Crawford H. Toy m’gondisi wa Univhersidhadhe ya Harvard nene a womba ti to tindimana tiya ta Bhiblia kha ti wombawombi ngu timhaka to biha. Ene a womba tiya: “Ngu ditshuri m’bhali wa tindimana tiya ati ko zama kutxhamusela nzila yi silo soneso si m’xamatisako ngu yona.”

Se ta pfala ku hi kholwa to mapswi ya ma ku ka Mavingu 30:18, 19 ma womba-womba ngu silo so xamatisa, a si mbimo yimwani hi si si pfisisiko. Ngu toneto kufana ni m’bhali wa tindimana tiya, athu ha xamala mbimo yi hi wonako digama di txi puruma nzumani, mbimo yi hi wonako mnyoka awu wu si ngaku ni minenge wu txi kwela dirigwi, mbimo yi hi wonako txitimela txo nemela txi txi tsimbila lineneni ni mbimo yi hi wonako dijaha do kari ni dihorana va txi randana ni kuaka mwaya va di tsakile.