Pata vamwani ka mikombelo yako

1. Hi ti zivisa kutxani ti to mikombelo yathu nja lisima ka Jehovha?

MKOMBELO i ningo ya lisima ayi yi tako ngu ka Jehovha. Pimisa ngu tiya: Jehovha a avete tingilozi kumaha mithumo yo kari. (Mas. 91:11) Ene a tshumete e ninga mwanana wakwe wutixamuleli wa hombe. (Mat. 28:18) Se hi nga womba txani ngu mikombelo? Ina ku ni wu Jehovha a nga m’veka ti to e engisa mikombelo yathu? Nadha! Jehovha ngene apune ‘a engisako mikombelo’ yathu.—Mas. 65:2.

2. Ngu txihi txikombiso txi Paulo a nga hi vekela txona mayelano ni kupata vamwani ka mikombelo yathu?

² Athu hi nga maha mkombelo hi gela Jehovha sikarato sathu, kambe nda lisima ngutu kupata vamwani ka mikombelo yathu. Paulo a mahile toneto. Ngu txikombiso, a bhalete tiya dibanza da Efesu: “Na mi alakanya mikombeloni kwangu.” (Vaef. 1:16) Ene a tshumete e gela Timoti atxi: “Na bonga ka Txizimu, . . . na ni si leki ku kualakanya mikombeloni kwangu wusiku ni mitshikari.” Ngu ditshuri, Paulo a ti pata vamwani ka mikombelo yakwe. (2 Tim. 1:3) Paulo a ti maha mkombelo ka Jehovha e m’gela sikarato sakwe. (2 Vak. 11:23; 12:7, 8) Hambiketo, a ti tshumela e ti ha mbimo yo kombelela vamwani.

3. Ngu kutxani mbimo yimwani hi nga divalako kupata vamwani ka mikombelo yathu?

³ Mbimo yimwani hi nga divala kupata vamwani ka mikombelo yathu. Ngu kutxani? Mwanathu Sabrinaa a womba tiya: “Aku hi mananako ni sikarato so tala ka wutomi, athu hi nga zumbela kugela Jehovha sikarato sathu dwe hi divala kukombelela vamwani.” Ina nawe ta kumahekela toneto? Idi toneto, gondo yiya yi na kuvhuna ngutu. Txo khata, yona yi na hi vhuna kuwona to ngu kutxani i di ta lisima kupata vamwani ka mikombelo yathu. Txa wumbidi, hi na tshumela hi wona to hi nga ti mahisa kutxani toneto.

NGU KUTXANI HI DI FANETE KUPATA VAMWANI KA MIKOMBELO YATHU?

4-5. I ngu nzila muni kupata vamwani ka mikombelo yathu ti ku ni “mtamo ngutu”? (Jakobe 5:16)

⁴ Kupata vamwani ka mikombelo yathu “ti ni mtamo ngutu.” (Lera Jakobe 5:16.) Ina ti nga koteka ti to mikombelo yathu yi vhuna vamwani? Ina. Mbimo yi Jesu a nga ziva ti to mpostoli Pedro a ndi na m’lamba, a wombile tiya: “Kambe ni kukombelete kasiku likholo lako li si holi.” (Luka 22:32) Paulo nene a txi ti ziva ti to mikombelo yathu yi nga vhuna vamwani. Mbimo yi a nga betwa jele a si nga ni mnando khe Roma, ene a bhalete Filimoni a txi: “Nguko ngu kona ha ka mikombelo yanu, na themba ti to ni na tshumetwa ni txi wiya kheyo kwanu.” (Film. 22) Ngu kona ha ka mikombelo ya vanathu, Paulo a humisilwe jele ngu txikuluveta e simama ni mthumo wakwe wo txhumayela.

⁵ Kambe ti hakubasani ti to, mbimo yi hi patako vamwani ka mikombelo yathu kha hi njo sinzisa Jehovha ti to e vhuna vathu vonevo. Ene wa kupfisisa kukarateka ku malanda akwe ma ku nako, ni ku mbimo yimwani ene wa maha ati ma ti kombelako. Kuziva eto ti na hi vhuna ku hi maha mkombelo ka Jehovha ngu mbilu yotshe mayelano ni txiemo txo kari hi gwita hi ti leka manzani kwakwe.—Mas. 37:5; wona ni 2 Vakorinto 1:11.

