Mprista wathu wa Hombe Jesu wa hi pfisisa kwati

1-2. a) Ngu kutxani Jehovha adi rumete Jesu hamafuni? b) Hi na bhula ngu txani ka gondo yiya? (Vahebheru 5:7-9)

KA 2000 wa malembe msana, Jehovha a rumete mwanana wakwe wo sawuleka hamafuni ti to a ta hi hulukisa ka txionho ni lifo ni kuthavisa wubihi awu wu nga mahwa ngu Sathani. (Joh. 3:16; 1 Joh. 3:8) Jehovha atxi tiziva to ku va Jesu Kristu e ta hawa hamafuni e ta hanya kota m’thu wa nyama, ti ndi na mu lulamisela ti to e ta va Mprista wa mnene ngutu, eva m’thu wu a hi pfisisako, a pfisisako kupanda kwathu ni ku hi pfela wusiwana. Jesu a khatile kuva Mprista wa Hombe msana kova adi bhabhatisilwe ngu 29 E.C.a

² Ka gondo yiya, hi na wona ti to kuva Jesu adi tile hamafuni e ta hanya kota m’thu wa nyama ti mvhunisile kutxani ku eva Mprista wa Hombe awu a hi pfisisako. Nda lisima ngutu kwathu ku tipfisisa tiya nguku ti na hi hehukela kumaha mkombelo ka Jehovha ni kuva vangana vakwe ngutu-ngutu mbimo yi hi godholako ngu mhaka ya txionho txo kari atxi hi nga txi maha.—Lera Vahebheru 5:7-9.

JESU MWANANA WO DHUNDEKA WA TXIZIMU A TILE HAMAFUNI

3-4. Ngu kuhi kutxitxa aku Jesu a nga kumaha mbimo yi a nga ta hamafuni?

³ Kutala kwathu se hi mahile kutxitxa ko kari ka wutomi. Ngu txikombiso, ti nga maha hi di rurile ka wukhalo wu hi nga ti wu dhunda ngutu, hi siya maxaka athu kumweko ni vangana vathu. Kutxitxa koneko ka karata ngutu. Kambe kha ngaho awu a nga manana ni kutxitxa ka hombe ko fana ni ku Jesu a nga kumaha. Ene i ti ngilozi ya lisima ngutu nzumani kupinda totshe. Jesu atxi randwa ngutu ngu Jehovha ni ku mbimo yotshe ene a ti pfa litsako ngu kuthuma kumweko ni Tate wakwe. (Mas. 16:11; Mav. 8:30) Hambiketo, dibhuku da Vafilipiya 2:7 di womba to ene ati tiemisete kuleka sotshe kasiku e ta hawa hamafuni e ta hanya ni vathu vo mbi hetiseka.

⁴ Hi nga pimisa ngu malembe o khata a Jesu hawa hamafuni. Ene a veleketwe ka mwaya wa sisiwana. Athu ha tiziva eto ngu mhaka ya digandelo adi vaveleki vakwe va nga humesa msana kova adi velekilwe. (Levhi 12:8; Luka 2:24) I singeto dwe, mbimo yi mkoma wo biha Herodha a nga ziva to Jesu a velekilwe, ene a zamile ku m’daya. Kasiku ve huluka ka Herodha, Jesu ni vaveleki vakwe ti lavile ve ya barama Egipta kudingana mbimo yo kari. (Mat. 2:13, 15) Ngu ditshuri, nzila yi Jesu a nga ti hanya ngu yona hamafuni yi ti hambanile ngutu ni nzila yi a nga ti hanya ngu yona khe nzumani.

5. Ngu tihi ti Jesu a nga ti wona mbimo yi a nga ti hamafuni, ni ku toneto ti mvhunisile kutxani ku e ti lulamisela ku eva Mprista wa Hombe awu a hi pfisisako? (Wona ni mfota.)

⁵ Mbimo yi a nga ti hamafuni, Jesu a woni vathu va txi xaniseka. Ngu txikombiso, a wonisani ni kufelwa ngu vathu ava a nga ti va dhunda vo fana ni tate wakwe Josefa. Mbimo yi a nga tiya kutxhumayelani, Jesu a mananile ni vathu ava i nga ti mabhofu, va nga ti ni tshekela, sikhwala ni vaveleki ava va nga ti wonisana ni kufelwa ngu vanana vawe. Ene a ti va pfela wusiwana vathu vonevo. (Mat. 9:2, 6; 15:30; 20:34; Marku 1:40, 41; Luka 7:13) Ditshuri ti to Jesu a ti kuwona kuxaniseka ka vathu mbimo yi a nga ti nzumani. Kambe mbimo yi a nga ta hamafuni, ene a kupfisisile kwati kupandiseka aku vathu va ku pfako ngu mhaka yo xaniseka. (Isaya 53:4) Kuxaniseka aku Jesu a nga kuwona adi hamafuni ku mvhuni ku e pfisisa kwati matipfelo a vathu ni kupandiseka kwawe. I singeto dwe, kufana ni vathu vamwani nene atxi karala ni ku atxi karateka.

