Jesu a engisile mbimo yotshe

Ina ta hehuka kuengisa vaveleki vako mbimo yotshe?— Mbimo yimwani ta karata. Mba mani va Jesu a nga ti va engisa?— A ti engisa Jehovha ni vaveleki vakwe. Txikombiso txakwe txi nga kuvhuna ti to u engisa vaveleki vako hambi ti txi karata. Konkuwa he gonde to tala ngu mhaka yiya.

A si nze kuta ha mafuni, Jesu a ti zumba nzumani ni Tate wakwe Jehovha. kambe Jesu a ti ni vaveleki ha mafuni hawa. Matina awe i Josefa ni Mariya. Wa ti ziva ti to ti mahisile kutxani ti to ve maha vaveleki vakwe?—

Jehovha a to teka wutomi wa Jesu khe nzumani e wu beta mndani ka Mariya ti to e kota kuvelekwa ha mafuni. Eto i ve mhaka yo xamalisa ngutu! Jesu a kute mndani ka Mariya kufana ni vanana vamwani ava va kulako mndani ka va mame vawe. Kambe ngu mtxima wa wu 9, Jesu a to velekwa. Se ti mahisile toneto to Josefa ni Mariya ve va vaveleki va Jesu va ha mafuni.

Mbimo yi Jesu a nga ti ni 12 wa malembe, a kombisile ti to a ti mu dhunda ngutu Tate wakwe Jehovha. Eto a ti kombisile mbimo yi va nga teka liendo la hombe va txi ya Jerusalema va txi ya maha M’buso wa Pasika. Se mbimo yi va nga ti wuya m’tini, Josefa ni Mariya kha va mu mana Jesu. Wa ti ziva ti to a ti hani?—

Josefa ni Mariya va tshumete ngu kututuma ve ya Jerusalema va txi xoletela Jesu. Kambe vona va ti karatekile ngutu nguko va si mu mani. Kambe msana ka masiku mararu va ti ya m’mana dithepeleni! Wa tiziva ti to ngu kutxani Jesu a di zumbile dithepeleni?— Nguko kona a ndina gonda ngu Tate wakwe Jehovha. Ene a ti mu dhunda Jehovha ni ku a ti lava ku mu tsakisa. Hambi mbimo yi a nga kula e va wa hombe, ene a engisile Jehovha. Jesu a engisile hambiku ti nga txi karata e tshumela e xaniswa. Ina Jesu a engisile Josefa ni Mariya?— Ina, Bhiblia yi womba toneto.

U gonda txani ka txikombiso txa Jesu?— Ti lava u engisa vaveleki vako, hambi ti txi karata. Ina u na ti maha toneto?—