6. Hi tipfisa kutxani mbimo yi hi patako vamwani ka mikombelo yathu? (1 Pedro 3:8)

⁶ Kupata vamwani ka mikombelo yathu ta hi vhuna ku hi sakulela kuva ni “wumbilu.” (Lera 1 Pedro 3:8.) M’thu wu a ku ni wumbilu wa gweseka mbimo yi a wonako vamwani va txi xaniseka ni ku wa navela kumaha txo kari kasi ku va vhuna. (Marku 1:40, 41) Didhota dimwani di di dhanwako ku i Michael di womba tiya: “Mbimo yi ni mahako mikombelo mayelano ni silaveko sa vathu vamwani, na ma pfisisa matipfelo awe ni ku eto ti ya ti ni maha ni va dhunda ngutu. Ni tipfa ni di hafuhi navo, hambi vona va si ti zivi.” Didhota dimwani di dhanwako ku i Ricardo da txhamusela wuyelo yimwani. Dona di womba tiya: “Mbimo yi ni mahako mkombelo mayelano ni m’thu wo kari, ni tshumela ni navela ku m’vhuna.” A tshumela a womba tiya: “Mbimo yi hi vhunako m’thu awu hi nga mpata ka mikombelo yathu, hi na va hi txo vhuneta ko xamula mkombelo wathu mayelano ni nene.”

7. Kupata vamwani ka mikombelo yathu ti hi vhunisa kutxani ku hi va ni mawonelo a manene ngu sikarato sathu? (Vafilipiya 2: 3, 4) (Wona ni mifota.)

⁷ Kupata vamwani ka mikombelo yathu ta hi vhuna ku hi va ni mawonelo a manene mayelano ni sikarato sathu. (Lera Vafilipiya 2:3, 4.) Aku hi hanyako ka mafu yawa ma fumwako ngu Sathani, hotshethu ha wonisana ni sikarato. (1 Joh. 5:19; Mtu. 12:12) Ngako mbimo yotshe hi txi pata vamwani ka mikombelo yathu, ta hi vhuna kukhumbula ti to ‘vanathu va hamafuni kotshe ni vona va wonisana ni sikarato so fana ni sathu.’ (1 Pedro 5:9) Mwanathu Catarina awu i ku nyaphandule a womba tiya: “Kupata vamwani ka mikombelo yangu ta ni khumbutisa ti to vamwani ni vona va wonisana ni sikarato. Se eto ta ni vhuna ku ni si veki mapimo ka sikarato sangu dwe.”

MBA MANI VA HI NGA VA PATAKO KA MIKOMBELO YATHU?

8. Mba mani ava hi nga va patako ka mikombelo yathu?

⁸ Mba mani va hi nga va patako ka mikombelo yathu? Hi nga kombelela vathu va vangi. Ngu txikombiso, hi nga kombelela ava va lwalako, majovhem aya ma kuzetelwako ngu vakolega va txikolwani kumaha to biha mwendo avale va wonisanako ni sikarato ngu mhaka yo kumba. Vanathu va vangi va wonisana ni kuwukelwa ngu maxaka mwendo ngu wukoma. (Mat. 10:18, 36; Mith. 12:5) Vanathu vamwani ti lavile ve leka miti yawe ngu mhaka ya tiyimbi. Vamwani va xaniswa ngu tiphango ta mtumbuluko. Ti nga maha hi si va zivi vanathu vava. Kambe mbimo yi hi va patako ka mikombelo yathu, hi na va hi txi londisa txirumo txa Jesu txa ti to “hi dhundana.”—Joh. 13:34.

9. Ngu kutxani hi di fanete kukombelela vanathu va va thangelako ka sengeletano ya Jehovha kumweko ni vasikati vawe?

⁹ Hi nga tshumela hi pata vanathu va va thangelako ka sengeletano ya Jehovha. Vanathu vonevo va pata Mmidi wu wu Fumako ni vavhuneteli vawe, siro sa Komisawu ya Bhetele, vawoneleli va madhepartamentu a Bhetele, vawoneleli va sigava, madhota a dibanza ni malanda a wuthumeli. Mtalo wa vanathu vava va wonisana ni sikarato, kambe va thuma ngu kuhiseka kasiku ve hi vhuna. (2 Vak. 12:15) Ngu txikombiso, muwoneleli wa txigava wu a dhanwako ku i Marcos, a womba tiya: “Txikarato txangu txa hombe ngu zumba kule ni vaveleki vangu ava va nga kumba ni kuxuphwa ngu malwati. Hambi ku ndiyangu ni mwamna wakwe va va khatalelako, ta ni panda ngutu aku ni singako hafuhi navo kasiku ni maha to engeteleka ti to ni va vhuna.” Hambi i di ti to ha si ziva sikarato sa vanathu vonevo mwendo nem, hi fanete ku va pata ka mikombelo yathu. (1 Vat. 5:12, 13) Hi fanete kutshumela hi pata vasikati vawe ka mikombelo yathu, nguko vona va seketela vavamna vawe ti to ve simama ve hetisisa siavelo sawe.

