Jesu e txhumayela mahungu a Mfumo wa Txizimu

Msana nyana ka kuva Jesu a di bhabhatisilwe, a khatile kutxhumayela vathu a txi va gela ti to Mfumo wa Txizimu wa ta. Jesu a txhumayete Galileya ni Judheya a di ni vagondiswa vakwe. Se, Jesu a to tsula Nazareta ka didhoropa di a nga kulela ka dona. Akheya ene a di ya bela disinagogani e lera ngu dipswi do guleka ati mprofeti Isaya a nga di bhate a txi khene: ‘Jehovha a ni ningile moya wo sawuleka kasiku ni txhumayela mahungu a manene.’ Wa tiziva ti to ngu kutxani Jesu a di wombile eto? Ngu ti to vathu va txi lava ti to Jesu e mahetela sidiwukiso dwe. Kambe Jehovha adi mningile moya wo sawuleka kasiku e txhumayela mahungu a manene a Mfumo wa Txizimu. Se Jesu a to khene: ‘Nyamsi wu hetisekile wuprofeti wuwa wa Isaya.’

Msana keto, Jesu a tsute ka linene la Galileya. Akheya a ti ya mana 4 wa vagondiswa vakwe. Matina awe i ti Pedro, Andreya, Jakobe ni Johani, niku votshe va 4 i ti vadayi va sihaka. Se Jesu a to va gela tiya: ‘Tsimbilani, ani ni na mi gondisa kuva vadoti va vathu.’ Ka yona mbimo yileya, vona va to leka kudota ve londisa Jesu. Vona va to tsimbila kotshe Galileya va txi txhumayela mahungu a manene a Mfumo wa Jehovha. Vona va txi txhumayela masinagogani, mabhazara ni tiruwani. Amu Jesu a nga txi ya kona, vathu va txo mlondisela. Phela hambi Siriya ku nga txi maneka kule ni mu Jesu a nga txi zumba kona, va yi pfite nduma ya Jesu.

Ku di pindile mbimo, Jesu a ningile vagondiswa vo kari mtamo wo hanyisa malwati ni ku hinga madhimoni. Jesu a txi txhumayela madhoropani ni maaldheia niku vagondiswa va txi tsula nayo. Vavasikati vo thembeka vo fana ni Mariya Magdhala, Joana ni Suzana, va txi maha totshe ati va nga txi tikota kasi ku ve vhuna Jesu ni vagondiswa vakwe.

Msana ka kuva Jesu a di trenarile vagondiswa vakwe, va to tsula ve ya txhumayela kotshe Galileya. Vavangi va engisile mahungu a manene a Mfumo, ve tshumela veva vagondiswa ni ku bhabhatiswa. Kambe ku ti ngadi ni vathu vavangi ava va nga txi lava kupfa mahungu a Mfumo. I ti vangi ngutu aha koza Jesu e va fananisa ni thembwe ayi yi nga txi lava kuelulwa. Ngu toneto, Jesu a ti khene: ‘Kombelani Jehovha ti to e tisa vathu vavangi kasiku ve ta thuma ko elula.’ Ku di pindile mbimo Jesu a sawute 70 wa vagondiswa. A va rumile vambidi ngu vambidi kasiku veya txhumayela mahungu a manene a Mfumo wa Txizimu kotshe Judheya. Vagondiswa vale, va txi gondisa votshe vathu. Vona va wile va di tsakile kasiku ve ta kontarela Jesu mthumo wu va nga di wu mahile. Hambi Sathani a si na kusikota ku emisa kutxhumayela.

Jesu a ndi na tshumela nzumani, kambe a txi lava ti to vagondiswa vakwe ve simama ve txhumayela. Ngu toneto, ene a va rumile tiya: ‘Txhumayelani mahungu a manene a Mfumo wa Txizimu kotshe hamafuni. Gondisani vathu mayelano ni dipswi da Txizimu, mi va bhabhatisa.’