Lirando la Txizimu nda kala kupinduka

1-2. Ngu sihi sikarato asi Makristu a mangi ma wonisanako naso?

HI NGA pimisa ngu dibhoti adi di ku hagari ka linene ku txi peka moya wa hombe ngutu, aha mavimbi ma di rethako di ya khe ni khe. Phela dona di na simama di txi kongomiswa ngu mavimbi kala kuhumelela m’thu wu a ku ni rikhiso. Rikhiso ngu yona yi no tsanisa dibhoti dile, yi maha ti to di si bhwabhwameli mbimo yi di pfako moya.

² Ngako u txi humelelwa ngu sikarato sa hombe, u nga tipfa kufana ni dibhoti diya. Matipfelo ako ma nga txitxa-txitxa. Ditshiku dimwani u nga themba lirando la Jehovha ni txivhuno txakwe. Kambe dimwani ditshiku u nga ti wotisa to ina Jehovha wa ti wona ati ti kuhumelelako. (Mas. 10:1; 13:1) Ti nga maha mngana wako e kugela mapswi o tsanisa aya ma nga kumahako u tipfa kwati ngu mbimonyana. (Mav. 17:17; 25:11) Kambe kukanakana ku nga tshumela kuhumelela. Phela u nga thuka u pimisa to Jehovha a kutshuralete. Se ngu nzila yo fanekisela, u nga vekisa kutxani rikhiso ngako u txi maneka ka txiemo txo nga tiya? U nga tsanisekisa kutxani ti to Jehovha wa kudhunda ni ku a na kuvhuna?

3. Masalmo 31:7 ni 136:1 yi hi gondisa txani mayelano ni lirando ni wuthembeki wa Jehovha, ni ku ngu kutxani hi nga wombako ti to Jehovha txikombiso txa txinene ka fanelo yiya? (Wona ni mfota.)

³ Tximwetxo txa ti ti nga kuvhunako kusimama u di tsani ngako u txi wonisana ni sikarato ngu khumbula ti to Jehovha a ni lirando ni ku a thembekile. (Lera Masalmo 31:7; 136:1.) Dipswi di di nga thumiswa hawa di ku “lirando” di kombetela lirando lo tshima ali m’thu a nga vako nalo ngu mmwani. Jehovha txikombiso txa hombe txa lirando lonelo. Kuwomba ditshuri, mapswi a orijinali aya ma nga bhalwa ka Eksodha 34:6, 7 ni Masalmo 86:5 ma kombisa ti to Jehovha a tate ngutu ngu lirando ni ku a thembekile. Phela eto ti kombisa ti to Jehovha kha na mbi gwita a di lekile malanda akwe o thembeka! Kukhumbula ti to Jehovha a thembekile ti nga kuvhuna u tsanisela ngako u txi wonisana ni sikarato.—Mas. 23:4.

LIRANDO LA JEHOVHA YIMWEYO YA TIGONDO TA MAKHATO TA BHIBLIA

4. Ningela txikombiso txa tigondo ta makhato ta Bhiblia ni ku txhamusela ti to ngu kutxani hi txi kholwa ka tona.

⁴ Tximwani atxi txi nga kuvhunako kasiku u wonisana ni sikarato ngu khumbula ti to lirando la Jehovha yimwani ya tigondo ta makhato ta Bhiblia. Nji txani “tigondo ta makhato ta Bhiblia?” Ti nga maha u txi pimisa ngu ditshuri adi u nga di gonda ka dipswi da Txizimu. Ngu txikombiso, u gondile ti to ditina da Txizimu i Jehovha, to Jesu mwanana wamweyo ekha wa Txizimu, to vafi kha va zivi txilo ni ti to mafu yawa ma na va paradhesi, aha vathu va no hanya ngu ha ku si gumiko. (Mas. 83:18; Ekl. 9:5; Joh. 3:16; Mtu. 21:3, 4) Phela aku u kholwako ka tigondo tiya, ti nga karata ku m’thu mmwani e kulekisa kukholwa ka tona. Ngu kutxani? Nguku u ti pfisisile ti to tigondo tiya ditshuri. Gondo yiya ya makhato ya Bhiblia yi nga kuvhuna ti to u si kanakani ti to Jehovha a na kukhatalela mbimo yi u wonisanako ni sikarato.

