TXIENGE 3
Kuhenyiswa—Ngako hi di ni “txisolo ka mmwani”
Linda a khene: “Mwanathu mmwani wa txisikati dibanzani kwathu a ni lumbetile kupa male. Vawmani dibazani va yi zivile mhaka yiya, se ve khata kumaha mibhando. Ngu kutsimbila ka mbimo, mwanathu wule a ni gete ti to a mani ditshuri da ti to ani ni sa pa txilo. Hambiku a nga ta kombela divalelo, ni txi tipfa nga ni nge sikoti ku mu divalela ka mhaka yiya.”
INA awe u ti nga va ka txiemo txo fana ni txa Linda, awu a nga henyiswa ngu Mkristu kulowe? Dikhombo da kona, vamwani va henyisilwe ngu vanathu se ve godhola. Ina nawe u to henyiswa se u godhola?
I mani a no sikota ku hi hambanisa ni “lirando la Txizimu” kani?
Ditshuri ti to ti nga karata kudivalela mwanathu wu a nga hi henyisa, hambiku Makristu ma gondiswako ku randana. (Johani 13:34, 35) Ngako hi di henyisilwe ngu mkhozeli kulothi, hi nga pandiseka ngutu.—Masalmo 55:12.
Ngu ditshuri, Bhiblia ya fakaza ti to mbimo yimwani Makristu ma nga va ni “txisolo ka mmwani.” (Vakolosa 3:13) Hambiketo, ngako eto ti txi hi humelela ti nga thuka ti karata kuwonisana nato. Hi nga vhunwa ngu txani? He wone 3 wa matshina a milayo a Bhiblia:
Tate wathu wa nzumani wa wona totshe. Jehovha wa wona totshe ti ti mahekako, kupata ni wubihi awu hi mahelwako ni wuyelo ya wona wubihi wonewo. (Vahebheru 4:13) I si nge to dwe, Jehovha wa hi pfela ngako hi txi xupheka. (Isaya 63:9) Kha tumeleli ku “sikarato, mwendo kuxupheka” hambi ni timwani to pata ku i di mwanathu a hi xuphako ti hi “hambanisa ni lirando la Txizimu.” (Varoma 8:35, 38, 39) Nanathu hi lava kumaha nga ha Bhiblia yi wombako ngu kona, hi si tumeleli txilo mwendo m’thu e hi hambanisa ni Jehovha.
Kudivalela kha ti wombi kuema ni wubihi. Ngako hi txi divalela ava va nga hi onhela, hi nga ti to ho ema ni ti hi nga mahelwa to biha. Khumbula to Jehovha kha tsakeli wubihi, kambe wa divalela ngako ku di ni txivangelo txo maha toneto. (Masalmo 103:12, 13; Habhakuki 1:13) Jehovha a lava hi mu etetela, ngu toneto a hi kuzeta ku hi divalela vamwani. “Dikhulo dakwe kha di simami kala kupinduka.”—Masalmo 103:9; Matewu 6:14.
Ngako hi txi leka dikhulo mwendo txiviti txi pinda, ta hi wuyelisa hipune. Ti mahisa kutxani? Alakanya nguko u teka dirigwi da didotho u di fumbareta u nawuluta diwoko dako di txi thwim. U nga sikota ku zumba nado ngu mbimo yo kari u si karali. Kambe, ina u pimisa ti to u nga sikota kusimama u di di ñote ngu mbimo yo lapha? Ina u nga gwenta ku di ñola mbimo muni? Ti ha kubasani ti to u na gwitisa kukarala! Kambe hi nga ti to kunemela ka dirigwi ku no txitxa. Kambe di na pfala nga do nemela ngutu nguko u hetako mbimo u di nado. Ta fana ni kuzumba ni dikhulo. Ngako u txi zumba ni txiviti, hambi i do ko va txa txidotho, ti na dayisa athu hipune. Ngu toneto, Jehovha a hi kuzeta ku hi leka dikhulo. Kumaha eto ti vhuna athu hipune.—Mavingu 11:17.
Ngako hi txi divalela vamwani ho ti vhuna hipune
“Ni ti pfite nga Jehovha a txo womba-womba ni nani apune”
Nji txani txi nga vhuna Linda ku a si zumbi ni dikhulo ngu timhaka ti ti nga mu humelela? Timwani ka tona ngu kuva a di alakanyisisile ngu ti Bhiblia yi ti wombako ngu kudivalela. (Masalmo 130:3, 4) Linda a vhunilwe ngutu ngu kuziva ti to ngako hi txi divalela vamwani Jehovha nene a na hi divalela. (Vaefesu 4:32–5:2) A txi khumbula ati a nga vhunekisa tona a womba a txi khene: “Ni ti pfite nga Jehovha a txo womba-womba ni nani apune.”
Ngu kutsimbila ka mbimo Linda a xute txiviti txi a nga ti natxo. Ene a divalete mwanathu wule, se konkuwa vangana va hombe. Tsaniseka ti to Jehovha a na kuvhuna ti to u sikota kudivalela vamwani.