Nzila ya yinene yo hanyisana ni maxaka anu

Vathu va va tekanako va khata mwaya wa wuphya. Hambi ku u no dhunda vaveleki vako ni ku va xonipha, kambe konkuwa mkatako ngene i ku wa lisima ku pinda votshe. Mamwane maxaka ako ti nga karata ti to me tumela toneto. Kambe milayo ayi yi kongomisako ya diBhibhele yi nga kuvhuna kudinganisela, ti to u va ni kudikha ni maxaka ako mbimo yi u tikaratelako ku aka mwaya wako wa wuphya.

1 TEKA MAXAKA AKO I DI A LISIMA NI ONA

ATI DIBHIBHELE DI TI WOMBAKO: “Thava tate wako ni mame wako.” (Vaefesu 6:2) Kha ti nga ni mhaka ti to u ni malembe mangahi, mbimo yotshe u fanete u xonipha vaveleki vako. Khumbula ti to mkatako nene a fanete ku xonipha vaveleki vakwe. “Lirando kha li nga ni mazonda”, ngu toneto u nga pandiseki ngu wuxaka wu mkatako a ku nawo ni vaveleki vakwe.​—1 Vakorinto 13:4; Vagalatiya 5:26.

NGU TIHI TI U NGA TI MAHAKO:

• Vayilela mapswi o nga awa “Maxaka ako mbimo yotshe ma ni veka hahatshi” mwendo ya ma ku “Totshe ti ni ti mahako mame wako kha titsakeli”

• Duketa kuwona timhaka ngu ha mkatako a ti wonako ngu kona

2 MBIMO YIMWANE TI LAVA NGA WO BANGISA MSUNGO

ATI DIBHIBHELE DI TI WOMBAKO: “Wamwamna a na siya tate wakwe ni mame wakwe, a fanete kunamarela msikati wakwe ni ku va fanete kuva nyama yimweyo.” (Genesa 2:24) U di belete wukati, vaveleki vako va nga wona nga u ngadi manzani kwawe ni ku va nga lava ku bela bela ni ka ti ti si va lumbiko.

Ngawe ni mkatako mi sungako ti to mi va vekela sipimelo sihi mi gwita mi va gela sona ngu nzila ya lirando. Mi nga wombawomba mi di txhusekile na mi si va dheleli. (Swivuriso 15:1) Ku tiveka hahatshi, ku va wo hehuka, ku va wo timisela ti na mi vhuna ti to mi va ni wutomi wa wunene ni maxaka anu ni ku mi ya masoni “mi txi tsetselelana ngu lirando”.​—Vaefesu 4:2.

NGU TIHI TI U NGA TI MAHAKO:

• Ku nga ti nzila yi maxaka ma belelako ngu yona timhaka ta mwaya wanu yi txi ku karata, bhulisana ni mkatako ngu mhaka ya kona ngu mbimo ayi yi fanelako

• Tumelelanani ti to mi nga yi lulamisa ngu nzila yihi mhaka yoneyo