U nga maha txani kasiku u tshukwatisa mikombelo yako?

1-2. a) Ngu kutxani mbimo yimwani ti nga hi karatelako kugela Jehovha totshe ati ti hi karatako? b) Hi ti zivisa kutxani to Jehovha wa riya nzeve ka mikombelo yathu?

INA u pimisa ti to u womba-womba timhaka ti ti fanako ka mikombelo yako mwendo ta kukaratela kugela Jehovha totshe ti ti ku mbiluni kwako? I di toneto, khu nga wekha. Aku hi zumbako hi di ñolekile ditshiku ni ditshiku, ti nga maha hi va ni mkhuva wo maha mikombelo yo koma ngutu ta tinene. Mbimo yimwani ti nga hi karatela kugela Jehovha totshe ti hi tipfisako tona ngu kupimisa ti to kha ti hi faneli kumaha toneto.

² Bhiblia ya hi tsanisekisa ti to ta lisima ka Jehovha hi nga kutshurisela mikombelo yathu, kambe ngu maha mkombelo wo huma mbiluni. Ene wa engisa “mikombelo ya valulami.” (Mas. 10:17) Jehovha wa riya nzeve ka otshe mapswi aya hi m’gelako nguku athu hi va lisima kwakwe.—Mas. 139:1-3.

3. Hi na bhula ngu txani ka gondo yiya?

³ Ka gondo yiya, hi na wona tixamulo ta siwotiso asi si londiselako: Ngu kutxani hi nga mahako mkombelo ka Jehovha hi si thavi? Hi nga mahisa kutxani mikombelo ayi yi humako ngu mbiluni? Mikombelo ya malanda a Jehovha ayi yi nga bhalwa ka Bhiblia yi nga hi vhunisa kutxani kumaha toneto? Hi nga maha txani ngako hi di karatekile aha ko hi si tikoti kugela Jehovha ati hi ti pfisako tona? He woni tixamulo ta siwotiso siya.

MAHA MKOMBELO KA JEHOVHA U SI THAVI TXILO

4. Nji txani txi nga hi vhunako kumaha mkombelo ka Jehovha na hi si thavi txilo? (Masalmo 119:145)

⁴ Jehovha mngana wo thembeka ni ku a hi navelela ta tinene. Ngako hi txi pfisisa tiya, hi na mbi thava kugela Jehovha ati hi ti pimisako ni nzila yi hi tipfako ngu yona. M’bhali wa Masalmo 119 atxi ti ziva to Jehovha mngana wo thembeka ni ku ati m’navelela ta tinene. M’bhali wa Masalmo atxi wonisana ni sikarato. Ngu txikombiso, vathu va txi zumbela kuwombawomba makuhu ngu ngene. (Mas. 119:23, 69, 78) I singeto dwe, mbimo yimwani atxi tipfa mnando ngu mhaka ya tiphazamo takwe. (Mas. 119:5) Hambiketo, ene asi thavi kugela Jehovha matipfelo akwe.—Lera Masalmo 119:145.

5. Ngu kutxani hi sa fanela kutipfa mnando ngako hi txi lava kumaha mkombelo? Ningela txikombiso.

⁵ Kha ha fanela kutumelela ti to kutipfa mnando ku hi tsivela kumaha mkombelo. Jehovha wa ramba votshe hambi vale va nga maha sionho sa hombe ti to ve maha mikombelo kwakwe. (Isaya 55:6, 7) Hi nga pimisa ngu m’thu wu a endako eya ka wukhalo wu asi wu ziviko, e timela e gwita e pfa tingana nguku a nga timela. U alakanya ti to kha fanela kukombela txivhuno nguku a pfako tingana? Nadha! Ngu ha kufanako, kha ha fanela kupfa tingana to maha mkombelo ka Jehovha ngu mhaka sionho sathu.—Mas. 119:25, 176.

NJI TXANI TXI NO HI VHUNA KUMAHA MIKOMBELO YO HUMA NGU MBILUNI

6-7. Nji txani txi nga hi vhunako kumaha mikombelo yo huma ngu mbiluni? Ningela txikombiso. (Wona ni txhamuselo ya hahatshi.)

