Dipasi da Mmidi wu wu Fumako

Vanathu vo dhundeka:

Hotshethu hi khozelako Jehovha, ha yi dhunda Bhiblia. Ha tsaniseka ti to matimu aya hi ma manako ka Dipswi da Txizimu nga ditshuri, sialakanyiso sa kona sa thembeka ni ku si kombisa lirando la hombe ali Jehovha a ku nalo ngu ngathu. (Masalmo 119:105; Luka 1:3; 1 Johani 4:19) Athu ha ti lava ngutu kuvhuna votshe vathu ku ve ziva ditshuri da lisima ngutu adi di ku mu ka Bhiblia. Ngu toneto, hi tsakile ngutu ngu kululamisela dibhuku adi di ku “Gonda ka Matimu a mu ka Bhiblia.” Konku hi na mi pfisa nyana txibaka txa ti di nga zumbisa tona.

Dibhuku diya di bhatwe ku txi pimiswa ngutu-ngutu ngu vanana. Kambe di nga tshumela di vhuna vathu va hombe ava va lavako kugonda to engeteleka mayelano ni Bhiblia. Aku Bhiblia i ku dibhuku adi di thumiswako ngu votshe vathu, ha tsaniseka ti to hi na wuyelwa ngu kutshumela hi gonda matimu yawa, a ya ma no hi vhuna ku hi mana litsako.

Dibhuku diya di thumisa madungula a mu ka Bhiblia kasi kukontarela matimu a kukhukhela mbimo yi ku nga vangwa vathu. Dona di kombisa matimu a Bhiblia ngu nzila yo hehuka, ni ku hi zamile ku ma xaxametela ngu kuya ngu mbimo yi ma nga maheka ngu yona.

Dibhuku diya kha di njo kontarela sitoriya basi. Tindimana ni mifota ayi yi ku ka dona, si lulamisetwe kasi kuvhuna m’leri e ti wona a di ka mbimo yi matimu oneyo ma nga maheka ngu yona, ni kupfa ati ava va wombwako amu ka Bhiblia va nga ti tipfisa tona.

Dibhuku diya di hi komba ti to Bhiblia dibhuku adi di wombawombako mayelano ni vathu, vathu ava va nga engisa Jehovha ni va va nga mbi m’engisa. Dona di na hi vhuna kuwona ati hi nga ti gondako ka vathu vonevo. (Varoma 15:4; 1 Vakorinto 10:6) Dona di ni 14 wa sienge. Makhatoni ka txienge tximwani ni tximwani hi na wona ati hi no ti gonda.

Ngaku u di mveleki, gonda matimu yawa ni mwanana wako u gwita u bhula nayo mayelano ni mifota. Ngu msana, mi nga lera tindimana ta Bhiblia ati ti manekako magwito ka matimu oneyo mi gondako ngu ona. Vhuna mwanana wako ku e pfisisa kuyelana aku ku kuho ka tindimana toneto ni matimu a dibhuku. Awe u nga maha ati ti fanako ngaku u txi vhuna m’thu wa hombe ku e pfisisa didungula da mu ka Bhiblia.

Hi emela to dibhuku diya di vhuna vanana ni vathu va hombe ti to ve gonda mayelano ni Dipswi da Txizimu. Ngaku va txi thumisa ati va ti gondako, vona va na khozela Jehovha ni kulumba mwaya wakwe awu a wu dhundako.