GONDO 51
NDANDO 132 Konkuwa hi mmweyo
Xonipha Jehovha ka ditshiku da mtxhadho wako
“Aniko totshe ti na mahwi ngu fanelo ni mlayo.”—1 VAK. 14:40.
TXIKONGOMELO TXA GONDO
Ngu wona ati Makristu ma nga ti mahako ka ditshiku da mtxhadho wawe kasi kukombisa ti to va xonipha Jehovha.
1-2. Ngu tihi ati Jehovha ati navelako ka ditshiku da mtxhadho wako?
INA wa namorara ni ku u ti lulamisela kutxhadha? I di toneto, ha tsaka ni nawe! Phela ti nga maha u di bhisi ngu kululamisela mtxhadho wako. Jehovha wa khatala ngu ti ti no ta maheka ka ditshiku donedo. Ene a lava ti to u ta tsaka ka ditshiku di u no txhadhaa ngu dona ni ku a lava ti to msana ko va mi di txhadhile mi va ni wutomi wo tsakisa.—Mav. 5:18; Nda. 3:11.
2 Nda lisima ngutu kuxonipha Jehovha ka ditshiku da mtxhadho wako. Ngu kutxani hi txi womba toneto? Ni ku u nga ti mahisa kutxani toneto? Hambiku gondo yiya yi nga mahelwa avale ngutu-ngutu va ti lulamiselako kutxhadha, yona yi nga tshumela yi vhuna hotshethu kasi ku hi xonipha Jehovha ngako hi di rambilwe mtxhadhoni mwendo ngako hi txi kombelwa kuveka mawonelo o kari ka malulamiselo a mtxhadho.
NGU KUTXANI HI DI FANETE KUXONIPHA JEHOVHA KA DITSHIKU DA MTXHADHO?
3. Ngu tihi ati avale va lavako kutxhadha va fanelako kupimisa ngu tona mbimo yi va lulamiselako mtxhadho wawe?
3 Makristu aya ma lulamiselako mtxhadho ma fanete kuthumisa matshina a mlayo a Bhiblia. Ngu kutxani? Nguku Jehovha ngene Mvangi wa mtxhadho. Ene a lulamisete mtxhadho wo khata wa Adhamu ni Eva. (Gen. 1:28; 2:24) Aku i ku Jehovha a nga vanga mtxhadho, nda lisima ku ava va lavako kutxhadha ve tsaniseka ti to ati ti no ta maheka ka mtxhadho wawe ta kombisa txixonipho ka Jehovha.
4. Ngu kutxani avale va lavako kutxhadha va fanelako kukombisa txixonipho ka Jehovha ka ditshiku dawe da mtxhadho?
4 Phela ku ni sivangelo so tala so u tsakisa Jehovha ka ditshiku da mtxhadho wako. Ene i Tate wako wa nzumani ni mngana wako wa hombe. (Vaheb. 12:9) Phela awe u lava ti to wungana wanu wu simama, ngu toneto khu lavi kumaha txilo atxi txi no henyisa Jehovha ngu ditshiku da mtxhadho wako.(Mas. 25:14) Mbimo yi u pimisako ngu ti Jehovha a nga kumahela ni ti a ku ngadi a txi na kumahela, ina kha ti ku kuzeti ku u maha totshe ti u nga ti kotako kasi kukombisa ti to wa mxonipha ka ditshiku da mtxhadho wako?—Mas. 116:12.
U NGA KOMBISISA KUTXANI TI TO WA XONIPHA JEHOVHA KA DITSHIKU DA MTXHADHO WAKO?
5. Bhiblia yi nga va vhunisa kutxani avale va lulamiselako mtxhadho?
5 Bhiblia kha yi nga ni lixta ya milayo ya ti u nga ti mahako ka ditshiku da mtxhadho wako. Anu mi nga lulamisela mtxhadho wanu ngu kuya ngu siemo sanu, ati ti mi tsakisako ni ti ti nga toloveleka amu mi hanyako kona. Makristu ma tshumela me xonipha mlayo wa ditiko mayelano ni mtxhadho. (Mat. 22:21) Hambiketo, mtxhadho awu wu lulamiselwako ngu kuya ngu matshina a milayo a Bhiblia, wa mtsakisa Jehovha. Se ngu tihi ati u fanelako ku ti khumbula mbimo yi u lulamiselako mtxhadho wako?