⁶ Mbimo yi hi gelako Jehovha totshe ti hi ti pfisako tona ni ti hi ti pimisako, wungana wathu nayo wu ya wu tsana. Nji txani txi no hi vhuna kumaha toneto?

⁷ Alakanyisisa ngu tifanelo ta Jehovha.a Mbimo yi hi yako masoni hi alakanyisisa ngu tifanelo ta Jehovha, ti na hi hehukela kumgela ti hi ti pfisako tona ni ti hi ti pimisako. (Mas. 145:8, 9, 18) Wona txikombiso txa mwanathu Kristine, awu a nga ti ni tate wo karata ngutu. Ene a womba tiya: “Ti txi ni karatela kuwona Jehovha kota Tate ni ku m’gela ti ni ti pfisako tona. Ani ni txi pimisa ti to aku ni nga mbi hetiseka Jehovha a ndi na karala ngu tiphazamo tangu e ni tsukula.” Ngu yihi fanelo ya Jehovha ayi yi nga vhuna Kristine? Ene a womba tiya: “Lirando la Jehovha lo thembeka li ni vhuni kuwona to ene wa ni dhunda. Ani na ti ziva to a na ni ñola ngu manza mambidi, kha na mba thuka e ni leka. Hambi i di ti to na maha tiphazamo to kari, ene a na ni ñola ngu nzila ya yinene e ni komba lirando ni ku ni vhuna. Ni txi pimisa ngu lirando la Jehovha, la ni vhuna ku ni m’gela ati ti ni mahako ni tsaka ni ti ti ni mahako mbimo yimwani ni pandiseka.”

8-9. Ngu kuya ngu txikombiso txa Aliska, ngu kutxani hi di fanete kupimisa ngu ti hi no ti womba ka mikombelo yathu?

⁸ Pimisa ngu ti u no ti womba. U si se maha mkombelo u nga tiwotisa tiya: ‘Ngu sihi sikarato asi ni wonisanako naso konku? Ina ku ni wu ni fanelako ku m’divalela? Ina ni wonisana ni txikarato txo kha ni khali ku nga wonisana natxo?’ (2 Vafu. 19:15-19) Hi nga tshumela hi etetela txikombiso txa Jesu ngu kumaha mkombelo hi kombela kubasiswa ka ditina da Jehovha, ku ta ka Mfumo wakwe ni kumaha kudhunda kwakwe.—Mat. 6:9, 10.

⁹ Mwanathu wu a dhanwaku ku i Aliska a tumbute to mwamna wakwe ati ni malwati a câncer, aya ma ndi no mmaha asi vi ni mbimo yo lapha atxi hanya. Makhatoni ti txi mkaratela kumaha mkombelo. Ene a womba tiya: “Ni ti zumba ni di karatekile aha ti nga txi ni karatela kupimisa ngu mapswi ya ni ndi no ma womba ka mkombelo.” Nji txani txi nga vhuna Aliska? Ene a txhamusela tiya: “Ni si se maha mkombelo ni tiha mbimo yo pimisa ngu ti ni no ti womba, eto ta ni vhuna ku ni si wombawombi ngu sikarato sangu ni malwati a mwamna wangu dwe. Ti tshumela ti ni vhuna ku ni va ni kurula ka mialakanyo mbimo yi ni mahako mkombelo.”

10. Ngu kutxani i di ta tinene kumaha mikombelo yo lapha? (Wona ni mifota.)

¹⁰ U nga jahiseli mikombelo yako. Ditshuri ti to mikombelo yo koma ni yona yi huma ngu mbiluni. Kambe ngaku hi si jahiseli mikombelo yathu ti na hi hehukela kuwomba ti hi ti pfisako tona ni ti hi ti pimisako.b Elijah, mwamna wa Aliska a womba tiya: “Ni zama kumaha mkombelo makhambi o tala ngu ditshiku ni ku ni txi tiha mbimo yo maha mikombelo yo lapha, wungana wangu ni Jehovha wu ya masoni wu tsana. Jehovha kha karali ngu kuengisela mikombelo yangu, ngu toneto na tiziva to ni nga womba totshe ati ni ti lavako.” Duketa kumaha tiya: Sawula mbimo ya yinene ni wukhalo wa wunene kasiku u si tsulupetelwi ngu txilo. U txi ti lava u nga maha mkombelo ngu dipswi do guleka ni ku vana ni txitolovelo txo maha mikombelo yo lapha.

