GONDO 7
NDANDO 15 Dhumisani Matiwula a Jehovha!
Divalelo ya Jehovha yi kuwuyelisa ngu nzila muni?
“Awe wa ziva kudivalela [ngu ditshuri, NM].”—MAS. 130:4.
TXIKONGOMELO TXA GONDO
Hi na wona sikombiso sa mu ka Bhiblia sa mapswi aya ma junyatisako nzila yi Jehovha a hi divalelako ngu yona.
1. Ngu kutxani ti txi karata kuziva ati m’thu a ti wombako ngako a txi khene a hi divalete?
“NA KUDIVALELA.” Ta tsakisa kupfa mapswi awa ngutu-ngutu hi di wombile mwendo kumaha to kari ati ti nga khuvekisa m’thu mmwani! Kambe mapswi ya ma ku “na kudivalela” ma lava kuwomba txani? Ina m’thu a lava kuwomba ti to wungana wanu wa simama i di wona wule wa kale? Mwendo ti nga maha a txi lava kuwomba ti to kha nga ngadi a txi lava kuwombawomba kambe ngu mhaka yiya? Dipswi kudivalela di ngava ni txhamuselo yo hambana ngu kuya ngu m’thu ni m’thu, ni ku eto ti nga juja msungo.
2. Bhiblia yi txhamusela ngu nzila muni kudivalela ka Jehovha? (Wona ni txhamuselo ya hahatshi.)
2 Nzila yi Jehovha a divalelako ngu yona vathu yi hambanile ngutu ni nzila yi athu hi divalelako ngu yona vamwani. Kha ngaho wu a sikotako kudivalela ngu nzila yi Jehovha a divalelako ngu yona. M’bhali wa masalmo a wombile tiya ngu Jehovha: “Aniko awe wa ziva kudivalela [ngu ditshuri, NM] kasiku athu hi va ni txithavo.”a (Mas. 130:4) Ditshuri ngu ti to divalelo ya Jehovha i ‘divalelo ya ditshuri.’ Ka makhambi mamwani, vabhali va Bhiblia va thumisile dipswi da Txihebheru adi di txhamuselako nzila yi Jehovha a divalelako ngu yona, adi di si khaliko kuthumiswa kasi kutxhamusela nzila yi vathu va divalelako ngu yona.
3. Ngu kutxani divalelo ya Jehovha yi txi hambana ni yathu? (Isaya 55:6, 7)
3 Mbimo yi Jehovha a divalelako m’thu, o pfhuta da magwito txionho txa m’thu eneyo. Ngu nzila yoneyo, ene a nga sikota kutshumela e va ni wungana wa hafuhi ni Jehovha. Athu ha m’bonga ngutu Jehovha ngu ku hi divalela ngu nzila yoneyo yo xamatisa.—Lera Isaya 55:6, 7.
4. Jehovha a hi vhuna ngu nzila muni kupfisisa ati divalelo ya ditshuri yi wombako tona?
4 Divalelo ya Jehovha ya hambana ni yathu. Se kota vathu vo mbi hetiseka, hi nga ti pfisisa ngu nzila muni ati divalelo ya ditshuri yi wombako tona? Jehovha a thumisa sikombiso kasi ku hi vhuna kupfisisa nzila yi ene a divalelako ngu yona. Ka gondo yiya, hi na wona simwani sa sikombiso soneso. Sona si kombisa nzila yi Jehovha a pfhutako ngu yona sionho ni nzila yi wuxaka wathu wu tshumelako wu wusetwa ngu yona nga ti wu nga ti ngu tona kale. Kugonda ngu sikombiso soneso, ti na hi vhuna kuengetela lirando lathu ngu Jehovha ni ku m’bonga ngu wunene wakwe ni wumbilu.
JEHOVHA WA THAVISA SIONHO SATHU
5. Kumaheka txani mbimo yi Jehovha a divalelako sionho sathu?
5 Makhambi a mangi, Bhiblia yi fananisa txionho ni mrwalo. Mkoma Dhavhidha a txi womba-womba ngu sionho sakwe a ti khene: “Sionho sangu si tshutshutile si ni khubhunyetile ni msungo; sa ni kama kufana ni mrwalo wo nemela ngutu.” (Mas. 38:4) Kambe Jehovha wa divalela sionho sa wu a ti solako. (Mas. 25:18; 32:5) Dipswi da Txihebheru di di nga hunduluxelwa di txi “kudivalela” di txhamusela “kugula.” Se mbimo yi Jehovha a divalelako sionho sathu ti fana ni ku a txo gula mrwalo ka makata athu e wu veka kule.
