Hi nga vhunetisa kutxani msana ko humelela phango

Tiphango ta mtumbuluko ti tolovelekile nyamsi wa ditshiku. Ku txi humelela phango ka mahwa mizamo yo lulamisela ni kuningela txivhuno ngu nzila ya yinene. Ti to toneto ti koteka, Mmidi wu wu Fumako wu vekile Departamento yo lamulela tiphango ka Mabhetele otshe.

Ngako vanathu va Dhepartamento yoneyo va txi ziva to ku humelete phango, va womba-womba ni madhota a wukhalo wonewo ti to ve wona to ngu txihi txivhuno atxi vahuweleli ava va nga manwa ngu phango va no txi lava. Ngako ku di onhekete ngutu, Bhetele yi na sawula vanathu ava va fanelekako kasi kuthangela ka mthumo wo vhuneta. Vanathu vonevo va nga kombela vathumi vo tiningela, silo so kari, mwendo kuxava ve tshumela ve avela asi si lavekako ka wukhalo wonewo.

Kumahisa tiya ta vhuna ngutu. Timaha ti to vanathu va si ti karati ngutu, ku si vi ni vhilinganya, ku si gastarelwi male ni simwani kupinda loko vanathu va txi thumisa tinzila tawe kasi kuvhuneta.

Vanathu ava va nga vekwa ngu Bhetele va nga sunga to kulaveka male muni ni ku vathu vangahi va lavekako kasi kuya vhuneta. Vona va nga ziva mathumelo a wukoma wa wukhalo wonewo, se eto ti nga maha ti to txivhuno txi ningelwa ngu txikuluveta. Ngu toneto, ha kukombela, u nga thuki u sengisela timale, so maha mwendo u tutumela kutsula u ya vhuneta amu ku nga humelela phango na u sa kombelwa kumaha toneto.

Hambiketo, ku txi humelela phango ha ti lava kuvhuneta. (Vaheb 13:16) Ha vadhunda vanathu! Se hi nga maha txani? Txa lisima ngutu ngu pata ava va nga manwa ngu tiphango ka mikombelo yathu kumweko ni va va ku ka mthumo wo vhuneta. Hi nga maha miningelo ka dibhokiso da mthumo wa ha mafuni kotshe. Mmidi wu wu Fumako wu na kongomisa Mabhetele to ngu hayi aha male yoneyo yi no ya vhuneta kona. Se ngako hi txi tsakela kutsula hi ya vhuneta hi nga khata ngu kutatisela Petição para Voluntário do Departamento Local de Projeto/Construção (DC-50) kasi vanathu ve ti ziva to hi lungekile ku ya vhuneta.

XALELA VHIDHIYO AYI YI KU NDAMBI YA HOMBE BRASIL, U GWITA U XAMULA TXIWOTISO TXIYA:

Ngu tihi ti nga kutsakisa ngu txivhuno atxi vanathu va nga txi ningela msana kova ndambi yi di onhetete khe Brasil ngu 2020?