ALAKANYISISA NGU MIKOMBELO YO HUMA NGU MBILUNI AYI YI NGA BHALWA MU KA BHIBLIA

11. Ngu kutxani hi di fanete ku alakanyisisa ngu mikombelo yo huma ngu mbiluni ayi yi nga bhalwa mu ka Bhiblia? (Wona ni dikwadru adi di ku “Ina u tipfa nga ti malanda a Jehovha a kale ma nga ti ti pfisa tona?”)

¹¹ Tximwani atxi txi nga hi vhunako ngu pimisa ngu ti malanda a Jehovha ma nga tiwomba ka mikombelo yawe ni tindando ati va nga ti embelela va txi dhumisa Jehovha. Kuwona nzila yi malanda a Jehovha ma nga ti maha ngu yona mkombelo wo huma mbiluni, ti na ku kuzeta kugela Jehovha totshe ati u ti pfisako tona ni ti u ti pimisako. Mapswi ya va nga ma thumisa kasi kudhumisa Jehovha ngu ona, ma nga kuvhuna nawe kasiku u mana ta tiphya to ti womba ka mikombelo yako. Phela ti nga maha mu ka Bhiblia u mana mikombelo ya malanda a Jehovha aya ma nga wonisana ni siemo so fana ni si u wonisanako naso.

12. Ngu sihi siwotiso asi hi fanelako kupimisa ngu sona mbimo yi hi alakanyisisako ngu mikombelo ayi yi nga bhalwa mu ka Bhiblia?

¹² Mbimo yi u gondako ngu mikombelo ayi yi nga bhalwa mu ka Bhiblia, pimisa ngu tiya: ‘I mani wu a nga maha mkombelo wonewo ni ku nji txani txi nga ti humelela ka wutomi wakwe? Ina ti a nga ti womba ka mkombelo wakwe ti khala ku nga ni humelela? Ni gonda txani ka mkombelo wakwe?’ Kutilava ti lava u maha wuxolisisi kasiku u mana tixamulo ta siwotiso soneso, kambe kumaha mizamo yo maha toneto nda lisima ngutu. Ahi woni sikombiso so kari.

13. Hi gonda txani ka mkombelo wa Ana? (1 Samuwele 1:10, 11) (Wona ni mfota wa kapa.)

¹³ Lera 1 Samuwele 1:10, 11. Mbimo yi Ana a nga maha mkombelo wuwa, ati wonisana ni sikarato simbidi sa hombe. Ene i ti txifule, ni ku mkatikuloni wakwe ati m’dyiseta. (1 Sam. 1:4-7) Kambe Ana a mahile mkombelo wo lapha e gela Jehovha totshe ati a nga txi ti pfisa tona. Ngu toneto, a pfite kupepa ka mialakanyo. (1 Sam. 1:12, 18) I di ti to u wonisana ni txikarato txa hombe, u nga gonda txani ka mkombelo wa Ana? Ngako “hi txi veka wutomi wathu manzani ka Jehovha,” hi m’gela sotshe sikarato sathu ni nzila yi hi tipfako ngu yona, hi na pfa kupepa ka mbilu.—Mas. 55:22.

14. a) Ngu tihi timwani hi ti gondako ka txikombiso txa Ana? b) Ngu kutxani kualakanyisisa ngu mikombelo ayi yi nga bhalwa mu ka Bhiblia ti nga hi vhunako kutshukwatisa mikombelo yathu? (Wona ni txhamuselo ya hahatshi.)