“U divalete” (Mas. 32:5)
6. Ngu txihi txikombiso tximwani txi txhamuselako nzila yi Jehovha a hi divalelako ngu yona?
6 Bhiblia yi thumisa txikombiso tximwani kasi kukombisa ti to Jehovha a teka sionho sathu e si yisa kule. Masalmo 103:12 yi womba tiya: “A tsulisa kule sihambunyeto sathu, nga ti Wutxani ku ku kule ni mswa-ditambo.” Wutxani ni mswa-ditambo ku kule ni kule, kha ku thuki ku manana. Ngu mapswi mamwani, eto ti womba to Jehovha a teka sionho sathu e si yisa kule ngutu aha ko hi nge thuki hi di si mani kambe. Eto ti kombisa ti to Jehovha a divalela sionho sathu da magwito!
“Nga ti wutxani ku kule ni mswa-ditambo” (Mas. 103:12)
7. Bhiblia yi txhamusela ngu nzila muni ati Jehovha a ti mahako ngu sionho sathu? (Mika 7:18, 19)
7 Aku Jehovha a vekako kule sionho sathu, ina o si sengeletela? Ahim-him. Mkoma Ezekhiya a bhate tiya ngu Jehovha: “Nguko u tshotshile msana kwako sotshe sionho sangu.” (Isaya 38:9, 17) Eto ti kombisa ti to Jehovha a veka kule sionho sa m’thu wu a nga ti sola ni ku kha swi e si khumbula kambe. Ati Ezekhiya a nga womba ti nga hunduluxelwa ngu nzila yiya: “Awe u woni sionho sangu nga kha sa nga maheka.” Bhiblia yi tshumela yi junyatisa mhaka yiya ka txikombiso tximwani txi txi nga bhalwa ka Mika 7:18, 19. (Lera.) Mavhersikulo yawa, ma kombisa ti to Jehovha a rinza sotshe sionho sathu txizivani ka linene. Ka timbimo ta kale, ngako txo maha txi txo rinzwa txizivani ka linene ti ndi na karata kutshumela txi manwa.
“U tsotshile msana kwako sotshe sionho sangu” (Isaya 38:17)
“A na rinza sotshe sionho sathu sizivani ka linene” (Mika 7:19)
8. Ngu tihi ti hi nga ti gonda kala hawa?
8 Bhiblia yi ti veka hakubasani ti to mbimo yi Jehovha a hi divalelako, ene o thavisa txionho da magwito kasiku hi si zumbeli kutipfa mnando. Ngu ti Dhavhidha a nga ti womba, “va katekile avava sihoxo sawe si nga divalelwa; avava sionho sawe si nga fenengetwa. A katekile m’thu wu asi wombwiko ku i muonhi ngu Mkoma.” (Var. 4:7, 8) Ayiya ngu yona i ku divalelo ya ditshuri!
JEHOVHA WA PFHUTA SIONHO SATHU
9. Ngu txihi txikombiso txi Bhiblia yi txi thumisako kasiku hi maha hi pfisisa ti to Jehovha wa divalela sionho sathu da magwito?
9 Jehovha a thumisa txikombiso tximwani kasi ku hi vhuna kupfisisa lisima la digandelo da mtirulo. Ene wa pfhuta sionho sa m’thu wu a nga ti sola. Bhiblia yi womba ti to, to fana ni ku Jehovha a txo kuwula ni ku limpa sionho sathu. Eto ti maha ti to muonhi e tshumela e va wo basa. (Mas. 51:7; Isaya 4:4; Jer. 33:8) Jehovha apune a txhamusela ti to ti mahekisa kutxani toneto: “Hambi ngako sionho sanu si di mi bhilivilisile mi fana ni txiwunguwungu, si na basa kufana ni hunguva; hambi ngako si di bhilivilisile kunzihala, si na nga matoya o basa.” (Isaya 1:18) Ta karata kuthavisa dinodha da dikanju ka tximaha. Ngu toneto, Jehovha a thumisile txikombiso txiya kasi ku hi vhuna kupfisisa ti to sionho sathu si nga basiswa da magwito si txi nga kha si khali kumaheka.
“Hambi ngako sionho sanu si di mi bhilivilisile mi fana ni txiwunguwungu, si na basa kufana ni hunguva” (Isaya 1:18)
10. Ngu txihi tximwani txikombiso atxi Jehovha a txi thumisako kasi kukombisa kudivalela kwakwe ka hombe?
10 Nga ha hi nga ti wona ngu kona ka gondo yi yi nga pinda, sionho sathu si fananiswa ni txikweneti. (Mat. 6:12; Luka 11:4) Ngu toneto, mbimo yi hi yako hi maha txionho, txikweneti txathu txo ya txi kula ngutu. Athu hi ni txikweneti txa hombe! Kambe mbimo yi Jehovha a hi divalelako ti fana ni ku a txo pfhuta txikweneti txonetxo. Ene kha vili kuhakelwa ka txikweneti txi se txi nga divalelwa. Kufana ni m’thu wu a tsakako mbimo yi a divalelwako txikweneti txakwe, nathu ha tsaka mbimo yi Jehovha a hi divalelako sionho sathu.