6. Ngu kutxani ava va lavako kutxhadha va di fanete kuengisa ati mlayo wa ditiko wu ti wombako mayelano ni mtxhadho?
6 Engisa mlayo wa ditiko. (Var. 13:1, 2) Ka matiko o tala, ava va lavako kutxhadha va fanete kumaha ati mlayo wa ditiko wu ti wombako mayelano ni mtxhadho va si se kutxhadha. Se vona va fanete kuxolisisa ati mlayo wa ditiko dawe wu ti lavako. Ngaku u txi lava txivhuno mayelano ni mhaka yiya, nda bhula ni madhota.b
7. Ngu tihi ati u nga ti mahako kasiku mtxhadho wako wu tsimbila ngu nzila ya yinene?
7 Tsaniseka ti to mtxhadho wako wu na maheka ngu nzila yo xonipheka. (1 Vak. 10:31, 32) Maha totshe ati u nga ti kotako kasi kukombisa ti to mtxhadho wako wa xonipha matshina a milayo a Bhiblia, hahanze ko lunzwa ngu mapimiselo a mafu yawa. (Vag. 5:19-26) Aku dijaha di no va msungo wa mwaya, di fanete kutsaniseka ti to mtxhadho wu na maheka ngu nzila ayi yi tsakisako Jehovha. Ngu toneto, vo tala va maha malulamiselo ya ti to ku tava ni dhixkursu ya mtxhadho ayi yi nga seketelwa mu ka Bhiblia. Ngaku dhixkursu yoneyo yi txo mahwa ngu nzila ya yinene ni ya txixonipho, eto ti na vhuna votshe ava va engiselako to ve pfisisa ti to mtxhadho i ningo ayi yi tako ngu ka Jehovha. Yi na tshumela yi va vhuna ve pfisisa ti to mtxhadho tximahakalo txa lisima ngutu. Makristu o tala ma sawula ku dhixkursu yoneyo yi ya mahelwa ka nyumba ya Mfumo ngaku ti txi koteka. Se i di ti to u navela kuthumisa nyumba ya Mfumo, bhalela dipasi madhota a dibanza aya ma thumisako Nyumba ya Mfumo ayi u navelako ku yi thumisa ka mtxhadho wako ku di ngadi ni mbimo.
8. Nji txani txi no kuvhuna ku fexta ya mtxhadho wako yi kombisa txixonipho ka Jehovha? (Varoma 13:13)
8 Lera Varoma 13:13. I di ti to ku na va ni fexta ka mtxhadho wako, nji txani txi no kuvhuna ku fexta yoneyo yi si tsimbitisani ni mapimiselo a mafu yawa? Dipswi da Txigriki adi di ku “mafexta a vhilinganya” di womba mafexta aya kuselwako wusuke yi si txhayi ni kutxhaywa muzika kala di za ditxa. I di ti to ka mtxhadho wako ku na va ni wusuke, tsaniseka ti to kha ngaho a no sela ngutu.c Se i di ti to ku na pekwa wutxenje, tsaniseka ti to vholume kha yi na mbi tsulupeta ava u nga va ramba aha ko va si pfisisani mbimo yi va bhulako. Tshumela u sawula kwati ma muzika aya ma no txhaywa ni kutsaniseka ka ti to ati ti wombwako ka ma muzika onewo kha ti na mbi khuvekisa vamwani.
9. Ngu tihi ati ava va lavako kutxhadha va fanelako kutsaniseka ngu tona, i di ti to ka mtxhadho wawe ku na va ni txienge txo maxaka ni vangana ve womba to kari?
9 Ina ka mtxhadho wako ku na va ni txienge atxi maxaka ako ni vangana vako va no va ni dipswi? Phela eto ti nga maha to mtxhadho wako wu tsakisa. Kambe tsaniseka ti to ati va no tiwomba kha ta huma nzilani. (Vaf. 4:8) Tiwotise tiya: ‘Ina ati va no ti womba ti na kombisa txixonipho ka vamwani? Ina ti na kombisa txixonipho ngu mtxhadho?’ Ni ku ta lisima ka totshe tiwotise tiya: ‘Ina ati va no ti womba ti na kombisa txixonipho ka Jehovha?’ Hambi i di ti to ati va no tiwomba ti na sekisa vathu, tsaniseka ti to kha ku nambi wombwa ati ti kuzetelako ku tiñola ko biha ngu timhaka ta mataho. (Vaef. 5:3) Tshumela u tsaniseka ti to maxaka ako ni vangana vako va ti pfisisa ti to awe khu ti lavi to ve womba timhaka to xanga.
