Thumisa tivhidhiyo ti to u gondisa sigondo sako

Vathu vo tala va tsakiswa ngu sithombe ni tivhidhiyo ve tshumela ve vhuneka ti to ve pfisisa ni kukhumbula ati va nga ti gonda. Jehovha M’gondisi wa Hombe Ngutu, a si thumisile sithombe ni tivhidhiyo ti to e gondisa gondo ya lisima. (Gen 15:5; Jer 18:1-6) Sona si tshumete si thumiswa ngu Jesu M’gondisi wa Hombe. (Mat 18:2-6; 22:19-21) Konkuwa ti hakubasani ti to tivhidhiyo nzithumiswa sa lisima so vhuneta kugondisa. Ina wa ti thumisa kwati tivhidhiyo mbimo yi u tsimbitisako txigondo txa Bhiblia?

Kululamisetwe 10 wa tivhidhiyo ti to ti hi vhuna kugondisa ngu kuthumisa dibruxura di di ku: Ngu yahi mahungu a manene ya ma tako ngu ka Txizimu! Ngu txitalo, msungo mhaka wa vhidhiyo yimwani ni yimwani wu yelana ni tximwetxo txa siwotiso so nzihatiswa asi si ku ka dibruxura. Ka site ya jw.org, dibruxura diya di ni ma link aya ma hi khumbhutisako ndimana yi hi no kombisa vhidhiyo ka yona. I singeto dwe, ku ni tivhidhiyo timwani ati hi nga ti thumisako kumweko ni mabhuku mamwani o gondisa ka Ferameti yo Gondisa.

Ku ni gondo ya Bhiblia ayi yi nemelelako txigondo txako ku yi pfisisa? Mwendo txigondo txako txi wonisana ni txikarato txo kari? Lavetela vhidhiyo ayi yi nga vhunako txigondo txako ka site ya jw.org® ni ka JW Broadcasting®. Awe ni txigondo txako mi nga xalela motshe vhidhiyo yoneyo mi tshumela mi bhula ngu yona.

Mtxima ni mtxima, ku humiswa tivhidhiyo ta tiphya. Mbimo yi u ti xalelako, alakanyisisa ngu ti u nga ti thumisisako tona u txi gondisa vamwani.