“Hi divalele minando yathu” (Mat. 6:12)
11. Bhiblia yi lava kuwomba txani ngako yi txi kha yona sionho sathu ‘sa pfhutwa’? (Mithumo 3:19)
11 Jehovha kha njo divalela sikweneti mwendo sionho sathu dwe, ene o si pfhuta da magwito. (Lera Mithumo 3:19.) Mbimo yi hi divalelwako txionho, hi nga pimisa ngu X wa hombe awu a bhalwako ka mtengo wa male ayi hi dhevhako. Hambiketo, hi nga simama hi wona mtengo wa male yoneyo hambiku ku nga bhalwa X. Kambe kupfhuta to maha ti hambanile ni kuveka X. Kasi kupfisisa txikombiso txiya, ti lava hi khumbula ti to ka timbimo ta kale tinta ayi yi nga txi thumiswa ti txi hehuka ku yi pfhuta, m’thu a ndi na sikota kuteka txiponji e txi nakanisa ngu mati e gwita e pfhuta ati ti nga ti bhatwe ngu tinta yoneyo. Ngu toneto, mbimo yi “txikweneti txi pfhutwako,” txo nyamalala da magwito. Ati ti nga ti bhatwe haleya kha ti koteki ku ti wona kambe. Ti fana ni ku txikweneti txile txi si khali ku vaho. Kuziva ti to Jehovha kha njo divalela basi sionho sathu kambe o si pfhuta da magwito, eto ta gwesa mbilu yathu!—Mas. 51:9.
“Kasiku sionho sanu si basiswa” (Mith. 3:19, NM)
12. Txikombiso txa direfu da hombe txi txhamusela txani kwathu?
12 Ka Isaya 44:22, Jehovha a thumisa tximwani txikombiso kasi kutxhamusela nzila yi a pfhutako ngu yona sionho sathu. Yona yi womba tiya: “Na hangalasa sihambunyeto sako kufana ni hunguva, ni sionho sako kufana ni direfu.” (Isaya 44:22) Mbimo yi Jehovha a hi divalelako, to fana ni ku a txo thumisa direfu da hombe kasi kufenengeta sionho sathu, kasiku ni wammweyo a si si woni, hambi athu va nyamne va sona.
“Na hangalasa sihambunyeto sako kufana ni hunguva” (Isaya 44:22)
13. Hi ti pfisa kutxani mbimo yi Jehovha a divalelako sionho sathu?
13 Eto ti hi gondisa txani? Ngako Jehovha a txi hi divalela, kha ha fanela kusimama hi tipfa mnando ngu mhaka ya sionho sathu. Digandelo da Jesu di hakete da magwito sionho sathu. Ti fana ni ku si sa nga vaho. Jehovha a hi divalela ngu nzila yiya mbimo yi hi ti solako ngu ditshuri ka sionho sathu.
JEHOVHA WA TSHUMELA E HI AMUKELA KOTA VANGANA VAKWE
Divalelo ayi yi tako ngu ka Tate wathu wa nzumani ya hi tumelela kuva ni wuxaka wo tsana ni nene (Wona paragrafu 14)
14. Ngu kutxani hi nga thembako divalelo ya Jehovha? (Wona ni mifota.)
14 Divalelo ya Jehovha ya hi vhuna ti to hi va ni wuxaka wo tsana nayo. Eto ta hi vhuna ti to hi si zumbeli kutipfa mnando. Kha ha fanela kuthava hi pimisa ti to Jehovha wa veketela txiviti ni ku o emela mkhanjo kasiku e hi tsayisa. Eto kha ti na mbi thuka ti di mahekile. Ngu kutxani hi di fanete kuthemba divalelo ya Jehovha? Jehovha a gete tiya mprofeti Jeremiya: “Nguko ni na divalela wubihi wawe, kha ni na mbiswa ni txi alakanya sionho sawe.” (Jer. 31:34) Paulo a thumisile mapswi yawa mbimo yi a nga khene: “Ni na mbiswa ni txi alakanya sionho sawe.” (Vaheb. 8:12) Ti lava kuwomba txani toneto?
