6 wa mitungu ayi yi nga londisela

Mosi ni Aroni va to tsula kambe ve ya womba-womba ni Faro ve m’gela tiya: ‘Txizimu txi wombile ti to ngaku awe u si hi leki hi tsula, txi na rumela mabhawa me tata kotshe Egipta.’ Se, timiliyoni ta mabhawa ti to tata yotshe miti ya va Egipta. Kambe, mabhawa onewo kha ma bela ka miti ya Vaisrayeli. Mtungu wuwa ni yi yimwani yi nga londisela, yi ti hambanile ni mitungu yo khata. Nguku yona yi to mahekela Vaegipta basi. Mbimo yi Faro a nga wona tiya, a to khene: ‘Mosi, kombela Jehovha ti to e emisa mabhawa yawa ni na mi leka mi tsula.’ Se, Jehovha a to emisa otshe mabhawa, kambe Faro kha leka Vaisrayeli ve tsula.

Ngu toneto, Jehovha a ti khene: ‘Ngaku Faro a si leki vathu vangu ve tsula, sihari sa Egipta si na lwala si tshumela si fa.’ Se ka ditshiku adi di nga londisela, sotshe sihari sa Vaegipta si fite, kambe sa Vaisrayeli si simamile si hanya. Faro a ti zivile totshe eto, kambe aku a nga ti ni kanu, kha leka Vaisrayeli ve tsula.

Ngu toneto, Jehovha a gete tiya Mosi: ‘Teka dikhuma u ya di xwaya masoni ka Faro.’ Se Mosi a to maha toneto ni ku moya wu to tala ngu lithulu. Mbimo yi lithulu li nga txiwa, Vaegipta va to tala ngu silonda asi si nga txi panda ngutu. Hambiketo, Faro a lambile kuleka Vaisrayeli ve tsula.

Ngu toneto, Jehovha a to ruma kambe Mosi ti to e ya womba-womba ni Faro a txi khene: ‘Aku u lambako kuleka vathu vangu ve tsula, mangwana kunawa mati a maralala kotshe Egipta.’ Mangwanani ka kona Jehovha a mahile ti to kuwa mati a hombe a maralala, singwalangwanda ni kudhindela. Ti si khali kumaheka to nga tiya khe Egipta. Mati ma haxulete yotshe mindonga. Kambe mitini ka Vaisrayeli kha ma nga wa mati oneyo a maralala. Se Faro a to gela tiya Mosi: ‘No kombela, gela Jehovha e emisa mati yawa, ni na mi leka mi tsula.’ Mosi a wombawombile ni Jehovha e kombela ti to e emisa mati. Mati ma emile, kambe Faro a tshumete e txitxa idheya.

Ngu toneto, Mosi a ti khene: ‘Yotshe mindonga a yi yi nga mbi hoxotwa ngu mati, yi na dyiwa ngu tibhandala.’ Se, kotshe Egipta ku to tala ngu tibhandala ti dyela yotshe mindonga ayi yi nga ti sate. Se Faro, a to khene: ‘No kombela, gela Jehovha e thavisa totshe tibhandala tiya.’ Jehovha a to maha ti to tibhandala ti nyamalala, kambe Faro kha leka Vaisrayeli ve tsula.

Jehovha a rumile Mosi ku e guleta diwoko di txi xungameta nzumani. Mbimo yi Mosi a nga maha toneto, ku to va ni txidema txa hombe. Kudingana masiku mararu, Vaegipta va si tikoti kumaha txilo nem kuwonana. Vaisrayeli ngu vona basi va nga di kuwonekelani mitini kwawe.

Faro a to dhana Mosi e ta m’gela tiya: ‘Ngu tona Mosi, awe ni vathu vako mi nga tsula. Kambe, siyani tihomu ni tinvuta tanu.’ Mosi a to khene: ‘Nadha, asiya hi na tsula naso, hi lava sihari kasiku hi ya ningela ngu sona miningelo ka Jehovha.’ Faro a to henya ngutu e bhongela Mosi ni Aroni a txi khene: ‘Hangalakani masoni kwangu, ngaku ni txo mi tuve, na mi daya.’