Josiya a ti ni vangana va vanene

U pimisa ti to ta karata kumaha ti i ku ta tinene?— Vathu vo tala va womba ti to ta karata. Eto ti mahekile ka mfana wu a dhanwako ku i Josiya. Bhiblia yi hi gela ti to ti txi mu karatela kumaha ti i ku ta tinene. Kambe ene a ti ni vangana va vanene ava va nga m’vhuna. Konkuwa he gonde to tala ngu Josiya ni vangana vakwe.

Tate wa Josiya i ti Amoni, wu i nga ti mkoma wa Judha. Ene i ti m’thu wo biha ni ku a ti khozela sithombe so vatwa. Mbimo yi tate wa Josiya a nga fa, Josiya a khatile kufuma Judha a di ni 8 wa malembe basi! U pimisa ti to ene a ti maha to biha kufana ni tate wakwe?— Ahim-him!

Hambiku i ngati ngadi mfana, Josiya a ti lava kuengisa Jehovha. Ngu toneto ene a sawute ku va mngana wa vathu va va dhundako Jehovha basi. Ni ku vona va mu vhuni ti to e maha ti i ku ta tinene. Mba mani va i nga ti vangana va Josiya?

Mmweyo wa vangana va Josiya i ti Zefaniya. Zefaniya i ti mprofeti ni ku a gete vathu va Judha ti to va ndina humelelwa ngu timhaka to biha ngako vona va txi khozela sithombe so vatwa. Josiya a engisile Zefaniya ni ku a khozete Jehovha i singa sithombe.

Mmwani mngana wa Josiya i ti Jeremiya. Ene a ti ni malembe o fana ni a Josiya, ni ku vona va ti zumba hafuhi ni hafuhi mbimo yi i ngadi vadotho. Vona i ti vangana va hombe. Se mbimo yi Josiya a nga fa, Jeremiya a bhate ndando yo sawuleka yo kombisa to a ti mu xuva ngutu Josiya. Jeremiya ni Josiya va ti vhunana ti to ve maha ti i ku ta tinene ni kuengisa Jehovha.

U gonda txani ka txikombiso txa Josiya?—Hambi mbimo yi Josiya i ngadi mfana, ene a lavile kumaha ti i ku ta tinene. Ene a ti ti ziva ti to a fanete ku va mngana wa vathu va va dhundako Jehovha. Nawe u fanete u sawula vangana va va dhundako Jehovha ni va va no kuvhuna kumaha ti i ku ta tinene!