Gidhiyoni ni 300 wa majaha

Ku di pindile mbimonyana, Vaisrayeli va tshumete ve khozela sizimu sa makuhu. Ngu toneto, kudingana 7 wa malembe, Jehovha a lekile Vamidhiyani ve pa sihari sa Vaisrayeli ni kudulela asi va nga ti phayile tithembweni kwawe. Vaisrayeli va txi barama mimangoni ni mu ka tiphako ta marigwi kasiku va si manwi ngu Vamidhiyani. Vona va kombete txivhuno ka Jehovha. Se Jehovha a rumile ngilozi yi ya womba-womba ni dijovhem adi di nga txi dhanwa ku i Gidhiyoni. Ngilozi yile yi ti ya womba ti to Jehovha a di sawute ene Gidhiyoni kasiku e hulukisa Vaisrayeli. Gidhiyoni ayi wotisile tiya: ‘Ani? Ni na ti mahisa kutxani toneto? Phela ani kha ni vhuni txilo.’

Gidhiyoni a mahile to maha kasiku e kholwa ti to a di sawutwe ngu Jehovha. Ene a tekile didhowo e di veka hahatshi e gwita e maha mkombelo, a txi khene: ‘Jehovha ngaku di txo txa mangwana didhowo diya di di nakanile manji mafu ma di omile, ngu kona ni no kholwa ti to awe u ni sawute kasiku ni hulukisa Israyeli.’ Mangwanani ka kona, didhowo di ti ta maneka di ti nakanile, kambe mafu ma ti omile! Kambe, Gidhiyoni a txi ngadi a txi lava kukholwa bhem. Ngu toneto, a tshumete e kombela Jehovha to di txa mafu ma di nakanile, se didhowo di di omile. Ngu toneto ti nga maheka. Se Gidhiyoni a khotwe ti to a ti sawutwe ngu Jehovha. Koneho, ene a sengeletile masotxhwa kasiku e ya lwa ni Vamidhiyani.

Jehovha a gete tiya Gidhiyoni: ‘Ni na vhuna Vaisrayeli ti to ve xula yimbi. Kambe kha ni lavi to ve pimisa ti to va xute ngu mtamo wawe i singa ngu kuvhunwa ngu ngani. Ngu toneto, gela votshe ava va thavako ti to ve tsula mtini.’ Se 22.000 wa masotxhwa ma tshumete me tsula mtini ku ti ko sala 10.000 wa ona dwe. Kambe Jehovha a tshumete e gela tiya Gidhiyoni: ‘I ngadi vangi vathu evo. Tsula navo mnamboni u ya va gela ti to ve sela mati, awu a no sela mati a txi wonetela madhawani kasi ku ti wonela ka valala, ngeneyo u no tsula nayo yimbini.’ Se a di mahile eto, ku to maneka 300 wa majaha dwe aya ma nga txi sela mati ma txi wonetela madhawani. Se Jehovha a thembisile ti to a ndi na thumisa mtxawa wule wa wudotho kasi kuxula 135.000 wa masotxhwa a Vamidhiyani.

Ka wona wusiku wule, Jehovha a gete Gidhiyoni ti to se yi ti hokile mbimo yo ve xasela Vamidhiyani!’ Gidhiyoni a to ninga masotxhwa akwe mipundu ni sikhadiyana asi si nga ti ni tisoso ta mndilo mndani ka sona. E gwita eva gela tiya: ‘Wonetelani bhem ati ni no maha, mi gwita mi maha toneto nanu.’ Gidhiyoni a to veta mpundu e faya txikhadiyana e gwita e guleta lisoso la mndilo e kwangula a txi khene: ‘Ditxhari da Jehovha ni da Gidhiyoni!’ Otshe majaha ale a 300 ma to maha toneto. Se Vamidhiyani va to thava ve tutuma ve hangalaka. Ngu mhaka ya vhilinganya yile yi nga maheka, va to khata kudhayana ngu txawe. Adiya, dikhambi dimwani adi Jehovha a nga vhuna Vaisrayeli ti to ve xula valala vawe.