¹⁴ Ana a vite ni mwanana awu a nga ti dhanwa ku i Samuwele. Msana ka malembe o kari adi mvelekile, a mtekile e m’yisa ka Mprista wa hombe Eli. (1 Sam. 1:24-28) Ana a mahile mkombelo e bonga Jehovha ngu kuvhikela malanda akwe o thembeka ni ku ma khatalela.c (1 Sam. 2:1, 8, 9) Sikarato sa Ana si sa guma, kambe ene a vekile mapimo ka makatekwa aya Jehovha a nga ti mningile ona. Hi gonda txani? Hi na sikota kutsanisela sikarato ngako hi txi veka mapimo ka ti Jehovha a nga hi mahela ni ti a simamako e ti maha kasi ku e hi vhuna.

15. Hi gonda txani ka mkombelo wa mprofeti Jeremiya? (Jeremiya 12:1)

¹⁵ Lera Jeremiya 12:1. Kudingana mbimo yo kari mprofeti Jeremiya a godhote ngu kuwona vabihi vo tala va txi ti komba nga va tsakile, a tshumete e godhola nguku wona Vaisrayeli kuloni va txi m’xanisa. (Jer. 20:7, 8) Hahanze ko sola Txizimu, Jeremiya a gete Jehovha sotshe sikarato sakwe. Ngu kutsimbila ka mbimo, Jeremiya a woni Jehovha a txi tsayisa Vaisrayeli. Phela eto ti engetete themba yakwe ya ti to Jehovha Txizimu txo lulama. (Jer. 32:19) Nathu hi nga godhola ngaku hi txi wona vabihi ti txi va tsimbilela kwati mwendo va txi hi xanisa. Kambe kufana ni Jeremiya, hi nga gela Jehovha sotshe sikarato sathu hi txi themba ti to Jehovha ngu mbimo ya kona a na lulamisa totshe to biha ati ti hi humelelako.

16. Hi gonda txani ka txikombiso txa M’levhi awu txiemo txakwe txi nga ti si m’tumeleli kuya khozela Jehovha dithempeleni? (Masalmo 42:1-4) (Wona ni mifota.)

¹⁶ Lera Masalmo 42:1-4. Dibhuku diya di bhatwe ngu M’levhi awu a nga si na kusikota kutsula eya dhumisa Jehovha dithepeleni ni Vaisrayeli kuloni. Mapswi akwe ma kombisa nzila yi a nga ti tipfa ngu yona. Ngaku hi di khotetwe jele ngu mhaka ya likholo lathu mwendo hi di jiyete ngu malwati, hi nga thuka hi tipfa kufana ni M’levhi. Mbimo yimwani hi nga tipfa kwati kambe yimwani mbimo hi nga tipfa hi di godhote. Ti si nga ni mhaka ni ti hi ti pfisako tona, yotshe mbimo hi fanete kugela Jehovha matipfelo athu. Eto ti na hi vhuna kupfisisa kwati matipfelo athu ni ku wona timhaka ngu nzila ya yinene. Ngu txikombiso, M’levhi a ti woni ti to a ti ngadi ni yimwani mikhanjo yo dhumisa Jehovha. (Mas. 42:5) Ene a tshumete e tiha mbimo yo alakanyisisa ngu nzila yi Jehovha a nga ti m’khatalela ngu yona. (Mas. 42:8) Kumaha mkombelo ka Jehovha awu wu humako ngu mbiluni, ti nga hi vhuna kupfisisa matipfelo athu ni ku mana mtamo wo tsanisela sikarato.

17. a) Hi gonda txani ka mkombelo wa mprofeti Jona? (Jona 2:1, 2) b) Ngu kutxani i di ta tinene kuvekisa tindimana ta Bhiblia to fana ni ti ti ku ka Masalmo? (Wona txhamuselo ya hahatshi.)