10. Ngu kutxani i di ta tinene ku avale va lavako kutxhadha ve dinganisela mbimo yi va lulamiselako mtxhadho wawe? (1 Johani 2:15-17)
10 Vana wo dinganisela. (Lera 1 Johani 2:15-17.) Jehovha wa tsaka ngutu ngaku malanda akwe ma txi m’dhumisa i singa kumaha timhaka ati ti kombisako ti to va veka mapimo kwawe va pune. Ngu toneto, Makristu aya ma zivako kudinganisela ma vayilela kugaxtara male yo tala ngu kulava kukomba vamwani ti to va naso. U na wuyelwa ngu txani ngaku u txo maha mtxhadho wo hehuka? Wona txikombiso txa Mike wa Noruega. Ene a womba tiya: “Kha ha maha sikweneti kasiku hi txhadha. Ngu toneto, hi si koti kusimama hi di vanyaphandule. Mtxhadho wathu wu vile wo hehuka, wo tshura ni ku hi na mbi wu divala.” Tabitha mwanathu wa txisikati wa khe Índia, a womba tiya: “Hi vayilete kupekwa ngu txitrese. Ngu kuva hi di mahile mtxhadho wo hehuka, ani, mwamna wangu ni maxaka angu hi pfani ka sisungo so tala asi hi nga ti si maha mbimo yi hi nga ti lulamisela mtxhadho.”
Ti si nga ni mhaka ni mu u zumbako kona, mtxhadho wa Makristu wu nga va wo hehuka, wo tshura ni wu hi no mbi wu divala (Wona paragrafu 10-11)
11. Ngu tihi ati ava va lavako kutxhadha va fanelako ku timaha kasiku kombisa ti to va dinganisela ka nzila yi va ti txhunako ngu yona? (Wona ni mifota.)
11 Ina se u sawute asi u no ta ambala? Ngu ditshuri awe u lava ku ta bomba. Hambi ka timbimo ta Bhiblia va noivho va ti bomba. (Isaya 61:10) Ditshuri ti to asi u no ta ambala ka ditshiku da mtxhadho wako sa hambana ni si u tolovelako ku si ambala, kambe si fanete kukombisa ti to u Mkristu awu a nga vitwa ngu didhawa da moya. (1 Tim. 2:9) Ngu toneto, u nga tumeleli ti to asi u no si ambala, ni nzila yi u no ti txhuna ngu yona si va sona i ku sa lisima ngutu ka mtxhadho wako.—1 Pedro 3:3, 4.
12. Ngu kutxani ava va lavako kutxhadha va di fanete kuvayilela sihena sotshe asi si lwisanako ni matshina a milayo a Bhiblia?
12 Vayilela sihena sotshe asi si si tsimbitisaniko ni matshina a milayo a Bhiblia. (Mtu. 18:4) Mitxhadho yo tala ya nyetiswa ngu mhaka ya sihena sa wukhongeli wa makuho, madhimoni ni wuloyi. Jehovha wa hi bhasopisa ti to hi tsimbilela kule ni sihena soneso. (2 Vak. 6:14-17) I di ti to ku ni sihena so kari amu u zumbako kona asi u si si ziviko kwati, ndatinene kumaha wuxolisisi kasiku u mana matshina a milayo a Bhiblia, aya ma no kuvhuna kumaha txisungo txa txinene txa ti to sihena soneso si na mahwa ka mtxhadho wako mwendo nem.
13. Ava va txhadhako va nga mu etetelisa kutxani Jehovha mayelano ni kuamukela maprezenti?
13 Ina ti tolovelekile amu u zumbako kona to ava va rambwako ka mtxhadho ve ningela maprezenti? Vathu ava va nga rambwa mtxhadhoni va nga ningela maprezenti ngu kuya ngu male yi va ku nayo. Ditshuri ti to Makristu ma kuzetwa ku me va ni wuha ni ku kumaha toneto ta va ninga litsako. (Mav. 11:25; Mith. 20:35) Kambe, kha ha fanela kusinzisa ava hi nga va ramba ti to ve hi ninga maprezenti, mwendo kuva va maha ve pfisisa nga maprezenti aya va nga hi ninga hi nga ya txilo. Hi lava kuetetela Jehovha ngu kubonga otshe maprezenti aya vathu va no hi ninga.—2 Vak. 9:7.
