Mafu yawa ma na pinda ditshiku? Ngu tihi ti Jesu a nga ti womba?

WONA TIMHAKA TIMBIDI TI JESU A NGA TI WOMBA MAYELANO NI MAGWITO:

“Ngu toneto, wonelelani, nguko ditshiku kha mi di zivi, hambi ni txikhati.”—MATEWU 25:13.

“Ti woneleni, rinzelani, khongelani, nguko kha mi tizivi taku i nava mbimo muni.”—MARKU 13:33.

Se kha ngaho m’thu hamafuni hawa a ti zivako ti to magwito ma na hoka ditshiku. Kambe Txizimu se txi vekile “ditshiku da kona ni txikhati txa kona.” (Matewu 24:36) Ina eto ti womba ti to kha hi na ku ti ziva ku ditshiku da tshuketela mwendo ahim-him? Nadha, Jesu a gete vagondiswa vakwe ti to ve wonisisa simahakalo asi si no kombisa ti to magwito ma tshuketela.

JESU A WOMBA-WOMBILE NGU SIMAHAKALO ASI SI NO KOMBISA TI TO “KUGUMA KA DITIKO” KU HAFUHI

Jesu ati khene: “Ditiko di na wukela dimwani ditiko, mfumo wu na wukela wumwani mfumo, ku na va ni tipaya ni mitungu ni kuzinginikela ka mafu, ka makhalo a mangi.” (Matewu 24:3, 7) Jesu a wombile ti to ku ndi nava ni “mitungo”. (Luka 21:11) Ina awe wa tiwona eto ti txi maheka?

Vathu vo tala nyamsi va xaniseka ngu konaha ka tiyimbi, tinzala, ku zinginikela ka mafu ni malwati aya ma humelelako ditshiku ni ditshiku. Ngu 2004 ku vile ni kuzinginikela ka mafu khe ka linene la Índico ati ti nga maha to kuva ni tshunami ayi yi nga daya kona mu ka 225.000 wa vathu. Ngu malembe mararu kona mu ka 6.9 wa timiliyoni ta wathu va fite hamafuni kotshe ngu konaha ka COVID-19. Jesu a wombile ti to simahakalo siya si kombisa ti to magwito ma hafuhi.

“MASIKU A KUGWITISA”

Bhiblia yi wombile ti to ma si se kuhoka magwito ku nava ni mbimo ayi yi no va “masiku a kugwitisa.” (2 Pedro 3:3, 4) Ngu kuya ngu Dibhuku da 2 Timoti 3:1-5 masiku a kugwitisa ma na tikomba ngu vathu vo mbi dhunda Txizimu. (Wona dibhokiso di di ku: “Ati Bhiblia yi ti wombako ku ti na maheka ku si se hoka magwito.”) Ina wa tiwona to ku tate vathu va likungo, vo dhunda male, va tikano ni vo mbi na lirando ka masiku a nyamsi? Atiya ti kombisa to ngu ditshuri hi hanya ka masiku ya kugwitisa.

Masiku a magwito ma na teka mbimo muni? Ngu kuya ngu Bhiblia “mbimo . . . nja yidotho.” Se Txizimu txi na lovisa ava va ‘onhako mafu.’—Mtuletelo 11:15-18; 12:12.

I SINGA KALE MAFU MA NA VA PARAYISO!

Txizimu se txi vekile ditshiku ni mbimo ayi a no fuvisa ngu yona wubihi hamafuni. (Matewu 24:36) Kambe ku ni timwani to tsakisa, Txizimu ‘kha txi lavi ti to ni wammweyo a txi lova.’ (2 Pedro 3:9) Se ene a ninga mbimo vathu ti to ve hanya ngu milayo yakwe nguko a lava ti to hi ta huluka mbimo yi a no fuvisa mafu yawa e tisa Parayiso.

Hamafuni kotshe Txizimu txi vhuna vathu ti to ve ziva ti va nga ti mahako kasi ku ve mana ku bela ka mafu a maphya aya ma no ya fumwa ngu mfumo wakwe. Jesu a wombile ti to Mahungu a manene a Mfumo ma na “huwelelwa ka dotshe ditiko” mwendo hamafuni kotshe. (Matewu 24:14) Hamafuni kotshe Tifakazi ta Jehovha ti hetile tibhiliyoni ta maora ti txi txhumayela ni kugondisa vathu ngu ti Bhiblia yi ti thembisako. Jesu a wombile ti to mthumo wuwa wa kutxhumayela wu ndi na mahwa hamafuni kotshe kala kuza kuhoka magwito.

I singa kale mifumo ya vathu yi na fuviswa. Kambe ku ni to tsakisa, i ku ti to awe u nga sikota kuhuluka mbimo yi ko no loviswa mafu yawa u ta maneka ka mafu a maphya a Parayiso a ya Txizimu txi nga thembisa. Gondo ayi yi londiselako yi na kombisa ti to u nga maha txani ti to u ta hanya ka mafu oneyo a maphya.