Muwoneleli wa jele e va Mkristu

Ka didhoropa da Filipiya ku ti ni txithumi txo kari txa dihorana atxi txi nga ti ni didhimoni. Didhimoni donedo di txi maha ti to dihorana dile di huta ati ti ndi no maheka mbimo ayi yi tako. Se vanyamne va dona va txi mana mali yayingi ngu mhaka ya toneto. Mbimo yi Paulo ni Silasi va nga tsula Filipiya, dihorana dile di to va londisela kudingana masiku amangi, di txi kwangula di txi kha dona: ‘Vavamna vava va thumela Txizimu txo guleka ngutu.’ Se Paulo a to gela didhimoni dile a txi khene: ‘Ngu ditina da Jesu, khukha kwakwe.’ Ka yona mbimo yile, didhimoni di to huma ka dihorana dile.

Mbimo yi vanyamne va dihorana dile va nga wona ti to va si na ku ngadi ve mana mali, va to henya ngutu. Va to ruruvisa Paulo ni Silasi ve tsula navo ka vakoma, ve ya womba tiya: ‘Majaha yawa kha ma engisi mlayo, ona ma maha vhilinganya kotshe didhoropani muwa.’ Se vakoma va to rumisa ti to Paulo ni Silasi ve peketelwa ve gwita ve betwa jele. Muwoneleli wa jele a to beta Paulo ni Silasi ka txikwartwana a txi txi nga txi maneka mndani mule ka jele e gwita e va sunga minenge a ha ka dipulango.

Paulo ni Silasi va to khata kuembelela tindando to dhumisa Jehovha. Ni ku sotshe sibotxhwa simwani si txi va engisa. Ni hagari ka wusiku, ku to va ni kuzinginikela ka mafu ngu txidhukisa. Se yotshe jele yi to zinginika, kutulekela otshe matimba, se totshe titxhini ati va nga di sungile ngu tona sibotxhwa ti to txhatxhekela. Muwoneleli wa Jele a to tutuma e tsula ka sikwartwana e ya wona ti to matimba otshe ma ti tulekete. Ene a to teka ditxhari a txi lava ku ti daya, nguku a txi pimisa ti to sotshe sibotxhwa si ti humile si tutuma.

Ka yona mbimo yile, Paulo a to kwangula a txi khene: ‘U nga ti daye, hiho hawa.’ Muwoneleli wule wa jele a to tutuma e tsula ka Paulo ni Silasi e ya khizama masoni kwawe e va wotisa tiya: ‘Ni fanete kumaha txani kasiku ni hulukiswa?’ Vona va to m’xamula va txi kha vona: ‘Awe ni mwaya wako mi fanete kukholwa ka Jesu.’ Paulo ni Silasi va to txhumayela muwoneleli wule wa jele, se ene ni mwaya wakwe va to va Makristu.