“Kha ni na mbiswa ni txi alakanya sionho sawe” (Jer. 31:34)
15. Tiwomba txani ku Jehovha kha nga ngadi e khumbula sionho sathu?
15 Ka Bhiblia, dipswi di di ku “kukhumbula” hi nga mbimo yotshe di wombako kupimisa ngu ti ti nga maheka kale. Hahanze keto, ti nga pata ku m’thu e maha to kari. Mmweyo wa sigevenga si si nga ti gogotetwe didhawani ka Jesu, a ti khene: “Jesu, ni khumbule mbimo yi u no bela Mfumoni kwako.” (Luka 23:42, 43) Ene a si ngo kombela Jesu ti to e mmahela to kari ka mbimo yile. Jesu a gete txigevenga txile ti to a ndi na txi wusa. Se mbimo yi Jehovha a wombako ti to kha ngadi e khumbula sionho sathu, eto tiwomba ti to a hi divalete ni ku kha na mbi maha txilo kasiku hi tsayisa ka mbimo ayi yi tako ngu mhaka ya sionho soneso.
16. Hi tipfisa kutxani ngu divalelo ya Jehovha?
16 Mbimo yi Jehovha a hi divalelako hi ti pfa hi di khululekile. Bhiblia yi thumisa tximwani txikombiso kasi ku hi vhuna kupfisisa toneto. Athu hi “tikhumbi ta txionho.” Mbimo yi Jehovha a hi divalelako, athu hi fana ni tikhumbi ati ti nga “thukunyulwa ka txionho.” (Var. 6:17, 18; Mtu. 1:5) Mbimo yi hi zivako ti to Jehovha a hi divalete sionho sathu, ha tsaka ngutu kufana ni txibotxhwa atxi txi nga humiswa jele.
‘Awe u thukunyutwe ka txionho’ (Var. 6:18)
17. Divalelo yi fanisa kutxani ni kuhanyiswa ka malwati? (Isaya 53:5)
17 Lera Isaya 53:5. Bhiblia yi womba ti to ngu mhaka ya kwa mbi hetiseka, athu hi fana ni m’thu wu a ku ni malwati o mbi na mrende. Ngu konaha ka mtirulo wu Jehovha a nga hi ninga ngu kuthumisa Mwanana wakwe, hi nga womba ti to, ti fana ni ku hi txo hanyiswa ka malwati oneyo. (1 Pedro 2:24) Mbimo yi hi mahako txionho, hi onha wuxaka wathu ni Jehovha. Kambe ngu kona ha ka mtirulo, ene a hi divalete ni ku ta tshumela ti koteka ku hi va ni wuxaka wa wunene nayo.
“Se hi hanyisilwe ka mikhwimbiriti yakwe” (Isaya 53:5)
DIVALELO YA JEHOVHA YI WOMBA TXANI KWATHU
18. Ngu tihi ti hi nga ti gonda ka sikombiso asi Bhiblia yi si thumisako kasi kujunyatisa divalelo ya Jehovha? (Wona dikwadru di di ku “Nzila yi Jehovha a hi divalelako ngu yona.”)
18 Hi gondile txani ka sikombiso asi Bhiblia yi si thumisako kasiku hi vhuna kupfisisa divalelo ya Jehovha? Hi gondile ti to, mbimo yi Jehovha a hi divalelako, ti fana ni ku sionho sathu si si khali ku vaho ni ku Jehovha kha na mbi hi tsayisa mbimo yi yi tako ngu mhaka ya sionho soneso. Eto ta hi vhuna ku hi va ni wungana wa hafuhi ni Tate wathu wa nzumani. Hambiketo Jehovha wa hi divalela nguku a hi randako, i singa ngu ku ti hi fanelako.—Var. 3:24.
19. a) Ngu kutxani hi di fanete kubonga Jehovha? (Varoma 4:8) b) Hi na bhula ngu txani ka gondo ayi yi londiselako?
19 Lera Varoma 4:8. Hi fanete ku m’bonga ngutu Jehovha Txizimu txa “divalelo ya ditshuri.” (Mas. 130:4) Kambe hi txi lava kudivalelwa ngu Jehovha, hi fanete kumaha timhaka ta lisima ngutu. Jesu a ti khene: “Nguko ngako mi txi divalela vathu tiphazamo tawe, Tate wanu wa nzumani nene a na mi divalela.” (Mat. 6:14, 15) Ti hakubasani ti to nda lisima ngutu kuetetela divalelo ya Jehovha. Kambe hi nga ti mahisa kutxani toneto? Hi na bhula ngu tona ka gondo ayi yi londiselako.
NDANDO 46 Ha bonga Jehovha
a Mibhalo yo khata ya Txihebheru yi thumisa dipswi di di ku “divalelo,” eto ti kombisa ti to ayiya ngu yona dwe divalelo ya ditshuri. Matradhusawu a mangi a Bhiblia kha ma junyatisi pontu yiya ya lisima yi ku ka Masalmo 130:4.