JESU WA KOMBISA WUMBILU KA VATHU

6. Sikombiso asi Isaya a nga si thumisa si hi gondisa txani mayelano ni wunene ni mpfela wusiwana wa Jesu? (Isaya 42:3)

⁶ Mbimo yi Jesu a nga txi txhumayela, ene ati kombisa wumbilu ka vathu ava va nga ti xaniswa. Ngu kumaha toneto, ene a hetisisile wuprofeti. Ka mibhalo ya Txihebheru, avale va ku ni likholo lo tsana ka Jehovha mbimo yimwani va fananiswa ni Jaradhi yo tshura ngutu ni mndonga wo tshura ngutu. (Mas. 92:12; Isaya 61:3; Jer. 31:12) Kambe avale va ñolwako ngu nzila yo biha va fananiswa ni litshava lo thidyaka ni lingoti la dilambu adi di lavako kutimeka mwendo silo asi si si vhuniko txilo. (Lera Isaya 42:3; Mat. 12:20) Isaya a thumisile sifananiso soneso kasiku womba-womba ngu lirando ni pfela wusiwana awu Jesu adi no kombisa vathu ava va nga ti txhepetwa.

7-8. Jesu a wu hetisisile kutxani wuprofeti wa Isaya?

⁷ Matewu a wombile to Jesu a hetisisile wuprofeti wa Isaya mbimo yi a nga womba tiya: “Kha na mbi funya litshava ali li nga thidyaka hambi kutima lingoti la dilambu ali li lavako kutimeka.” Sidiwukiso asi Jesu a nga simaha si vhuni vathu ava va nga ti xaniswa ni va va nga ti si nga ni themba. Ngu txikombiso, ditshiku dimwani Jesu a tshanganile ni wamwamna awu a nga ti ni tshekela. Wamwamna eneyo ti nga maha asi nga ni themba ya ti to a na hanyiswa ka malwati akwe, e tshumela eya zumba ni mwaya wakwe kumweko ni vangana vakwe. (Luka 5:12, 13) Jesu a tshumete e ziva wamwamna mmwani awu i nga ti diphanzeve ni ku asi tikoti kuwombawomba kwati. U pimisa ti to wamwamna eneyo atxi tipfisa kutxani mbimo yi a nga ti wona vangana vakwe va txi bhula, va txi seka kambe ene asi tikoti kuwombawomba? (Marku 7:32, 33) Kambe ku ni timwani ati Jesu a nga timaha.

⁸ Ka masiku a Jesu, Vajudha vo tala va txi kholwa ti to ngaku m’thu atxi lwala mwendo adi lemate a to ko tsayiswa ngu mhaka ya sionho sakwe mwendo ngu mhaka sionho sa vaveleki vakwe. (Joh. 9:2) Ngu mhaka ya gondo yoneyo ya makuhu, vathu ava se va nga ti xaniseka ngu mhaka malwati mwendo kulemala va ti nõlwa ngu nzila yo biha ni ku va txi tipfa i si nga va txilo. Jesu a hetisisile wuprofeti wa Isaya ngu kuhanyisa vathu vonevo ni ku va komba ti to Txizimu txa khatala ngu vona. Eto ti hi gondisa txani mayelano ni nzila yi Jesu a tipfako ngu yona ngu ngathu nyamsi?

