TXIENGE 2

Thembeka ka mkatako

“Asiya Txizimu txi nga si tshanganisa m’thu a nga thuke a txi si abanisa.”—Marku 10:9

Jehovha a lava ti to hi kombisa ku thembeka. (Mika 6:8) Eto ti ni lisima ngutu wukati kwako, nguko ku thembeka nga lisima. Se ku thembana ku maha ti to lirando li tura.

Nyamsi wa ditshiku, ku thembeka ka wukati ku ha txibeheni. Ngu toneto, ti to u vhikela wukati wako, u fanete ku ti emisela ku maha timhaka timbidi.

1 MAHA TI TO WUKATI WAKO WU VA TXILO TXO KHATA KWAKO

ATI DIBHIBHELE DI TI WOMBAKO: “Kota kusawula ati i ku ta tinene ngutu.” (Vafilipiya 1:10) Ka totshe timhaka, wukati wako tximwane txa silo sa lisima ngutu ka wutomi wako. Wu teke idi wa lisima.

Jehovha a lava ti to u randa mkatako ni “ku tidila ngu wutomi” mi di motshe. (Eklesiasta 9:9) Ene a ti vekile ha kubasani ti to khwa fanela kwa mbi khatala ngu mkatako, kambe ku hambana ni toneto mi fanete kulava tinzila to tsakiselana. (1 Vakorinto 10:24) Maha ti to mkatako e ti wona atxi randwa ni ku tsakelwa.

Mwamna atxi nehela msikati wakwe ditxikiri da txaya; mwamna a wuya m’tini se msikati wakwe atxi bhika

NGU TIHI TI U NGA TI MAHAKO:

Tsaniseka ti to mkama ni mkama ma heta mbimo mi di motshe, ni ku wa khatala ngu ngene
U txi pimisa u nge ngadi u txi khawe “ani” kambe u nda khawe “athu”

Mwamna ni msikati ava va nga ti vekela mbimo yo zumba votshe ve bhula

2 XAYISA MBILU YAKO

ATI DIBHIBHELE DI TI WOMBAKO: “Awule a wonetelako wamsikati ngu ku m’navela, se a mahile nayo wugango mbiluni kwakwe.” (Matewu 5:28) Ngako m’thu a txi zumbela ku alakanya ngu timhaka ta mataho ni wu a nga mbi tekana nayo, ngu ditshuri, ene a na va a sa thembeka ka mkatakwe.

Jehovha a khene kulaveka ti to u “xayisa mbilu yako”. (Swivuriso 4:23; Jeremiya 17:9) Ti to u maha toneto, kulaveka ti to u vhikela maso ako. (Matewu 5:29, 30) Tekelela txikombiso txa Joba, awu a nga maha mpfanano ni maso akwe ti to a si thuke e wonetela wamsikati ngu ku mu navela. (Yobo 31:1) Ti emisele kwa mbi wonetela sithombe sa vathu va va nga mbi ambala txilo. U nga tumelele kambe ti to u va ni mabhulo aya ma wusako minavelo ya ta mataho ni m’thu mmwane hahanze ka mkatako dwe.

Mfota wa msikati wu ku ha mezani ya mthumoni wa mwamna

NGU TIHI TI U NGA TI MAHAKO:

Tiveke ha kubasani ka vamwane ti to awe u randa mkatako dwe
Ma tekele ha msungo matipfelo a mkatako, se ngu txikuluveta u gumisa wungana wuhi ni wuhi ni m’thu mmwane, awu wu nga mahako ti to mkatako e mi pimisela to kari