Mitungu yiraru yo khata

Akhe Egipta Vaisrayeli va txi sinziswa kuthuma kota sibotxhwa. Se kasi kuvhuna vathu vakwe, Jehovha a rumete Mosi ni Aroni veya gela tiya Faro: ‘Leka vathu vangu ve tsula veya ni khozela txitingani ka wukhalo wa kule ngutu.’ Aku Faro a nga txi ti gela ngutu, a si lavi kuengisa Jehovha, a ti khene: ‘Ani nem kha ninga ni mhaka ni ti Jehovha a nga womba, kha ni nambi va leka Vaisrayeli ve tsula.’ Phela aku Faro a nga ziva ti to Vaisrayeli va ti fanete kutsula, a to va engetela mithumo. Wa ti ziva ati Jehovha a nga maha? Ene a mahile ti to Egipta kuhumelela 10 wa mitungu. Jehovha a gete tiya Mosi: ‘Gela Faro ti to ngaku a si ni engisi, otshe mati a mnambu wa Nilo ma na txitxa me maha mnoha.’ Mosi a tsute eya womba-womba ni Faro. Se mbimo yi Aroni a nga peka mati a mnambu wa Nilo ngu ndonga yakwe ona ma to txitxa me va mnoha. Mati yale ma to khata kununga ngutu, se sotshe sihaka si to fa, nem ti si ngadi ti koteka kusela mati yale. Hambiku a nga wona totshe tile, Faro a lambile kuleka Vaisrayeli ve tsula.

Ku di pindile divhiki, Jehovha a gete tiya Mosi: ‘Tshumela kambe u ya womba-womba ni Faro. M’gele ti to ngaku a si leki vathu vangu ve tsula, kotshe Egipta ku na tala ngu matxhele.’ Faro kha engisa Jehovha. Ngu toneto, Aroni a guletile ndonga yakwe, se matxhele ma to tala kotshe Egipta. Matxhele yale ma ti ka otshe makhalo, tinyumbani, txitimwi ka mibhedhu hambi ni mu ka maparato. Mbimo yi ti nga maheka tiya, Faro a gete tiya Mosi: ‘No kombela! Kombela Jehovha ti to e emisa mtungu wuwa wa matxhele, na thembisa ti to ni na va leka Vaisrayeli ve tsula.’ Se, Jehovha a emisile mtungu wule ni ku otshe matxhele yale ma fite. Kotshe Egipta ku to nunga ngutu. Vaegipta va sengeletete mimumbu ni mimumbu ya matxhele o fa. Hambiketo, Faro a lambile kuleka Vaisrayeli ve tsula.

Ngu toneto, Jehovha a gete tiya Mosi: ‘Gela Aroni e peka hahatshi ngu ndonga yakwe se lithulu li na humisa titshuna.’ Aroni a mahile toneto, se kotshe Egipta ku to tala ngu titshuna. Mbimo yi Vaegipta va nga wona titshuna tile, va to ya gela tiya Faro: ‘Atiya ti ta ngu ka Txizimu.’ Kambe, Faro a lambile kuleka Vaisrayeli ve tsula.