NZILA YO LULAMISA SIKARATO MBIMO YI U LULAMISELAKO MTXHADHO
14. Ngu sihi sikarato asi ava va lavako kutxhadha va thukako ve wonisana naso?
14 Awe u nga wonisana ni sikarato mbimo yi u lulamiselako mtxhadho awu wu no kombisa txixonipho ka Jehovha. Ngu txikombiso, ti nga kukaratela kumaha mtxhadho wo hehuka. Charlie awu a zumbako Ilhas Salomão a womba tiya: “Phela ti hi karatete kusawula ava hi ndi no va ramba ka mtxhadho wathu. Amu hi zumbako kona vangana vako va lava ti to u va ramba ka mtxhadho wako. Athu hi ti ni vangana va vangi ni ku hi si ti zivi to hi na ramba mani hi leka mani!” Tabitha, awu se hi nga womba-womba ngu ngene a womba tiya: “Amu hi zumbako kona ti tolovelekile ti to mitxhadho yi va ni vathu vo tala. Se ti tekile mbimo ku vaveleki vathu ve tumela txisungo txi hi nga ti txi mahile txo ramba 100 wa vathu basi.” Sara wa khe Índia a womba tiya: “Vathu vamwani va dhunda kukombisa ti to va ni male ya yingi. Va primu vangu va mahile mitxhadho ya tinduma. Ngu toneto, ni ti pfite ni txi sinziseka ku nani ni maha mtxhadho wa luxu.” Nji txani txi no kuvhuna ku u xula sikarato siya ni simwani asi si nga thukako si humelela?
15. Ngu kutxani mkombelo i di wa lisima mbimo yi u lulamiselako mtxhadho?
15 Maha mkombelo mbimo yi u lulamiselako mtxhadho wako. Maha mkombelo u gela Jehovha sikarato asi u mananako naso u txi lulamisela mtxhadho wako ni ti u tipfisako tona. (Vaf. 4:6, 7) Awe u nga mkombela ti to e kuvhuna u maha sisungo sa wutxhari, u va ni kurula mbimo yi u vilelako ngutu ni kuva ni txibindi ngako ti txi laveka. (1 Pedro 5:7) Awe u naya u themba Jehovha mbimo yi u wonako nzila ayi a xamulako ngu yona mikombelo yako. Tabitha, awu hi nga bhula ngu ngene makhatoni a womba tiya: “Ani ni mwamna wangu hi txi thava ku hi si pfani ni ku mbi pfana ni maxaka athu mbimo yi hi nga ti maha malulamiselo a mtxhadho wathu. Ngu toneto, yotshe mbimo hi nga ti bhula ngu malulamiselo a mtxhadho hi txi khata ngu kumaha mkombelo. Ngu ditshuri, hi txi pfite txivhuno txa Jehovha ni ku hi khatile kupfana.”
16-17. Kubhulisana kwati ti nga va vhunisa kutxani ava va lavako kutxhadha?
16 Bhulisanani ngu nzila ya yinene. (Mav. 15:22) Kota mpatwa, ti na lava mi maha sisungo sa singi mayelano ni mtxhadho wanu. Sisungo soneso si pata kusawula ditshiku adi mi no txhadha ngu dona, mndiwo wu wu no bhikwa, lixta ya va mi no va ramba ni timwani. Mi si se maha txisungo tximwani ni tximwani, bhulisanani kota mpatwa mi tshumela mi bhula ngu matshina a milayo aya ma yelanako ni mhaka yoneyo, ni kukombela txivhuno ka vanathu ava se va ku ni experiyensia. Mbimo yi u wombako ati u tsakelako ku ti ta mahwa ka mtxhadho wanu, ti wombe ngu nzila ya yinene ni ya txixonipho. Ngaku maxaka anu o fana ni vaveleki vanu va txi mi gela mawonelo o kari aya mi ma wonako to mi nga ma thumisa ka mtxhadho wanu ni ku ma si lwisaniko ni matshina a milayo a Bhiblia, va engiseni, mi maha ati va mi gelako. Se ngaku mi si tumelelani ni mawonelo awe, va txhamuseleni ngu nzila ya txixonipho ti to ngu kutxani mi si tumeli. (Vakl. 4:6) Txhamusela maxaka yako ti to txikongomelo txako ngu ku mtxhadho wu tsakisa ni ku yisa wudhumo ka Jehovha.
17 Ti nga karata kutxhamusela vaveleki vanu sisungo asi mi nga si maha ngutu-ngutu vona i si nga Tifakazi ta Jehovha. Kambe ngaku u txo va txhamusela ngu nzila ya yinene vona va nga kupfisisa. Mwanathu Santhosh wa Índia a womba tiya: “Mwaya wathu wu ti lava to hi maha sihena sa va Hindu ka mtxhadho wathu. Ti tekile mbimo ku ani ni msikati wangu hi ya txhamusela mwaya wathu sisungo asi hi nga ti si mahile mayelano ni mtxhadho wathu. Kambe ku ni ti hi nga tumela ku timaha ati ti nga si lwisani ni matshina a milayo a Bhiblia. Ngu txikombiso, hi mahile txisungo txo bhika sakudya asi vona va nga ti si tsakela, hi tshumete hi maha txisungo txa ti to ku na mbi sinywa nem kuembelelwa nguku ti sa toloveleka kwawe.”
