Mtungu wa wu 10

Mosi a thembisile Faro ti to a si na kutshumela e wonana nayo. Kambe na a si se tsula, Mosi a wombile tiya: ‘Hagari ka wusiku wa nyamsi votshe vafana va matewula va Vaegipta va na fa. Kukhukhela ka mwanana wako kala ka vanana va sithumi sako.’

Jehovha a rumile Vaisrayeli ti to ve lulamisela jantari yo sawuleka ka wusiku wule. Ene a va gete tiya: ‘Dayani nvuta mwendo phongo mi teka mnoha wa kona mi tota ka matimba a tinyumba tanu. Bawulani nyama ya kona mi dya ni mapawa o mbina ferimentu yo kukumukisa mapawa. Ti lulamiseleni, nguku ka wona wusiku wuwa ni na mi humisa Egipta. Alakanya nzila yi Vaisrayeli va nga tsaka ngu yona! Phela vona va ndi huma Egipta amu va nga txi mahwa sibotxhwa.

Ka wona wusiku wule, ngilozi ya Jehovha yi pindile ngu ka yotshe miti ya Egipta. Se aha yi nga si woni mnoha wu di totilwe ka ditimba, yi txo bela yi daya mwanana wa mfana wa matewula. Kambe aha yi nga txi wona ti to ditimba di totilwe mnoha yi si beli. Ngu toneto, totshe timwaya ta Vaegipta kukhukhela ka wo ganya kala ka sisiwana, va fetwe ngu vanana vawe va matewula. Kambe, vanana va Vaisrayeli kha va fa.

Hambi mwanana wa matewula wa Faro a fite. Faro a si nga ngadi e gwenta totshe tile. Ngu toneto, a rumisile ti to veya dhana Mosi ni Aroni e ta va gela tiya: ‘Podhi mi teka vathu vanu. Tsulani mi ya khozela Txizimu txanu. Tekani sihari sanu mi hangalaka hawa!’

Ka wusiku wule, Vaisrayeli va humile Egipta va di organizadhu ngu magrupu. Ku ti ni 600.000 wa vavamna va Vaisrayeli ni vavasikati vavangi ni vanana. Hambi vathu vavangi ava i nga singa Vaisrayeli va tsute navo kasiku veya khozela Jehovha. Ngu magwito Vaisrayeli i singa ngadi sibotxhwa.

Kasiku Vaisrayeli va si yi divali nzila yi Jehovha a nga va humisa ngu yona Egipta, dilembe ni dilembe vona va txi maha jantari yile yo sawuleka. Vaisrayeli va ti dhana jantari yile ti to i Paxkwa.