‘ Simamani mi va ni kupfana aku kutiswako ngu moya wo sawuleka’
MPOSTOLI Paulo a gete Makristu a Efesu ti to ma ti fanete kusimama ‘me laphiselana mbilu ngu lirando, me veketa kupfana aku kutiswako ngu moya wo sawuleka ni kuzama kuxayisa kupfana koneko ngu kuhanyisana ngu kurula ni vamwani.’—Vaef. 4:2, 3, Tradução do Novo Mundo.
‘Kupfana’ aku hi ku nako kutiswa ngu moya wo sawuleka wa Txizimu. Kambe nga ha Paulo a nga womba ngu kona, kupfana koneko ku lava kusakulelwa. Se i mani wu a fanelako kusakulela kupfana koneko? Ngu ditshuri, Mkristu mmwani ni mmwani a fanete kumaha txienge txakwe kasiku ‘kupfana koneko kutiswako ngu moya wo sawuleka kusimama.’
Kasiku u pfisisa mhaka yiya, pimisa ngu m’thu wo kari atxi kuninga mmovha wa wuphya. I mani wu aku ni wutixamuleli wo xayisa mmovha wonewo? Ti hakubasani ti to ngawe. Awe khu nge ningi mnando awu a nga kuninga mmovha ngaku wu txi onheka nguku u si wu khataleliko ngu nzila ya yinene.
Nguha kufanako, hambiku kupfana i ku ningo ayi yi tako ngu ka Txizimu, mmwani ni mmwani a fanete kumaha txo kari kasiku kupfana koneko kusimama. I di ti to kha hi pfani mwendo kha hi nga ni wuxaka wa wunene ni vanathu, hi fanete ku ti wotisa tiya: ‘Ina na maha ati ni ti kotako kasi kuxayisa kupfana aku kutiswako ngu moya wo sawuleka ngu kululamisa sikarato so kari asi ni ku naso ni vanathu?’
‘MAHA MIZAMO YA TI TO KUPFANA AKU KUTISWAKO NGU MOYA WO SAWULEKA KUSIMAMA’
Nga ha Paulo a nga bhala ngu kona, hi nga yotshe mbimo ti hehukako kuxayisa kupfana ngutu-ngutu ngaku mwanathu wo kari adi hi henyisile. Ina ti lava kuwomba ti to mbimo yotshe ayi mwanathu a hi henyisako hi fanete kutsula hi ya womba-womba nayo? Ahim-him. Tiwotise tiya: ‘Ina ni txo tsula ni ya womba-womba nayo na mbi va ni txo wusa txivhunyi?’ Mbimo yimwani ndatinene kutileka ti pinda.—Mav. 19:11; Marku 11:25.
Tiwotise tiya: ‘Kutsula ni ya bhula ni mwanathu ngu mhaka yo kari ayi yi nga ni henyisa, ina ti na lulamisa txikarato mwendo ti no wusa txivhunyi?’
Nga ha Paulo a nga bhala ngu kona, hotshethu hi fanete ‘kulaphiselana mbilu ngu lirando.’ (Vaef. 4:2) Dibhuku dimwani di womba ti to kulaphiselana mbilu ngu lirando ti womba “kutumela ati m’thu aku ngu tona.” Eto ti txhamusela ti to hi fanete kutumela to vanathu kha va hetiseka kufana ni nathu. Ditshuri ti to hotshethu hi lava ku tikaratela ku va ni “mahanyelo a m’thu wamphya.” (Vaef. 4:23, 24) Kambe kha ngaho wu a nga sikotako kumaha timhaka ngu nzila yo hetiseka. (Var. 3:23) Ngaku hi txi pfisisa mhaka yoneyo, ti na hi hehukela kulaphiselana mbilu, hi divalela vamwani ni kusimama ‘hi xayisa kupfana aku kutiswako ngu moya wo sawuleka.’
Ngaku mwanathu wo kari a txo kuhenyisa, kambe u tileka ti pinda, u nava u txo xayisa ‘kupfana.’ Dipswi da Txigriki adi di nga hunduluxelwa di va “kupfana” ka Vaefesu 4:3, ka Vakolosa 2:19 ngu Tradução do Novo Mundo di hunduluxetwe di va “majoyino.” Majoyino misiha yo banga ayi yi tshanganisako marambu. Ngu ha kufanako, kurula ni lirando li hi ku nalo ngu vanathu sa hi vhuna ku hi va ni wuxaka wo tsana navo hambiku hi hambanako.
Ngaku mwanathu wo kari atxi kuhenyisa, zama ku mu komba wunene hahanze ko mu sola-sola. (Vakl. 3:12) Aku hotshethu hi nga mbi hetiseka, ti nga maha nawe u txi khala kuhenyisa m’thu mmwani. Kukhumbula toneto ti na kuvhuna ku ‘u simama u xayisa kupfana aku kutiswako ngu moya wo sawuleka.’