10-11. Ina mikombelo ayi hi yi mahako hi txi pata vanathu ya mtsakisa Jehovha? Txhamusela.

¹⁰ Nga ha hi nga ti wona ngu kona, makhambi o tala hi kombelela vanathu va vangi. Ngu txikombiso, hambi hi si pimisi ngu mwanathu wo kari, kambe hi nga kombela Jehovha ku e vhuna vale va ku majele ni kuthavelela vale va nga felwa ngu wu va m’dhundako. Didhota dimwani di dhanwako ku i Donaldo di womba tiya: “Hi ni vanathu vo tala ava va pindako ngu ka sikarato, ava ti lavako hi va pata ka mikombelo yathu.”

¹¹ Ina mikombelo yoneyo ya mtsakisa Jehovha? Ina! Phela athu kha hi si zivi sotshe silaveko sa vanathu. Ngu toneto, nda tinene ku hi maha mkombelo mayelano ni sikarato asi ngu mtolovelo si xuphako vanathu vo tala. (Joh. 17:20; Vaef. 6:18) Mikombelo yoneyo yi kombisa ti to ha ‘va dhunda vanathu va hamafuni kotshe.’—1 Pedro 2:17.

ATI HI FANELAKO KU TI MAHA MBIMO YI HI PATAKO VAMWANI KA MIKOMBELO YATHU

12. Ku va ziva kwati vanathu ti nga hi vhunisa kutxani ku hi maha mikombelo yo kongoma mayelano ni sikarato sawe?

¹² Ziva kwati vanathu. Hahanze ko kombelela vanathu kota mtxawa dwe, ndatinene kutshumela hi kombelela vanathu ngu mmweyo ni mmweyo wawe. Ina ku ni mwanathu dibanzani kwako a wonisanako ni txikarato txa malwati? Ina ku ni dijovhem adi di nga karateka ngu mhaka ya mkuzetelo wo biha awu di wonisanako nawo txikolwani? Ina ku ni mveleki awu a zamako kukulisa mwanana wakwe a di ekha “ngu sileleto ni tigondo ta MKOMA”? (Vaef. 6:4) Ngako u txi zama ku va ziva kwati vanathu, u na ya u va dhunda, u va komba wumbilu ni ku eto ti na kukuzeta ku u va pata ka mikombelo yako.b—Var. 12:15.

13. Hi nga va patisa kutxani ka mikombelo yathu avale hi si khaliko ku va wona?

¹³ Mbimo yi u mahako mkombelo mayelano ni mwanathu wo kari, thumisa ditina dakwe. Hi nga maha toneto ni ka vanathu vo kha hi khali ku va wona. Ngu txikombiso, pimisa ngu vanathu ava va nga betwa jele ka matiko o fana ni Crimea, Eritrea, Russia, ni Singapura. U nga mana matina a vanathu vonevo ka site ya jw.org.c Muwoneleli wa txigava awu a dhanwako ku i Brian a womba tiya: “Ni tumbute ti to kubhala matina a vanathu vonevo ni gwita ni ma womba ngu dipswi do guleka, ta ni vhuna ku ni ma khumbula ni va pata ka mikombelo yangu.”

14-15. Hi nga yi mahisa kutxani mikombelo yo kongoma?

¹⁴ Maha mikombelo yo kongoma. Michael, wu hi nga womba-womba ngu ngene makhatoni a womba tiya: “Mbimo yi ni lerako matimu a vanathu va va nga betwa jele ka jw.org, na zama ku ti pimisa ni di ka txiemo txi va ku ka txona. Na ti ziva ti to ngako ni ti ko va jele ni ndi na karateka ngu mhaka ya msikati wangu, ni ku ni ndi na lava kuziva ti to ina wa xayiseka kani. Eto ta ni vhuna ku ni maha mkombelo wo kongoma mayelano ni vanathu va va nga betwa jele ve siya vasikati vawe.”—Vaheb. 13:3.

