Mosi a sawute kukhozela Jehovha

Ina wa ti khumbula ti to mwaya wa Jakobe wu tsute wuya zumba Egipta? Akhe, mwaya wawe wu ti ya va wa hombe ngutu ni ku va txi dhanwa ku Vaisrayeli. Ku di pindile mbimo yayingi, Jakobe ni Josefa va fite, se ku ti ni Faro mmwani awu a nga txi fuma Egipta. Ene a karatekile ngutu mbimo yi a nga wona ti to Vaisrayeli i ti vangi ngutu kupinda Vaegipta. Se, ene a sinzisile Vaisrayeli ti to ve thuma ngutu ko dima ni kumaha sitini. Kambe, eto kha ta siza txilo. Ngu toneto, Faro a rumisile ti to votshe vanana va sifanyana ava va nga txi velekwa ngu Vaisrayeli ve dawa. Mbimo yi Vaisrayeli va nga pfa toneto, ti nga maha va di thavile ngutu.

Ka mbimo yile, wamsikati wa Muisrayeli awu a nga txi dhanwa ku i Jokebhedhi, a velekile mwanana wa txifanyana awu a nga ti tshurile ngutu. Kasi kuvhikela mwanana wule ti to asi dawi, Jokebhedhi a m’betile amu ka thavangu eya m’sisa ka mwasi hafuhi ni mnambu wa Nilo. Ndiya ya mwanana wule, awu a nga txi dhanwa ku i Miriyamu, a tiya zumba hafuhi hale kasiku e wona ati ti ndi no maheka.

Se mwanana wa Faro wa dihorana, a to tsula eya samba ka mnambu wa Nilo. Mbimo yi a nga hoka, a woni thavangu ayi yi nga ti ni mwanana awu a nga txi dila. Ene a to mpfela wusiwana. Miriyamu ndiya ya mwanana wule, a to tsula ka mwanana wa Faro eya m’wotisa tiya: ‘Wa ti lava ku ni ya kudhanela wamsikati kasiku eta kuvhuna kukhatelela mwanana wuwa?’ Mwanana wa Faro a tumete, se Miriyamu a to ya dhana mwamwakwe Jokebhedhi. Mwanana wa Faro a gete tiya Jokebhedhi: ‘Teka mwanana wuwa u ya ni xayisela ene, ni na kuhakela.’

Mbimo yi mwanana wule a nga kulanyana, Jokebhedhi a m’tekile e m’yisa ka mwanana wa Faro. Mwanana wa Faro a m’rayile ditina do i Mosi ni ku a m’khatalete a txi nga ova mwanana wakwe. Mosi a kulisilwe a txi nga ova mwanana wa mkoma ni ku a txi mana sotshe asi a nga txi si lava. Kambe, ene a txi tiziva ti to i ti Muisrayeli, ngu toneto, a sawute kuzumba ni vathu va Jehovha.

Mbimo yi Mosi a nga ti ni 40 wa malembe, ene a txi lava kuvhuna vathu vakwe. Ditshiku dimwani, a woni Muegipta a txi peka Muisrayeli, se Mosi a to peka Muegipta wule. Ene a m’pekile ngutu aha koza Muegipta wule e fa. Mosi a to kuletela Muegipta wule ngu mafu aha ka txivhunyi. Mbimo yi Faro a nga ti ziva a zamile kudaya Mosi. Ngu toneto, Mosi a pfhukile e tsula ka ditiko adi di nga ti dhanwa ku i Midhiyani. Kambe, Jehovha a simamile e khatalela Mosi.