GONDO 56
Lwela to kuva ni wumwewo dibanzani
Mbimo yi hi ku ni vanathu hi tipfa kufana ni Mkoma Dhavhidha awu a nga khene: “Eto ti tshambisako tona ni kutsakisa, ngako maxaka ma txi hanya kumweko ngu kupfana”. (Masalmo 133:1) Hambi keto wumwewo wonewo kha wu njo ti tela. Mmwani ni mmwani wathu ti lava e maha txienge txakwe.
1. Ngu tihi ati ti xamalisako ka vathu va Jehovha?
Hambi u txo thuka u xalela mitshangano aha lidimi la kona u si li ziviko, u nga tipfa u di mtini. Ngu kutxani? Nguko hotshethu hi gonda Bhiblia ni kuthumisa mabhuku o fana hamafuni kotshe. Hi tshumela hi tikaratela kukombisa lirando ka mmweyo ni mmweyo wathu. Ku si nga ni mhaka ni mu hi zumbako kona, hotshethu hi dhana ‘ditina da [Jehovha] hi mthumela ngu moya wumwewo.’—Zefaniya 3:9.
2. U nga maha txani kasi ku u sakulela wumwewo?
“Randanani ngu kukhutala ka lirando la kuta ngu mndani ka mbilu.” (1 Pedro 1:22) U nga txi thumisa ngu nzila yihi txialakanyiso txiya? U nga zumbeli kuwona tiphazamo ta vamwani kambe wona tifanelo tawe ta tinene. Hahanze ko maha wungana ni va va dhundako ati awe u ti dhundako basi, zama kuziva vanathu vo hambana-hambana. Hi nga maha totshe ati hi nga ti kotako kasi kudula mkoloti wa txisawu-sawu atxi hi nga vako natxo.—Lera 1 Pedro 2:17.a
3. U nga maha txani ngako u di phazamisani ni mwanathu?
Hambiku hi ku ni wumwewo, kha ha hetiseka. Ngu toneto mbimo yimwani hi nga thuka hi henyisana. Bhiblia yi hi kuzeta ku hi ‘divalelana mmwani ni mmwani, ngako m’thu adi ni txisolo ka mmwani.’ Yi tshumela yi txi: “Kota nga ti [Jehovha] a nga mi divalela, nananu mahisani toneto.” (Lera Vakolosa 3:13.) Phela hi nge sikoti kukonta makhambi aya hi nga henyisa Jehovha, hambi keto wa hi divalela. Ngu toneto ene a lava ti to hi divalela vanathu. Se u txi tumbula ti to u henyisile mwanathu kuluveta u ya maha kudikha nayo.—Lera Matewu 5:23, 24.b
ENGETELA WUZIVI WAKO
Wona ati u nga ti mahako kasi kusakulela kudikha ni wumwewo dibanzani.
U nga maha txani ti to u sakulela kudikha?
4. Xula txisawu-sawu
Ha va dhunda vanathu. Kambe mbimo yimwani ti nga karata kudhunda m’thu wu i si ngako wa lixaka lathu. Nji txani atxi txi nga hi vhunako? Lera Mithumo 10:34, 35, mi gwita mi bhula ngu siwotiso siya:
Jehovha kha na txisawu-sawu ene a dhunda vathu votshe. Se u nga mu etetelisa kutxani Jehovha ka nzila yi u va wonisako tona vathu va lixaka limwani?
Ngu txihi txisawu-sawu atxi txi kuho amu u zumbako kona? U nga txi vayilelisa kutxani?
Lera 2 Vakorinto 6:11-13, mi gwita mi bhula ngu txiwotiso txiya:
U nga mahisa kutxani wungana ni vanathu va tixaka timwani?
5. Divalela ti txi khukhela mbiluni ni kumaha kudikha
Jehovha wa hi divalela hambiku ene a si mahiko sionho ti to hi mdivalela. Lera Masalmo 86:5, mi gwita mi bhula ngu siwotiso siya:
Jehovha a hi divalela kuhokela hayi?
U wuyeliswa kutxani ngu kudivalelwa ngu Jehovha?
Ngu ka siemo sihi aha ti nga karatako kudivalela vamwani?
Hi nga mu etetelisa kutxani Jehovha ni kusimama hi va ni wumwewo ni vanathu? Lera Mavingu 19:11, mi gwita mi bhula ngu txiwotiso txia:
Ngako mwanathu a txi maha to mbi kutsakisa mwendo a txi kuhenyisa u nga maha txani kasi kuwuseta wuxaka wanu?
Mbimo yimwani athu ha henyisa vamwani. Ngako eto ti txi maheka hi fanete kumaha txani? Xalela VHIDHIYO, mi gwita mi bhula ngu txiwotiso atxi txi londiselako.
Ngu kuya ngu ti hi nga tiwona ka vhidhiyo, mwanathu a ku mahisile kutxani kudikha?
6. Wonisisa tifanelo tatinene ta vanathu
Ngako hi txi heta mbimo ni vanathu hi naya hi ti ziva kwati tifanelo tawe ni mu va tandekako kona. Hi nga vekisa kutxani mapimo ka tifanelo tatinene ta vanathu? Xalela VHIDHIYO, mi gwita mi bhula ngu txiwotiso txi txi londiselako.
Nji txani atxi txi nga kuvhunako kuwona tifanelo tatinene ka vanathu?
Jehovha a wona tifanelo tathu tatinene. Lera 2 Makronika 16:9a, mi gwita mi bhula ngu txiwotiso txiya:
U tipfisa kutxani kuziva to Jehovha wa wona tifanelo tako ta tinene?
Hambi ringi yo tshura ya dhiyamanti yi di ni madhefeito ya simama i di ya lisima. Ti ngu ha kufanako ni vanathu, kha va hetiseka kambe mba lisima ka Jehovha
NGAKO VATHU VA TXI KHONA: “Ani ni nga m’divalela m’thu, kambe ti lava e khata ene e ta kombela divalelo.”
Ngu kutxani hi di fanete kukuluveta hi divalela vamwani?
ATI HI NGA TI WONA
U nga sakulela wumwewo dibanzani ngu kudivalela vamwani ni kukombisa lirando ka votshe vanathu.
Ngu tihi ti u nga ti gonda
U nga txi xulisa kutxani txisawu-sawu?
U nga maha txani ngako u di henyisani ni mwanathu?
U nga txi etetelisa kutxani txikombiso txa Jehovha txo divalela vamwani?
XOTA TIMWANI
Wona nzila yi tximwetxo txa sidinganiso sa Jesu txi nga hi vhunako ngu yona kuvayilela kulamula vamwani.
Ina hi fanete kukombela divalelo hambi i di ti to hi nga athu hi nga onha?
“Kukombela divalelo i nzila ya yinene yo maha kudikha” (Muwoneleli wa 1 ka Novembro wa 2002)
Wona nzila yi vavamna vambidi ava va nga ti hanya ka ditiko adi ku nga ti ni txisawu-sawu txa tixaka va nga mana ngu yona wumwewo wa ditshuri.
Wona nzila yi u nga lulamisako ngu yona txikarato txako ni mwanathu na ti si se hangalaka dibanzani.
“Lulamisa txikarato txako ngu lirando” (Muwoneleli wa Maio wa 2016)
a Txhamuselo yo gwitisa 6 yi kombisa to lirando li maha Makristu me vayilela ati ti nga ningetako vamwani malwati aya ma tshapelanako.
b Txhamuselo yo gwitisa 7 yi kombisa nzila yi vanathu va nga lulamisako ngu yona timhaka ta mabhindu ni ta mlayo.