5. Txhamusela nzila yi m’thu a nga vayilelako ngu yona tigondo ta makuhu.

⁵ Mbimo yi u nga khata kugonda Bhiblia, nji txani txi nga kuvhuna ti to u vayilela tigondo ta makuhu? Ti nga maha u di vhunilwe ngu kufananisa ati u nga txi tigonda txhetxheni kwako ni ti Bhiblia yi ti gondisako. Ahi woni txikombiso txiya: Ti nga maha awe u ti kholwa ti to Jesu ngene i ku Txizimu Nyamitamo. Kambe mbimo yi u nga ti gonda Bhiblia ti nga maha u di ti wotisile tiya: ‘Ina gondo yiya ditshuri?’ Msana kova u di gondile ati Bhiblia yi ti gondisako mayelano ni mhaka yiya, u ti woni ti to Jesu hi nga Txizimu. Koneho, u khatile kukholwa ka ti Bhiblia yi ti gondisako to: Jesu “matiwula a sotshe sivangwa,” “mwanana wamweyo ekha wa Txizimu.” (Vakl. 1:15; Joh. 3:18) Ti hakubasani ti to tigondo ta makuhu ti nga maha ‘ti di mite mikuluti’ aha ko ti nga karata ku ti dula. (2 Vak. 10:4, 5) Kambe msana kova u di gondile ditshuri khwa tshumela u kholwa ka tigondo toneto ta makuhu.—Vaf. 3:13.

6. Ngu kutxani u nga tsanisekako ti to “lirando la Jehovha nda kala kupinduka”?

⁶ U nga maha ati ti fanako ngu ti Bhiblia yi ti gondisako mayelano ni lirando la Jehovha. Ngako u txi wonisana ni sikarato, u kana-kana ti to Jehovha wa kudhunda, tiwotise tiya: ‘Ina ati ni ti pimisako ngu tona?’ Fananisa kukanakana kwako ngu lirando la Jehovha ni mapswi aya ma ku ka Masalmo 136:1, i ku ndimana ayi yi nga ñola msungo mhaka wa gondo yiya. Ngu kutxani Jehovha a txi womba ti to lirando lakwe ndo “thembeka”? Ngu kutxani mhaka yi yo “lirando lakwe nda kala kupinduka” yi txi wuyeletelwa 26 wa makhambi ka disalmo diya? Nga ha hi nga ti wona ngu kona, lirando lo thembeka la Jehovha ngu vathu vakwe i gondo ya makhato a Bhiblia ayi yi fanako ni tigondo timwani ati u nga ti tumela ka dipswi da Txizimu. Phela, makuhu mhaka yi yo Jehovha a ku wona u si vhuni txilo mwendo ti to khu fanelwi ngu lirando lakwe. U nga kholwe ka toneto, ti lambe nga ti u nga lambisako tona gondo yimwani ni yimwani ya makuhu!

7. Ningela txikombiso txa tindimana ati ti kombisako ti to Jehovha wa hi dhunda ngu ditshuri.

⁷ Bhiblia yi ni timhaka tatingi ti hi tsanisekisako ti to Jehovha wa hi dhunda. Ngu txikombiso, Jesu a gete tiya vagondiswa vakwe: “Anu mi va lisima ngutu kupinda sindili so tala.” (Mat. 10:31) Jehovha apune a tsanisekisile tiya vathu vakwe: “Na kutsanisa, kambe na kuvhuna, na kuseketela ngu dianza dangu da txinene da kululama.” (Isaya 41:10) Phela mapswi yawa ma basisa mhaka. Jesu kha nga khene ‘awe u nga va wa lisima ngutu,’ ni ku Jehovha kha nga khene ‘ani ni nga kuvhuna.’ Hahanze keto, vona va khene: “Anu mi va lisima ngutu” ni ku “Ani ni na kuvhuna.” Mbimo yi u wonisanako ni sikarato u txi kana-kana ti to Jehovha wa kudhunda, tindimana tiya ti nga kuvhuna ku u tsaniseka ti to Jehovha wa kudhunda ngu ditshuri. Phela tindimana tiya ti womba ditshuri. Se ngako u txi alakanyisisa khakwati ngu tindimana tiya, ni kutshumela u maha mkombelo ka Jehovha mayelano ni kukanakana kwako, eto ti na ku kuzeta ku u womba mapswi aya ma ku ka 1 Johani 4:16 aya ma ku: “Se athu hi li zivile ni ku li tumela lirando li Txizimu txi ku nalo ni nathu.”a

8. U nga maha txani ngako mbimo yimwani u txi kana-kana ti to Jehovha wa kudhunda?

⁸ Kambe u nga maha txani ngako mbimo yimwani u txi kana-kana ti to Jehovha wa kudhunda? Fananisa matipfelo ako ni ti u ti zivako. Matipfelo athu ma nga txitxa-txitxa, kambe lirando la Jehovha kha li txitxatxitxi. Lona nda ditshuri ngaha Bhiblia yi hi gondisako ngu kona. Ngako hi txi kana-kana ti to Jehovha wa hi dhunda, ho veka hahatshi fanelo yakwe ya lisima ngutu i ku lirando.—1 Joh. 4:8.

