12 wa sipiyawu

Vaisrayeli va khukhile ka Mmango wa Sinayi ve simama ni liendo lawe txitingani. Mbimo yi va nga hoka ka wukhalo awu wu nga txi dhanwa ku i Kadhesi, Jehovha a gete Mosi ti to a ti fanete kusawula 12 wa majaha ka 12 wa tihunzu ta Israyeli kasiku veya wona ti to ditiko da Kanana di ti zumbisile kutxani. Mosi a gete tiya majaha yale a 12: ‘Tsulani Kanana, mi ya wona ti to ditiko dile di zumbisekile kasiku hi ya dima ni kuphaya. Wonani ni madhoropa a kona ni ti to vathu va kona va ni mtamo mwendo mipweka. Se sipiyawu sile sa 12 si to tsula Kanana.

Msana ka kuva si di hetile 40 wa masiku Kanana, sipiyawu si to wuya si di ni makuwa ni mauvha. Se si ti ta kontarela Vaisrayeli ati si nga ya ti wona kheya, si txi kha sona: ‘Wukhalo wule wunene, kambe vathu va kona va ni mtamo ngutu ni madhoropa a kona ma ni mimuru yo lapha.’ Kambe Kalebhi mmweyo wa sipiyawu sile a ti khene: ‘Hambiketo, athu hi nga va xula hi teka wukhalo wule. Tsimbilani konkuwa!’ Ngu kutxani Kalebhe a di wombile tiya? Ngu ti to ene a txi mthemba ngutu Jehovha, kufana ni txipiyawu tximwani atxi va nga txi khona i Joxuwa. Kambe sipiyawu sile simwami sa 10 si ti kha sona: ‘Nadha, kha hi nambi va xula! Vakanana va laphile ngutu, phela athu hi di masoni kwawe ha so nga tibhandala!’

Mbimo yi va nga pfa tile, Vaisrayeli va to va ni dizowa da Vakanana ve khata kukhala, va txi kha vona va lava kutshumela ve tsula Egipta. Kambe, Joxuwa ni Kalebhi va zamile ku va tsanisa, va txi kha vona: ‘Athu kha ha fanela kuthava, Jehovha a na hi vhikela ngaku hi txo simama hi m’engisa.’ Kambe, Vaisrayeli kha va lava ku tipfa eto. Vona va txi lava kudaya Joxuwa ni Kalebhi!

Se Jehovha a tipfisile kutxani ngu ti Vaisrayeli va nga txi lava ku ti maha? Jehovha a pandisekile ngutu, e gela tiya Mosi: ‘Ni va mahete tatingi Vaisrayeli, kambe vona kha va ti lavi ku ni engisa. Ngu toneto, vona va na zumba txitingani muwa kudingana 40 wa malembe, se va na fela kona hawa. Ava va no bela Kanana i Joxuwa ni Kalebhi ni vanana va Vaisrayeli.’