Jehovha a tsayisile Vaisrayeli ava va nga mbi m’engisa

Msana kova Vaisrayeli va di zumbile mbimonyana va di txitingani, majaha o kari ma khatile kwa mbi engisa Jehovha. Ona nem ma si ti lavi kuengisa Mosi. Majaha oneyo i ti Kora, Dhatani ni Abhiramu, ku ti ni majaha mamwani a 250 a ya ma nga txi ema navo. Va to wukela Mosi ni Aroni va txi khona: ‘Athu hi karate ngu nganu! Ngu kutxani awe Mosi u txi ti maha mkoma? Ngu kutxani i di Aroni basi a fanelako kuva mprista wa hombe? Mi nga hi dyeleleni athu! Jehovha ani nathu hotshethu.’ Atile kha ta m’tsakisa Jehovha! Ti txo fana ni kuva va txi m’wukela ene apune.

Mosi a to gela tiya Kora ni majaha ale: ‘Ngonani ditendani mangwana, hi ta hisa dibaselo. Jehovha a na ta kombisa awu a nga m’sawula.’

Mangwanani ka kona, Kora ni majaha ale a 250 va tsute veya manana ni Mosi ditendani ve khata kuhisa dibaselo. Kambe i ti vaprista ava va nga ti fanete kumaha tile. Ngu toneto, Jehovha a gete tiya Mosi ni Aroni: ‘Khukhani hafuhi ni Kora ni vangana vakwe.’

Ka mbimo yoneyo, Dhatani ni Abhiramu va ti mitini kwawe, kha va tsula ditendani. Se, Jehovha a gete votshe Vaisrayeli ti to va si zumbi hafuhi ni miti ya Kora, Dhatani ni Abhiramu. Votshe va engisile ati Jehovha a nga ti va gete, ve khukha hafuhi ni miti yile. Se Jehovha a to maha ti to mafu me tuleka kuva ni diphala da hombe, adi ku nga bela Dhatani, Abhiramu kumweko ni timwaya tawe. Ngu mbimo yoneyo ya yimweyo, Jehovha a wisile mndilo ngu nzumani wu ta hisa Kora ni 250 wa majaha yale ma nga ti ditendani.

Msana keto, Jehovha a gete tiya Mosi: ‘Teka 12 wa tindonga u bhala matina a 12 wa vathangeli va tihunzu ta Israyeli ka ndonga yimwani ni yimwani. Kambe, ka ndonga ya lihunzu la Levhi bhala ditina da Aroni. U gwita u ya veka tindonga toneto ditendani, ani ni na milisa mafilori ka ndonga ya dijaha adi ni no di sawula kasi ku di va mprista wa hombe.’

Mangwanani ka kona, Mosi a tsute ditendani eya teka tindonga tile. Wa ti ziva ati ti nga maheka? Ku ti mite mafilori ka ndonga ayi yi nga ti bhatwe ditina da Aroni. Mosi a kombisile tindonga tile ka vathangeli va totshe tihunzu ta Israyeli. Se, votshe va khotwe ti to Aroni a ti sawutwe ngu Jehovha kasiku eva mprista wa hombe.