ALAKANYISISA KHA KWATI NGU LIRANDO LA JEHOVHA

9-10. Jesu a txi womba-womba ngu txani mbimo yi a nga womba mapswi aya ma ku ka Johani 16:26, 27? (Wona ni mfota.)

⁹ Hi nga gonda to engeteleka mayelano ni lirando la Jehovha ngu kuveka mapimo ka ti Jesu a nga gela vagondiswa vakwe. Ene a ti khene: “Nguko Tate apune wa mi randa.” (Lera Johani 16:26, 27.) Jesu kha nga gela mapswi yawa vagondiswa vakwe ngu txikongomelo txo va tangalisa timbilu, nem a si ngo womba-womba ngu matipfelo akwe, kambe a txi womba-womba ngu mkombelo.

¹⁰ Jesu a txi gwita ngu kugela vagondiswa vakwe ti to va ti fanete kumaha mkombelo ngu ditina dakwe, i si nga kwakwe. (Joh. 16:23, 24) I di ta lisima ngutu ku ve ti ziva tiya. Msana kova a di wusilwe, ti nga maha vagondiswa vakwe va di navete kumaha mkombelo kwakwe. Phela vona se va txi ziva Jesu kota mngana wawe. Ti nga maha va di pimisile ti to aku a nga txi va dhunda ngutu a ndi na ti tsakela kupfa mikombelo yawe kasiku e va vhuna ku yi hokisa ka Tate. Kambe, Jesu a va gete ti to va sa fanela kupimisa ngu nzila yiya. Ngu kutxani? Nguko ene a va gete tiya: “Tate apune wa mi randa.” Phela mhaka yiya, yi maha txienge txa tigondo ta makhato ta Bhiblia mayelano ni mkombelo. Pimisa ngu ti to ti kugwesa ngu nzila muni toneto. Mbimo yi u nga khata kugonda Bhiblia u khatile kuziva Jesu ni ku m’dhunda. (Joh. 14:21) Kambe, kufana ni vagondiswa vo khata, awe u maha mkombelo ka Txizimu u txi ziva ti to txona txa kudhunda. Awe wa kombisa likholo lonelo yotshe mbimo yi u mahako mkombelo ka Jehovha.—1 Joh. 5:14.

NJI TXANI ATXI TXI NGA KUMAHAKO U KANA-KANA

11. Sathani a ti pfisa kutxani ngako hi txi khata kukanakana ti to Jehovha wa hi dhunda?

¹¹ Nji txani atxi txi nga hi mahako hi kana-kana ti to Jehovha wa hi dhunda? Tximwetxo txa kona i Sathani. Sathani a “lava wo mkakatxula” ni ku a ndi na tsaka e tshumela e kulungela ngako hi txi kana-kana ti to Jehovha wa hi dhunda. (1 Pedro 5:8) Phela ngu lirando lakwe, Jehovha ahi ningile mterulo, i ku ningo ayi Sathani a zamako ku hi maha hi tipfa hi si faneleki ku yi amukela. (Vaheb. 2:9) Kambe, i mani awu a tsakako ngako hi txi kana-kana ti to Jehovha wa hi dhunda? I Sathani. I mani wu a nga tsakako ngako hi txi godhola aha koza hi ema kuthumela Jehovha? Ngene Sathani. Phela Sathani a zama ku hi maha hi pimisa ti to Jehovha kha hi dhundi, kambe eto hi nga ditshuri. Sathani ngene a nga luza lirando la Jehovha. Se ene a thumisa otshe marindi akwe kasiku hi maha hi tipfa hi si dhundwi ngu Jehovha. (Vaef. 6:11) Se ngako hi txi tumbula totshe ati a ti mahako, eto ti nga hi vhuna ku hi tiemisela kuvayilela marindi akwe.—Jak. 4:7.

12-13. Nji txani tximwani txi nga hi mahako hi kana-kana ti to Jehovha wa hi dhunda?