18. Nji txani u nga txi mahako kasiku u tsaniseka ti to mtxhadho wako wu na tsimbila ngu nzila ya yinene? (1 Vakorinto 14:40) (Wona ni mfota.)
18 Organizara kwati mtxhadho wako. Ngaku u txi organizara kwati mtxhadho wako, u na vayilela ku ta pekwa ngu txitrese ditshiku da mtxhadho. (Lera 1 Vakorinto 14:40.) Wayne wa khe Taiwan, a womba tiya: “Ku txi ngadi kutxhota masiku o kari kasiku ditshiku da mtxhadho di hoka, ni mahile mtshangano ni votshe ava va nga ti ti ningetete kasiku ta vhuneta ka ditshiku da mtxhadho. Hi bhute ngu malulamiselo aya hi nga ti ma mahile kasi kutsaniseka ti to fexta yi na ta tsimbila ngu nzila ya yinene.” I singeto dwe, tsaniseka ti to txienge tximwani ni tximwani txa mtxhadho txi na mahwa ngu mbimo yi u nga yi vekisa.
Kululamisela kwati ti nga hi vhuna ku totshe ti ta tsimbila ngu nzila ya yinene ngu ditshiku da mtxhadho (Wona paragrafu 18)
19. Nji txani txi no kuvhuna ku u kontrolara ati ti no ta maheka ka ditshiku dako da mtxhadho?
19 U nga vayilela sikarato sa singi ngaku u txo pimisa ngu ti ti nga thukako ti humelela ka ditshiku da mtxhadho wako. (Mav. 22:3) Ngu txikombiso, i di ti to ka wukhalo awu u zumbako ka wona ti tolovelekile ku vathu ve ta ka mtxhadho va sa rambwa, zama kuwona ti to u nga maha txani kasiku eto ti si humeleli. Tximwani txi u nga txi mahako ngu gela maxaka ako aya i singako Tifakazi ta Jehovha ati ti no ta maheka ka mtxhadho wako ni ku va txhamusele mawonelo ako mayelano ni sihena si si mahekako ka mitxhadho. Awe u nga va komba msungo mhaka wa gondo ayi yi ku “O que acontece no casamento das Testemunhas de Jeova?” awu wu manekako ka site ya Jw.org. Kasi ku kuvhuna kukontrolara ati ti no maheka ka ditshiku da mtxhadho wako, i nga va ta tinene kusawula mwanathu awu a nga vitwa ngu didhawa da moya ti to e va “mthangeli wa fexta.” (Joh. 2:8) Ngaku u txo mtxhamusela totshe ati mtxhadho wu no tsimbilisa tona, ene a na kuvhuna ti to mtxhadho wu tsimbila ngu nzila ayi yi tsakisako Jehovha.
20. Ngu tihi ati ava va lavako kutxhadha va fanelako ku ti khumbula?
20 Awe u nga jujeka msungo ngu kupimisa ngu totshe ati ti patekako ko lulamisela mtxhadho. Kambe khumbula ti to mtxhadho ditshiku dimwedo dwe. Ewo makhato a wutomi wo tsakisa awu u no wu hanya ni mkatako mi txi thumela Jehovha ngu wumwewo. Maha totshe ati u nga ti kotako kasiku mtxhadho wako wu va wo hehuka ni wu wu tsakisako Jehovha. Themba Jehovha. Ngu kukongomiswa ngu ngene, awe u nga sikota kululamisela mtxhadho wo tsakisa awu wo nem khu na mbi wu divala.—Mas. 37:3, 4.
NDANDO 107 Txikombiso txo sawuleka txa lirando
a TITXHAMUSELO TA MAPSWI O KARATA: Ka mindhawuko yo tala, mtxhadho wu pata kumaha sixambanyo masoni ka Txizimu. Se ngu msana ku londisela fexta. Ka makhalo aya ti nga mbi toloveleka kumaha mafexta a mtxhadho, Makristu ya ma zumbako ka wukhalo wonewo ni ona ma fanete kuxonipha matshina a milayo a Bhiblia.
b Kasi kuziva to engeteleka mayelano ni mawonelo a Makristu ko engisa mlayo mayelano ni mtxhadho, wona msungo mhaka wa gondo awu wu ku “Micato Leyi Xiximekaka eMahlweni Ka Xikwembu Ni Vanhu” ka Muwoneleli wa 15 ka Outubro wa 2006 ngu Txitsonga.
c Wona ka Jw.org vhidhiyo ayi yi ku Ina ni fanete ku ningela wusuke?