Ngu yihi nzila yo gondisa mwanana wako?

Mbimo yi Jehovha a nga maha lulamiselo ya mwaya, a ningile vaveleki fanelo yo gondisa vanana vawe. (Vakolosa 3:20) Awe mveleki i fanelo yako yo gondisa mwanana wako kudhunda Jehovha ni ti to e kula a di ni wutixamuleli. (2 Timoti 1:5; 3:15) Kambe u fanete u tikaratela kuziva ati ti ku mbiluni ka mwanana wako wa dijaha mwendo wa dihorana. Kambe ziva ti to txikombiso txako nja lisima ngutu. U nga si kota kugondisa mwanana wako Dipswi da Jehovha ku nga ti awe u txi khata ngu ku dyisa mbilu yako ngu dona.​—Masalmo 40:8, NM.

1 MAHA TI TO VANANA VAKO VE TI PFA TI TXI VA HEHUKELA KU WOMBAWOMBA NI NAWE

ATI DIBHIBHELE DI TI WOMBAKO: “Wuhi ni wuhi a na kuluvete kuengisa, a txi swela ku womba.” (Jakobe 1:19) Maha vanana vako ve ti pfa ti txi va hehukela ku wombawomba ni nawe. Eto ti na maha ti to ve ti ziva ti to u ti emisete ku va engisela mbimo yimwane ni yimwane ku nga ti va txi lava kuwombawomba. Maha ti to vanana vako ve ti pfa i di vangana vako ti to ti va hehukela ku ti phofula. (Jakobe 3:18) Ku nga ti va txi alakanya ti to u na va bhongela mwendo ku va sola sola, eto ti nga maha ti to ve thava ku ti phofula. Va laphisele mbilu kambe mbimo yimwane ni yimwane u va tsanisekisa ti to wa va dhunda.​—Matewu 3:17; 1 Vakorinto 8:1.

NGU TIHI TI U NGA TI MAHAKO:

• Ku nga ti vanana vako va txi lava kuwombawomba ni nawe va ninge mbimo

• Bhula ni vanana vako yotshe mbimo i si nga kurinzela mbimo ya sikarato basi

2 DUKETA KUPFISISA ATI VA TI WOMBAKO

ATI DIBHIBHELE DI TI WOMBAKO: “Awu a ku ni ku pfisisa mhakani a na mana ti i ku ta tinene.” (Swivuriso 16:20) Mbimo yimwane u fanete kuziva matipfelo a vanana vako hambi va sa womba txilo. Ka vaphya ti tolovelekile ti to ve womba timhaka ti va si laviko kuwomba tona. “Ku nga ti m’thu atxi angula ka mhaka yo kari a si se yipfa, eto wupumbu kwakwe.” (Swivuriso 18:13) U nga kuluveteli ku henya.​—Swivuriso 19:11.

NGU TIHI TI U NGA TI MAHAKO:

• U nga va bele mkanani mwendo ku va henyela mbimo yi vanana vako va wombako ti u si ti dhundiko

• Duketa kukhumbula ati u nga txi tipfisa tona u di ka tanga yi va ku ka yona ni ti to nji txani atxi u nga txi txi teka i di txa lisima

3 VANANA VA NGA MI LWISI

ATI DIBHIBHELE DI TI WOMBAKO: “Mwanagu, engisa mlayo wa tate wako, kambe u nga wu tshuraleli mlayo wa mame wako.” (Swivuriso 1:8) Jehovha a ningile vaveleki fanelo yo vekela milayo vanana vawe. Mi fanete kugondisa vanana vanu kuengisa ni txixonipho. (Vaefesu 6:1-3) Vanana va ti wona i di ti to vaveleki kha va ‘pfani ka ti va ti pimisako’. (1 Vakorinto 1:10) Ku nga ti mi si pfani ka to kari mi nga ti kombiseni masoni ka vanana vanu nguko ti nga maha ti to va si mi xoniphi.

NGU TIHI TI U NGA TI MAHAKO:

• Bhulani ngu nzila yi mi no laya vanana vanu ngu yona

• Ku nga ti mi di ni mawonelo o hambana mayelana ni nzila yi mi fanelako kugondisa vanana vanu ngu yona, duketani ku pfisisana

4 VANA NI TXIKONGOMELO

ATI DIBHIBHELE DI TI WOMBAKO: “Gondisa mfana ngu nzila yi yi mfanelako.” (Swivuriso 22:6) Kha ti na ku timahekela ti to vanana vako ve mana gondo ya yinene kambe u fanete u va gondisa ni ku va laya. (Masalmo 127:4; Swivuriso 29:17) Kulaya kha ti wombi ku va tsayisa basi, kambe ti pata ku va ve pfisisa txivangelo txova va di veketwe milayo. (Swivuriso 28:7) Va gondise kudhunda Dipswi da Jehovha ni kupfisisa milayo ya dona ayi yi kongomisako. (Masalmo 1:2) Eto ti na maha ti to u va ni livhalo la linene.​—Vahebheru 5:14.

NGU TIHI TI U NGA TI MAHAKO:

• Tsaniseka ti to vanana vako va teka Txizimu kota m’thu wu va nga mthembako

• Va vhune ti to ve ziva ni ku vayilela mahanyelo o biha, o fana ni ya ma manekako ka internet. Va gondise nzila yo vayilela ava va xengako vathu kasi ku na sengela navo ka timhaka ta mataho