¹⁵ Ngako hi txi pimisa ngu nzila yi vanathu va hanyako ngu yona ditshiku ni ditshiku va di jele, hi nga mana timhaka to kongoma to ti womba ka mikombelo yathu. Ngu txikombiso, hi nga maha mkombelo hi kombela ti to vagwardha va jele va si va xuphi vanathu ni kutshumela hi kombela ti to vakoma ve humesa vanathu jele ti to ve khozela Jehovha va di khululekile. (1 Tim. 2:1, 2) Hi nga tshumela hi kombela ti to vanathu va va ku dibanzani da mwanathu wu a ku jele ve tsaniswa ngu txikombiso txakwe, mwendo hi kombela ti to ava i singako Tifakazi ta Jehovha ve engisa didungula dathu ngu kuwona mahanyelo a manene a mwanathu wu a ku jele. (1 Pedro 2:12) Hi nga maha to fana ka vanathu va va wonisanako ni sikarato simwani. Ngako hi txi zama kuziva kwati vanathu, hi thumisa matina yawe ka mikombelo yathu, ni kumaha mikombelo yo kongoma, hi na kombisa ti to ‘ha va dhunda vanathu votshe.’—1 Vat. 3:12.

VANA NI MAWONELO A MANENE MAYELANO NI MIKOMBELO YAKO

16. Nji txani txi no hi vhuna ku hi va ni mawonelo a manene mayelano ni mikombelo yathu? (Matewu 6:8)

¹⁶ Nga ha hi nga ti wona ngu kona, kupata vamwani ka mikombelo yathu ti nga txitxa txiemo txawe. Hambiketo, hi lava kuva ni mawonelo a manene mayelano ni mikombelo yathu. Mbimo yi hi mahako mkombelo, kha hi njo gela Jehovha ati a si ti ziviko; ni ku ene kha lavi txialakanyiso mayelano ni nzila yo maha to kari. Jehovha wa ti ziva ati malanda akwe ma ti lavako nem ona ma si se ku ti ziva. (Lera Matewu 6:8.) Se ngu kutxani hi di fanete kupata vamwani ka mikombelo yathu? Kuengetela ka sivangelo si hi nga womba-womba ngu sona ka maparagrafu ya ma nga pinda, athu hi pata vamwani ka mikombelo yathu nguko i nzila yo kombisa ti to ha khatala ngu vona. Lirando li na hi kuzeta to hi pata vamwani ka mikombelo yathu. Phela Jehovha wa tsaka ngutu mbimo yi a wonako malanda akwe ma txi etetela lirando lakwe.

17-18. Jehovha a ti pfisa kutxani ngu mikombelo yathu? Ningela txikombiso.

¹⁷ Hambi i di ti to mikombelo yathu yi ti komba nga kha yi txitxi txiemo txa vanathu va hi va kombelelako, yona yi kombisa ti to ha va dhunda ni ku Jehovha wa ti wona toneto. Kasi kupfisisa mhaka yiya, pimisa ngu mwaya wo kari wu ku ni vanana vambidi, dihorana ni mfana. Mwanana wa mfana wa lwala ni ku a otete m’bhedhuni. Se wule wa dihorana a gela tiya tate wakwe: “Papa zama kuvhuna ndiyangu. Ene wa lwala ngutu!” Hambi ku tate wuwa a txi dhundako txifanyana txakwe, ni ku a maha totshe ti a nga ti kotako kasiku e txi vhuna ti to txi kalamuka ka malwati a txona, ene wa tsaka ngutu mbimo yi a wonako mwanana wakwe wa dihorana a txi karateka ngu ndiyakwe aha koza e mkombela ti to e m’vhuna.

¹⁸ Eto ngu ti Jehovha a hi kuzetako ku hi ti maha, hi khatala ngu vanathu hi va pata ka mikombelo yathu. Mbimo yi hi mahako tiya, hi kombisa ti to ha va dhunda ngutu vanathu ni ku Jehovha wa ti wona toneto. (2 Vat. 1:3; Vaheb. 6:10) I singeto dwe, nga ha hi nga ti wona ngu kona, mikombelo yi hi yi mahako hi txi pata vamwani yi nga maha ti to txiemo txawe txi txhukwala. Ngu toneto, maha totshe ti u nga ti kotako kasi kupata vamwani ka mikombelo yako.