Josiya a txi ti dhunda kugonda Mlayo wa Jehovha

Josiya a vile mkoma wa Judha mbimo yi a nga ti ni 8 wa malembe. Ka mbimo yile, vathu va txi maha timhaka ati Jehovha a nga txi ti nyenya. Vamwani va txi loya ni kukhozela sizimu sa makuhu. Mbimo yi Josiya a nga ti ni 16 wa malembe, ene a txi lava kuziva nzila yayinene ayi a nga ti fanete kukhozela ngu yona Jehovha. Se adi ni 20 wa malembe, a fayetete sifananiso ni ti altari ta sizimu sa makuhu asi si nga diho khe Judha.

Mbimo yi a nga ti ni 26 wa malembe, Josiya a rumisile ti to kuwusetwa dithempele. Ka mbimo yile ku nga txi wusetwa dithempele, mprista wa hombe Hilikiya a tiya mana dibhuku adi di nga ti ni Milayo ya Jehovha, ti nga maha i ti dona adi di nga bhalwa ngu Mosi. Safani, mabhalani wa mkoma, a tekile dibhuku dile e tsula nado ka Josiya eya di lera ngu dipswi do guleka. Mbimo yi a nga pfa ati ti nga txi lerwa, Josiya a henyile ngutu nguku vathu va si mahi ati milayo ya Jehovha yi nga txi womba ti to va di fanete kumaha. Se mkoma Josiya a gete tiya Hilikiya: ‘Jehovha a hi henyete ngutu. Tsula u ya womba-womba nayo. Ene a na womba ati hi fanelako ku timaha.’ Jehovha a xamute ngu kuthumisa mprofeti wa txisikati awu a nga txi dhanwa ku i Hulidha, atxi khene: ‘Aku vathu va Judha va nga ni leka, vona va na tsayiswa. Kambe eto ti na maheka msana ka kuva Josiya adi fite, nguku ene a gondile Milayo yangu ni ku atxi lava kumaha ati i ku tatinene.’

Mbimo yi va nga ta m’gela ati Jehovha a nga womba, mkoma Josiya a tsute dithempeleni eya sengeleta votshe vathu va Judha. Se a lerile Milayo ya Jehovha ngu dipswi do guleka kasiku votshe vathu ve kota kuengisa. Josiya ni votshe vathu vale va thembisile ti to va ndi na engisa Jehovha ngu timbilu tawe totshe.

Josiya a pfisisile ti to Mlayo wa Jehovha wu txi ruma ti to va di fanete kumaha Paxkwa dilembe ni dilembe. Kambe, se ku txi pinda malembe amangi vathu va Judha va si khali kumaha Paxkwa. Se Josiya a khatile kululamisela Paxkwa para Jehovha. Ene a ningete sihari sasingi kasiku veya maha ngu sona miningelo e gwita e veka vathu dithempeleni kasiku ve embelela tindando. Msana kova va di mahile Paxkwa, va gwitile ve maha fexta yimwani ayi yi nga heta 7 wa masiku, yi nga txi dhanwa ku M’buso wa Mapawu o mbina ferimentu. Dikhambi do gwita adi vathu va nga di mahile Paxkwa, i ve mbimo yi a nga txi nga di atxi hanya Samuwele. Josiya a txi ti dhunda ngutu kugonda mayelano ni Jehovha ni Milayo yakwe. Awe ko? Ina wa ti dhunda kugonda mayelano ni Jehovha?