Na dyisetwa ngu titanga tangu: Ni na maha txani?

U NGA MAHA TXANI?

Alakanya ngu mhaka yiya: Mfana mmwane va ku i Toni a khene kha tsuli txikolwani nyamsi. Mangwana kambe, nem hambi ni ditshiku ni dimwedo. Mhaka yiya yi khatile ka mitxima yiraru yi yi nga pinda mbimo yi vagondi kulowe va nga m’lukela makuhu o thisa. Mndani ka masikunyana se a ti ningilwe sitinana so mpoyila. Ditshiku dimwane va hangalasete mabhuku akwe nga vo mbi tiwona. Vamwane va ema ngu msana kwakwe i di vangi se e pfa n’kurethwa, kambe a txi wuka asi m’woni ti to i mani. Nyamnova mhaka yi ti karatile ngutu, va bhate timhaka to biha ngu ngene ka internet . . .

U di mahile txani i di ti to ngawe Toni?

ALAKANYISISA NGU TIYA!

Hi nga ti to awe wo va dibeba! U nga sikota kuxula ku dyisetwa nem u sa nga ñolana navo ngu manza. U nga mahisa ku txani?

• U NGA LWI NAVO. Bhiblia yi womba tiya: “M’thu wule i ku txiphukuphuku a humisa txotshe txiviti txakwe ha kubasani, aniko m’thu wo ziva wa timisela ni kutiñola.” (Mavingwa 29:11) Zama kumalala u txi tikota. U txi maha toneto avale va kuvhuketelako va nga dhana vokha.

• U NGA MAHI DISO NGU DISO. “Mi nga tshumeteleni kubiha ngu kubiha.” (Varoma 12:17) Timhaka ti na bhedha ngutu u txi lava kuphota.

• VAYILELA NGUZI. Bhiblia yi womba tiya: “M’thu wo txhariha wa wona phango yi di ngadi kule, a txi yi thava.” (Mavingwa 22:3) Vayilela vathu ava va dhundako kudyiseta vamwane. U tiwonela ka timhaka ati va nga thukako ve kuxanisa ka tona.

• WOMBA TI TXIGEVENGA TXONETXO TXI NGA MBI TIRINZELA. Bhiblia yi womba tiya: “Xamulo yo tiveka hahatshi yi rulisa txiviti.” (Mavingwa 15:1) I tshuku u mahanyana difenya. Ngu txikombiso, va txi khona u txidhebwere; u nga sekanyana se u txi khawe: “no dya ni txi enela!”

• MALALA U TSULA. Nora wa 19 wa malembe a khene: “Kumalala ti kombisa ti to se u wa hombe futhi wo mu leka awu a kudyisetako i singa ti to o kuxula.” A tshumela a txi khene: “ti kombisa ti to wa tiñola i ku ti m’thu awu a dhundako kudyiseta vamwane asi ti kotiko.”—2 Timoti 2:24.

• U NGA TI TEKI U SI NGA WA TXILO. Mbimo yo tala ava va dyisetako vamwane va thanga ngu kuwona ti to i mani awu asi tithembiko, se ve khata ku m’dyiseta va txi themba ti to a na mbi maha txilo. Kambe va txi wona ti to nawe u ma tute va nga tsimbilela kule.

• GELA MMWANE A TI VA KU MAHAKO. Wamsikati mmwane awu i nga ti mgondisi a khene: “Ni gela va va dyisetwako ti to va na gele vamwane. Nda tinene, ti nga maha ti to ve thava kudyiseta vamwane.”