Tixamulo ta siwotiso sa vagondi

Ngu yahi “mapimo” aya Jehovha a no ma veka ka timbilu ta akoma i si nga kale?

Di txi womba-womba ngu makhato a xanisa ya hombe, dibhuku da Mtuletelo 17:16, 17 di womba tiya: “10 wa titxheho ati u nga tiwona kumweko ni txikalani, si na vengela digelegele si di tshambula tinguwo si di siya di sa ambala txilo, si na dya nyama yakwe si mu hisa ngu mndilo. Nguku Txizimu txi na veka mapimo ya txona ka timbilu ta tona kasi kumaha kudhunda ka txona, i ku kuningela wukoma wa tona ka txikalani kala kuza mapswi ya Txizimu me hetiseka.” Kale, mabhuku athu ma txi womba ti to “mapimo” aya Jehovha a no ma veka ka timbilu ta vakoma ngu lovisa wukhongeli wa makuhu.

Kambe ti lavile hi maha kutxitxa ko kari ka mapfisiselo athu. “Mapimo” aya Jehovha a no ma veka ka timbilu ta vakoma ngu ningela “wukoma wawe ka txikalani.” Kasi kupfisisa nzila yi wuprofeti wonewo wu no hetiseka ngu yona, hi na xamula siwotiso so kari.

Mba mani ava va patekako ka wuprofeti wuwa? “Digelegele” adi di dhanwako ku i “Bhabhilona wa Hombe” di emela wukhongeli wa makuhu wa hamafuni kotshe. “Txikalani txo bhilivila” txi emela Nações Unidas. Sengeletano yiya ya matiko yi wumbilwe ngu 1919 ngu txikongomelo txo maha ti to kuva ni kurula hamafuni kotshe ni ku makhatoni yi ti dhanwa kota Liga das Nações. (Mtu. 17:3-5) “10 wa titxheho” ti emela yotshe mifumo ayi yi seketelako txikalani.

Ngu kuhi kuyelana ku kuho ka digelegele ni txikalani txo bhilivila? Digelegele di “khalahatshile” txitimwi ka txikalani. Eto ti lava kuwomba ti to dona da seketela ni kuzama kumaha ti to txikalani txi maha ati dona di ti lavako.

Ku na humelela txani ngu digelegele? Txikalani ni 10 wa titxheho, “si na vengela digelegele,” si handa tithomba ta dona ni kukomba votshe vathu ti to dona i m’bihi. Si na tshumela si hetisisa wulamuli wa Jehovha ngu kulovisa da magwito digelegele donedo. (Mtu. 17:1; 18:8) Ewo i nava magwito a wotshe wukhongeli wa makuhu. Ti si se maheka eto, Jehovha a na kuzetela vakoma ku ve maha timhaka to ti khali kumaheka hamafuni.

Ngu tihi ti Jehovha a no kuzetela vakoma ku ve ti maha? Ene a na maha ti to vakoma vamatiko ve hetisisa ‘mapimo akwe,’ mwendo ku vakoma va matiko ‘va na ningela wukoma wawe ka txikalani txo bhilivila’ i ku Nações Unidas. (Mtu. 17:13) Pimisa ngu ti eto ti wombako tona. Ina mifumo ya vathu yi na maha txisungo yi pune txo ningela wukoma ka txikalani? Nadha! Wuprofeti wu womba ti to i Jehovha a no kuzeta vakoma ku ve maha toneto. (Mav. 21:1; fananisa ni Isaya 44:28.) Ina kutxitxa koneko ku na maheka kudotho-kudotho? Ahim-him! Ku na maheka ngu txitshuketi. Koneho, txikalani txi na thumisa mtamo wu txi nga ningwa kasi kuhetisisa wulamuli wa Jehovha txi lovisa da magwito wukhongeli wa makuhu.

Se ngu tihi ti hi nga ti emelako? Kha ha fanela kuemela kupfa mahungu ya ti to vakoma va matiko veya ve seketela ngutu Nações Unidas. Ati hi fanelako ku ti emela ngu tiya: Ngu txitshuketi, ti si ya emelwa ngu m’thu, Jehovha a na maha ti to vakoma ve ningela wukoma wawe ka txikalani. Ngaku eto ti txi maheka, hi na tiziva to xanisa ya hombe yi hafuhi ni kukhata. Ti si se maheka toneto, hi fanete “kutiwonela ni kuzumba hi di rinzile” nguku i si nga kale hi na wona kutxitxa aku ku no maheka ngu txitshuketi!—1 Vat. 5:6.