¹⁷ Lera Jona 2:1, 2. Mprofeti Jona a mahile mkombelo wuwa adi mndani ka txihaka. Ene a sa engisa Jehovha. Hambiketo, ene ati tsaniseka to Jehovha adi na m’engisa. Ka mkombelo wakwe, Jona a thumisile mapswi ya hi ma manako ka dibhuku da Masalmo.d Eto ti womba to atxi ma ziva kwati mapswi ya hi ma manako ka dibhuku diya. Kualakanyisisa ngu mapswi onewo ti mmahile e tsaniseka to Jehovha a ndi na m’vhuna. Kufana ni Jona, ndatinene kuvekisa hamsungo tindimana to kari ta Bhiblia. Ngako hi txi maha mkombelo hi di ka txiemo txo karata, hi nga khumbula tindimana toneto ti hi tsanisa.

SIMAMA U MAHA MIKOMBELO AYI YI NO KUTSHUKETISA KA JEHOVHA

18-19. Ngu txihi txitsanisekiso atxi hi txi manako ka dibhuku da Varoma 8:26, 27? Ningela txikombiso.

¹⁸ Lera Varoma 8:26, 27. Mbimo yimwani hi nga karateka aha ko hi si tikoti kugela Jehovha ati hi ti pfisako tona. Kambe hi nga themba txivhuno txakwe. Ka timbimo toneto, moya wo sawuleka wa Jehovha “wu nga hi kombelela.” Jehovha a thumisile moya wakwe wo sawuleka kasiku e kongomisa vavamna ava va nga bhala mikombelo ayi hi yi manako mu ka Bhiblia. Mbimo yi hi si tikotiko kugela Jehovha ti hi ti pfisako tona, ene a nga thumisa mikombelo yoneyo nga ova yathu. Jehovha a nga xamula mikombelo ayi yi ku mu ka Bhiblia nga ova yathu.

¹⁹ Kuziva toneto ti vhuni mwanathu Yelena wa Rússia. Ene a khotetwe jele ngu kumaha mkombelo ni kugonda Bhiblia. Yelena a karatekile nguto aha ko ti txi mkaratela kumaha mkombelo. Ene a womba tiya: “Ani na ti ziva ti to mbimo yi ni nga karateka ni si ti zivi ti ni no ti womba ka mkombelo, Jehovha a nga thumisa mikombelo ya malanda akwe a kale kota yangu. . . . Eto ti ni thavelete ngutu ka timbimo toneto to karata.”

20. Hi nga yi lulamiselisa kutxani mialakanyo yathu ngako hi txi lava kumaha mkombelo?

²⁰ Mbimo yi hi mahako mkombelo hi di karatekile, hi nga tsulupeteka hi khata kupimisa timwani. Kasiku lulamisela kwati mialakanyo yathu, hi nga engisela audhiyo ya dibhuku da Masalmo. Hi nga tshumela hi duketa kubhala ati hi lavako ku ti womba ka mkombelo wathu kufana ni Dhavhidha. Ditshuri ti to kha wu ngaho mlayo wa nzila yi hi fanelako ku ti lulamisela ngu yona kasiku hi maha mkombelo. (Mas. 141:2) Ngu toneto, duketa ku ti lulamisela ngu nzila yi yi no kuhehukela.

21. Ngu kutxani hi nga gelako Jehovha totshe ti hi ti pfisako tona?

²¹ Ta thavelela kuziva ti to Jehovha wa ma pfisisa matipfelo athu hambi hi si se m’gela. (Mas. 139:4) Hambiketo, ene wa tsaka ngutu ngako a txi hi engisela hi txi maha mkombelo awu wu kombisako to ha mthemba. Ngu toneto, u nga thave kumaha mkombelo ka Tate wako wa nzumani. Thumisa mikombelo ayi yi nga bhalwa mu ka Bhiblia kasiku u mana mapswi a maphya o ma thumisa ka mikombelo yako. Maha mikombelo ayi yi humako ngu mbiluni. M’gele totshe ti u ti pfisako tona, ka mbimo yi u nga tsaka ni mbimo yi u nga karateka. Jehovha Mngana wako wa hombe, mbimo yotshe a nava ni nawe!