Vafi va nga tshumela ve hanya kambe?

NGU TIHI TI DI BHIBHELE DI WOMBAKO TONA

Ku na va ni ku “wuka ka vakufa.”​—Mithumo 24:15.

TONETO TI NI TXIVHUNO MUNI KA WENA

Thavelelo mbimo yi va hi va dhundako va fako.​—2 Vakorinto 1:3, 4.

Ku txhatxheka ka ku thava lifo ku pinda mpimo.​—Vahebheru 2:15.

Ku themba ko tsana ko tshumela u tshangana ni vafi va wena va u va dhundako.​—Johane 5:28, 29.

HI NGA KHOLWA KANI NGU KU TSANISEKA TI DI BHIBHELE DI TI WOMBAKO?

Inna, hi na wombawomba ngu sivangelo siraru:

• Txizimu ngu txona i ku Mvangi wa wutomi. Di Bhibhele di dhana Jehovha Txizimu ku “[njisima] txi txi ningako wutomi.” (Masalmu 36:9; Mithumo 17:24, 25) Awu a ningako wutomi ka sotshe sivangwa si si hanyako kha ditshuri a nga sikota ku wuseta wutomi ka va va nga fa.

• Txizimu txi wusile vathu ka vakufa mbimo yi yi nga pinda. Di Bhibhele di xawutela sikhati sa 8 ahawa vathu​—vavaphya, vahombe, vavamna, ni vavasikati—​ava va nga tshumetelwa wutomini ha mafuni. Vamwane va ti nga di kufa, kasi mmwane a ti diyivani ngu mune wa masiku!​—Johane 11:39-44.

• Txizimu txa xuva ku tshumela txi maha toneto. Jehovha wa li vengela lifo; ene a li wona idi mlala. (1 Vakorinto 15:26) Ene wa “xuva” ku xula mlala eyo, e thavisa mtamo wa lifo ngu ku wusa vafi. Ene wa xuva ku wiyisa ava va kuho ka mialakanyo yakwe ni ku tshumela e va wona kambe va txi hanya ha mafuni.​—Jobe 14:14, 15, Tradução do Novo Mundo.