9. Hi ti zivisa kutxani ti to Mprista wathu wa Hombe wa hi pfisisa kota vathu vo mbi hetiseka? (Vahebheru 4:15, 16)

⁹ Lera Vahebheru 4:15, 16. Tsaniseka to Jesu mbimo yotshe a na hi komba wumbilu. Ti lava kuwomba txani toneto? Dipswi da Txigriki adi di ku ‘kupfela wusiwana’ adi di nga thumiswa ka Vahebheru 4:5 di txhamusela kupfa kupanda aku vamwani va kupfako. Paulo a tshumete e thumisa dipswi donedo ka Vahebheru 10:34 kasiku kombisa ti to athu ha pfela wusiwana vathu vale va ku majele. Mbimo yi hi lerako mu ka Bhiblia mayelano ni sidiwukiso asi Jesu a nga simaha, ha pfisisa ti to ene ati ni pfela wusiwana ngu vathu. Jesu asi njo sinziseka kumaha toneto, kambe ati mahile nguku a nga ti ni pfela wusiwana ngu vathu ni ku atxi lava ku va vhuna. Ngu txikombiso, ngaku Jesu ati ko tilava adi hanyisile dijaha dile da tshekela adi kule, kambe ngu wumbilu ene adi tshuketete e di gwesa. Ti nga maha edo i ti dikhambi do khata adi dijaha dile da tshekela di nga gweswa msana ka malembe o tala. Tshumela u pimisa ngu mbimo ayi Jesu a nga hanyisa wamwamna wule wa diphanzeve. Ngu lirando ene a m’tekile e m’yisa ka wukhalo awu wu nga ti si nga ni diguwa ni ha ku nga ti si nga ni vathu vamwani. I singeto dwe, mbimo yi Mfarisi wo kari a nga khata kusolasola wamsikati awu a nga ti ti sote ka sionho sakwe, e sambisa minenge ya Jesu ngu mirongo e tshumela e yi omisa ngu misisi yakwe, Jesu ngu txikuluveta a emelete wule wamsikati. (Mat. 8:3; Marku 7:33; Luka 7:44) Jesu asi vayileli vathu ava va nga ti lwala ni va va nga ti mahile sionho sa hombe. Ngu ditshuri, ene atxi lava ti to vathu vonevo veta kwakwe ni ku atxi va komba lirando ali a nga ti nalo ngu vona. Hi nga tsaniseka ti to mbimo yotshe Jesu wa simama e hi komba wumbilu.

HA ETETELA MPRISTA WATHU WA HOMBE NYAMSI

10. Nji txani atxi sengeletano ya Jehovha yi txi mahako nyamsi kasi kuvhuna mabhofu ni maphanzeve? (Wona ni mifota.)

¹⁰ Kota valondeteli va Jesu, athu ha maha ti hi nga tikotako ti to hi mtekelela ngu kukombisa lirando ni pfela wusiwana. (1 Pedro 2:21; 3:8) Ti hakubasani ti to athu hi nge sikoti kuhanyisa maphanzeve ni mabhofu, kambe hi nga vhuna vathu vonevo ngu didhawa da moya. Ngu txikombiso, mabhuku athu aya ma nga seketelwa mu ka Bhiblia ma maneka ngu konamu ko pinda 100 wa tidimi ta mawoko. Se ka va va si woniko kwati ku ni mabhuku ngu braille ngu konamu ko pinda 60 wa tidimi. Hi tshumela hi maha mavhidhiyo a ya ma txhamuselako ati ti mahekako ngu konamu ko pinda 100 wa tidimi. Totshe eto ti mahelwa kuvhuna maphanzeve ni mabhofu ti to veva vangana va Jehovha ni Jesu.

11. Sengeletano ya Jehovha yi wu kombisisa kutxani wumbilu ka vathu votshe? (Mithumo 2:5-7, 33) (Wona ni mifota.)

¹¹ Sengeletano ya Jehovha ya maha mizamo kasiku vhuna vathu va tidimi totshe. Khumbula ti to msana kova Jesu adi wusilwe, a ningile moya wo sawuleka vagondiswa vakwe ava va nga ti sengeletanile ka m’buso wa Pentekoste kasiku ve sikota kutxhumayela mahungu a manene ka votshe vathu ava va ti tile ka m’buso ngu “tidimi tawe.” (Lera Mithumo 2:5-7, 33.) Ngu kukongomiswa ngu Jesu, sengeletano ya ningela mabhuku aya ma nga seketelwa mu ka Bhiblia ngu tidimi to pinda 1.000, timwani ta kona ti wombwawombwako ngu mtxawa wa wudotho wa vathu. Ngu txikombiso, wuphemba ni wulambwe ka América ku ni tidimi ati ti wombwawombwako ngu mtxawa wa wudotho wa vathu. Hambiketo, mabhuku athu ma maneka ngu konamu ko pinda 160 wa tidimi kasiku vathu va wukhalo wonewo ve pfa mahungu a manene ngu lidimi lawe. Mabhuku athu ma tshumela me maneka ngu tidimi to pinda 20 ta Txiromani. Ni ku magidhighidhi a vathu ava va wombawombako tidimi toneto vakhozeli va Jehovha.

12. Ngu tihi timwani ati sengeletano ya Jehovha yi ti mahelako vathu votshe nyamsi?

¹² Hahanze ko vhuna vathu ve pfa mahungu a manene a Mfumo dwe, sengeletano ya Jehovha ya tshumela yi vhuna avale va nga welwa ngu tiphango ta mtumbunuko. Ngu toneto, Tifakazi to tala ta Jehovha ta ti ningetela kasi kuvhuna vathu ava va nga welwa ngu tiphango toneto. Sengeletano ya Jehovha yi tshumela yi maha makhalo aya vathu va no tshangana ka wona kasiku ve khozela Jehovha ni kugonda ngu lirando lakwe.