¹² Ku ni timwani ati ti nga hi mahako hi kana-kana ti to Jehovha wa hi dhunda. Nji txani txa kona? Njionho atxi hi nga txi mana ka Adhamu. (Mas. 51:5; Var. 5:12) Txionho txi onhile wungana wa vathu ni Txizimu. Txi tshumete txi onha nzila yi hi pimisako ngu yona, matipfelo athu ni dihanyo dathu.

¹³ Txionho txa gwesa matipfelo athu ngu nzila yo biha, txi maha ti to hi tipfa mnando, hi vilela, hi tipfa hi sa vhikeleka ni timwani. Phela mbimo yi hi onhako ha va ni matipfelo yawa. Kambe, tximwani atxi txi nga hi mahako hi va ni matipfelo awa, ngu zumbela kukhumbula ti to hi vaonhi nguko Jehovha kha hi vanga kasiku hi onha. (Var. 8:20, 21) Kufana ni mmovha awu wu si tsimbiliko kwati ngako dipinewu di di thotwe, nathu ngu mhaka ya txionho, kha hi na kusikota kumaha totshe ngu nzila yo hetiseka. Se kha ti xamalisi aku mbimo yimwani hi kanakanako ti to Jehovha wa hi dhunda. Ngako eto ti txi hi mahekela, hi fanete kukhumbula ti to Jehovha ‘Txizimu txa hombe txo thaviseka, . . . atxi txi xayisako txitumelelano, ni kupfela wusiwana vale va txi randako ni kuxayisa sirumo sa txona.’—Neh. 1:5.

14. Kualakanyisisa ngu mterulo ti nga hi vhunisa kutxani ku hi tsaniseka ti to Jehovha wa hi dhunda? (Varoma 5:8) (Wona dikwadru adi di ku “Tiwonele kasiku u si ‘kanganyiswi ngu txionho.’”)

¹⁴ Ditshuri ti to, mbimo yimwani hi nga tipfa hi si fanelwi ngu lirando la Jehovha. Kuwomba ditshuri, kha hi fanelwi ngu lirando la Jehovha, ngu toneto ti mahako ti to lirando lakwe li va la lisima ngutu kwathu. Kha txi ngaho atxi hi nga txi mahako kasi kukombisa ti to ha fanelwa ngu lirando la Jehovha. Hambiketo, mterulo wa fenengeta sionho sathu ni ku Jehovha a hi ningile mterulo ngu ku a hi dhundako. (1 Joh. 4:10) Khumbula kambe ti to Jesu a tete ku ta hulukisa vaonhi i si nga vathu vo hetiseka. (Lera Varoma 5:8.) Kha ngaho awu a nga mahako to maha ngu nzila yo hetiseka ni ku Jehovha kha emeli ti to hi maha toneto. Kupfisisa ti to txionho txi nga hi maha hi kana-kana to Jehovha wa hi dhunda, ti nga hi vhuna ku hi maha totshe ati hi nga tikotako kasiku hi lwisana ni matipfelo oneyo.—Var. 7:24, 25.

SIMAMA U DI THEMBEKILE

15-16. Ngako hi txi simama hi di thembekile ka Jehovha, hi nga tsaniseka ka ti to txani ni ku ngu kutxani? (2 Samuwele 22:26)

¹⁵ Jehovha a lava ti to hi maha txisungo txa txinene i ku kusimama hi “namarela kwakwe.” (Dhewut. 30:19, 20) Ngako hi txi maha toneto hi nga tsaniseka ti to ene a na simama a di thembekile kwathu. (Lera 2 Samuwele 22:26.) Ngako Jehovha a txi simama a di thembekile kwathu, hi nga themba ti to ene a na hi vhuna ka totshe ati ti nga humelelako ka wutomi wathu.

¹⁶ Nga ha hi nga ti wona ngu kona ka gondo yiya, hi ni sivangelo so tala so hi simama hi di tsani mbimo yi hi wonisanako ni sikarato. Ha ti ziva ti to Jehovha wa hi dhunda ngutu ni ku a na hi vhuna. Phela eto ngu ti Bhiblia yi hi gondisako. Ngako hi txi thuka hi kana-kana ti to Jehovha wa hi dhunda, hi nga pimisa ngu ti hi ti zivako ti to ditshuri, hahanze ka ti hi nga vako hi txi tipfisa tona ka mbimo yoneyo. Hi lava kusimama hi tsaniseka ti to lirando la Jehovha nda kala kupinduka, i ku ti Bhiblia yi hi gelako.