Nji Txani Mfumo wa Txizimu?

DIBHIBHELE DI WOMBA TXANI

“Txizimu txa nzumani txina veka mfumo awu wu no mbi loviswa.”​—Dhaniele 2:44, Tradução do Novo Mundo.

“Hi veleketwe mwanana, ni ku wukoma wu na va dikatani kwakwe.”​—Isaya 9:6, nota de rodapé.

ATIYA TI WOMBA TXANI KWAKO

• Wukoma wo lulama awu wu nga ku wuyelisako.​—Isaya 48:17, 18.

• Wutomi ka dihanyo do hetiseka ni do tsakisa, ka mafu a maphya ya ma tako.​—Mtuletelo 21:3, 4.

HI NGA KHOLWA KANI NGU KU TSANISEKA TI DI BHIBHELE DI TI WOMBAKO?

Inna, ngu sivangelo simwane sa simbidi:

• Jesu a kombisile ati Mfumo wa Txizimu wu no ta ti hetisisa. Jesu a gondisile vapizani vakwe ku kombela ti to Mfumo wa Txizimu wunate ni ti to ku randa ka Txizimu ku na maheke ha mafuni. (Matewu 6:9, 10) Jesu a kombisile ti to mkombelo wuwa wu na xamuliswa ku txani.

  Mbimo yi Jesu a ngati ha mafuni, a ningile sakudya va va ku ni nzala, e hanyisa valwati ni ku wuyisa wutomi ka vakufa! (Matewu 15:29-38; Johane 11:38-44) Kota Mkoma wa Mfumo wa Txizimu wa mbimo ayi yi tako, Jesu a ningete malulamiselo o tsakisa ya ti Mfumo wa Txizimu wu no ta mahela vathu vakwe.​—Mtuletelo 11:15.

• Txiemo txa mafu txi tsanisekisa ti to Mfumo wa Txizimu i si nga kale wu na ta. Jesu a wombile to wu si nze ku tisa kudikha Mfumo wuwa, mafu ma ti na xaniswa ngu tiyimbi, tinzala ni ku zinginikela ka mafu.​—Matewu 24:3, 7.

  Nyamsi ha txi wona txiemo txonetxo. Kambe hi nga themba ti to i si nga kale Mfumo wa Txizimu wu na heta sikarato.