MPRISTA WATHU WA HOMBE A NA KUVHUNA

13. Ngu tihi timwani tinzila ati Jesu ati thumisako kasiku hi vhuna?

¹³ Kota m’dyisi wathu wamnene, Jesu wa khatala ngu silaveko sa moya sa mmweyo ni mmweyo wathu. (Joh. 10:14; Vaef. 4:7) Mbimo yimwani ati ti nga hi humelelako ka wutomi ti nga thuka ti hi maha hi tipfa nga ho va litshava lo thidyaka mwendo lingoti la dilambu ali li lavako kutimeka. Kutilava ti nga maha hi txi karateka ngu mhaka malwati, sionho sathu mwendo ngu kuva hi di henyisanile ni vanathu. Ngu mhaka kupanda ku hi kupfako, ti nga maha ti hi karatela kupimisa ngu themba yi hi ku nayo ya wumangwana. Kambe khumbula ti to Jesu wa kuwona kukarateka kwako ni ku wa ma pfisisa matipfelo ako. Ngu mhaka mpfela wusiwana ni wumbilu wu aku nawo ngu ngawe, ene a lava kumaha to kari kasiku e kuvhuna. Ngu txikombiso, ene a nga kuninga moya wo sawuleka kasiku u va ni mtamo mbimo yi u tipfako u di godhote. (Joh. 16:7; Tit. 3:6) I singeto dwe, Jesu a nga thumisa “sihiwa sa vathu” i ku madhota mwendo vanathu vamwani kasiku ve kutsanisa ni ku kuvhuna.—Vaef. 4:8.

14. Hi nga maha txani mbimo yi hi tipfako hi di godhote?

¹⁴ Ngaku u di godhote, khumbula ti to Jesu i Mprista wathu wa hombe ni kutshumela u pimisa ngu ti eto ti wombako tona kwako. Tshumela u khumbula ti to Jehovha a rumete Jesu hamafuni kasiku ta hi hulukisa ka txionho ni lifo ni kuvhuna Jesu e pfisisa sikarato si hi tshanganako naso kota vathu vo mbi hetiseka. Mbimo yi hi godholako, Jesu a tiemisete ku hi vhuna “ngu mbimo yi yi fanelako.”—Vaheb. 4:15, 16.

15. Nji txani txi nga vhuna mwanathu mmwani kasiku e tshumelela dibanzani?

¹⁵ Jesu a tshumela e kongomisa avale va tikaratelako kuxola ni kuvhuna avale va nga leka kuthumela Jehovha. (Mat. 18:12, 13) Wona ti ti nga humelela Stefano.b Msana kova a di hetile 12 wa malembe adi thavisilwe dibanzani, ene a mahile txisungo txo ya mitshanganoni. Ene a womba tiya:“Ti si ni hehukeli, kambe ni ti lava kutshumela ni ti pata ni mwaya wa Jehovha. Madhota ya ma nga bhula ni nani ma ni vhuni ku ni si thavi kutiphofula. Mbimo yimwani ni txi karateka ngu kuva ni di lekile kuthumela Jehovha. Kambe madhota ma ni khumbutisile to Jehovha ni Jesu va lava ti to ni tshumelela dibanzani. Se mbimo yi ni nga tshumelela, vanathu va ni amukete ngu manza mambidi ani ni mwaya wangu. Ngu kutsimbila ka mbimo, msikati wangu a khatile kugonda Bhiblia ni ku nyamsi hi thumela Jehovha kota mwaya.” Mprista wathu wa Hombe wa tsaka ngutu mbimo yi a wonako vathu ava va nga tisola va txi tshumelela dibanzani.

16. Ngu kutxani hi di fanete kubonga Jehovha ngu ku va a di hi ningile Jesu kota Mprista wathu wa Hombe?

¹⁶ Mbimo yi Jesu a nga ti hamafuni a vhuni vathu mbimo yi va nga ti lava txivhuno. Nyamsi hi nga tsaniseka ti to ene a na hi vhuna yotshe mbimo yi hi lavako txivhuno. Ka mafu a maphya, Jesu Kristu a na ta hi vhuna hotshethu ku hi va vathu vo hetiseka. Ha m’bonga ngutu Jehovha, Txizimu txathu txa lirando ni txa wuxinji atxi txi nga hi ninga Mprista wa Hombe awu a hi pfisisako i ku Mwanana wa txona Jesu.